Duna Nan un Bonbini!
1. Ki ocasion ta brinda nos un bon oportunidad pa duna testimonio, y dicon?
1 Tur aña e Memorial ta brinda nos un bon oportunidad pa duna testimonio. Pensa riba esaki: E aña aki, nos ta spera un asistencia di mas cu dies miyon bishitante na Memorial pa scucha tocante e dos expresionnan di amor di mas grandi cu a ser demostra mediante e rescate. (Juan 3:16; 15:13) Nan lo haya sa di e bendicionnan cu nan por ricibi pa medio di Jehova su provision. (Isa. 65:21-23) Pero no ta e orador so lo duna testimonio na e ocasion aki. Nos tur lo haya oportunidad pa duna un bon testimonio ora nos extende un caluroso bonbini na e invitadonan.—Rom. 15:7.
2. Con nos por duna e bishitantenan un caluroso bonbini?
2 En bes di yega cay sinta, keda keto y warda e programa cuminsa, dicon no tuma iniciativa y cera conoci cu e bishitantenan banda di bo? E bishitantenan por ta un tiki nervioso, pasobra nan no sa kico ta bay pasa exactamente. Pues un sonrisa amigabel y un saludo cordial por laga nan sinti nan mes na cas. Pa haya sa si un persona a bin door cu el a haya un invitacion, bo por puntr’e si ta prome biaha e ta bin un di nos reunionnan of si e conoce un miembro di e congregacion. Kisas bo por invit’e pa sinta banda di bo, di manera cu e por wak hunto cu bo den bo Bijbel y buki di cantica. Si e Memorial ta na Salon di Reino, kisas bo por dun’e un tour cortico. Despues di e discurso, bis’e cu bo ta dispuesto pa contesta cualkier pregunta cu e por tin. Si bo congregacion tin cu sali lihe pa un otro congregacion por reuni, bo por puntr’e: “Con bo a haya e reunion? Tin un manera cu mi por tuma contacto cu bo?” Despues, traha un afspraak pa sigui papia cu ne un otro dia. Pa loke ta e publicadornan inactivo cu asisti, specialmente e ancianonan lo ta atento pa anima y yuda nan.
3. Dicon ta importante pa nos tuma iniciativa pa duna e bishitantenan na Memorial un bonbini?
3 Pa hopi bishitante, esaki lo ta e prome biaha cu nan ta bay experencia e goso, paz y union cu ta reina den e paradijs spiritual cu nos como e pueblo di Jehova ta disfruta di dje. (Sal. 29:11; Isa. 11:6-9; 65:13, 14) Ki impresion nan lo keda cu ne? Esey lo depende di cuanto esfuerso nos lo haci pa duna nan un bonbini.