Kico Ta Motiva Nos pa Predica?
1. Amor pa ken ta motiva nos pa predica?
1 E mihor trabou cu nos por haci awe ta e trabou di predica e bon noticia di e Reino di Dios. Si, cu e actividad aki nos ta demostra cu nos ta obedece e dos mandamentonan di mas grandi, esta, stima Jehova y stima nos prohimo. (Mar. 12:29-31) Amor ta un forsa poderoso cu por motiva nos pa predica cu entusiasmo.—1 Juan 5:3.
2. Con nos ta mustra amor pa Jehova pa medio di e trabou di predica?
2 Amor pa Jehova: E amor cu nos ta sinti pa nos mihor Amigo, Jehova Dios, ta motiva nos pa defende su reputacion cu Satanas ta dañando pa un seis mil aña caba. (2 Cor. 4:3, 4) Ta pa Satanas su via hende ta kere cu Dios ta tormenta pecadornan den un fierno di candela, cu e ta parti di un Trinidad misterioso y cu e no ta interesa den hende. Hopi hende hasta a yega na e conclusion cu Dios no ta existi. Pero nos kier pa nan haya sa e berdad tocante nos Tata celestial. Nos esfuerso diligente pa duna testimonio tocante Dios ta hacie masha contento y ta pone e plannan di Diabel fracasa.—Prov. 27:11; Heb. 13:15, 16.
3. Pakico nos trabou di predica ta un muestra di nos amor pa prohimo?
3 Amor pa Prohimo: Cada bes cu nos predica na un hende, nos ta demostra nos amor p’e. Den e tempo critico aki ta masha urgente pa hende scucha e bon noticia. Hopi hende ta manera e Ninivitanan di e tempo di Jonas cu no tabata “sa e diferencia entre nan man drechi y [nan] man robes.” (Jon. 4:11) Nos trabou di predica ta siña hende con pa ta feliz y tin exito den bida. (Isa. 48:17-19) E ta duna nan speransa. (Rom. 15:4) Si nan scucha y aplica loke nan ta siña, nan “lo ser salba.”—Rom. 10:13, 14.
4. Kico Jehova lo no lubida hamas?
4 Un mucha cu ta stima su mama cu su tata no ta demostra su amor pa nan na cierto ocasion so. Mas bien, e ta purba demostra su amor na tur momento. Asina tambe, nos gran amor pa Jehova y pa nos prohimo lo motiva nos pa probecha di tur oportunidad cu presenta pa duna testimonio, no solamente ora nos ta predica di cas pa cas. Pues, laga nos sigui predica sin stop. (Echo. 5:42) Hamas Jehova lo lubida e amor cu nos ta demostra.—Heb. 6:10.