Abo Ta Dispuesto pa Adapta?
1. Kico nos mester haci en bista di e cambionan den e escena mundial?
1 Na 1 Corintionan 7:31, Bijbel ta compara mundo cu un escenario caminda e escena- y actornan ta cambia constantemente. Cambionan den e escena mundial ta pone cu tin biaha nos mester adapta nos metodo di predica, nos schedule y nos presentacion. Abo ta dispuesto pa haci esey?
2. Kico nos tin cu haci pa keda pareu cu e organisacion?
2 Nos Metodonan di Predica: E congregacion cristian semper tabata dispuesto pa adapta. Por ehempel, na prome instante ora Hesus a manda su discipelnan bay predica, el a bisa nan pa no bay cu saco di cuminda ni placa. (Mat. 10:9, 10) Pero despues, en bista di e hostilidad cu su discipelnan lo a enfrenta y e expansion di e trabou di predica den otro teritorio, el a modifica e instruccionnan aki. (Luc. 22:36) Durante siglo 20, e organisacion di Jehova a uza diferente metodo di predica segun e necesidad di e epoca. Por ehempel, nan a uza carchi di testimonio, programanan di radio y auto cu loudspeaker. Awe, debi cu den hopi area no ta facil pa haya hende na cas, nos organisacion a pone mas enfasis pa complementa nos sirbishi di cas pa cas cu testimonio publico y informal. Tambe nos a haya e animacion pa bay di cas pa cas mas den atardi si e hendenan ta traha durante dia. Jehova su garoshi celestial ta sigui ahusta su rumbo. Abo ta keda pareu cu ne?—Eze. 1:20, 21.
3. Kico lo yuda nos pa ta mas eficiente den nos sirbishi?
3 Nos Presentacion: Actualmente, kico ta preocupa hende den e teritorio? Ta economia, famia of criminalidad? Si nos ta na altura di e problema- y circunstancianan di e hendenan den nos teritorio, nos lo por prepara un presentacion adecuado. (1 Cor. 9:20-23) Ora un doño di cas bisa nos kico ta preocup’e, en bes di ignora esey y sigui cu loke nos a prepara, lo ta mas mihor pa adapta nos presentacion na su preocupacion.
4. Dicon nos mester ta lihe pa adapta na circunstancia nobo?
4 Pronto mundo su ultimo escena lo termina, y e gran tribulacion lo cuminsa. “No a sobra mucho tempo mas.” (1 Cor. 7:29) Pues ta hopi importante pa nos haci e adaptacionnan necesario sin tarda, pa asina nos por haci mas den e tiki tempo cu a resta.