Bo Ta Haci Esfuerso pa Ricibi Privilegio den Congregacion?
1. Ki ora un ruman homber hoben por cuminsa aplica e conseho di 1 Timoteo 3:1?
1 “Si un homber ta haci esfuerso pa bira un superintendente, e ta desea un trabou excelente.” (1 Tim. 3:1) E palabranan aki ta anima ruman hombernan pa haci esfuerso pa ricibi privilegio den congregacion. Bo mester ta un adulto pa haci esey? Wel, lo ta bon pa bo cuminsa haci esfuerso for di un edad hoben. Asina bo por ricibi entrenamento y desaroya e cualidadnan necesario cu por yuda bo bin na consideracion pa sirbi como sirbidor ministerial ora bo bira grandi. (1 Tim. 3:10) Pues, si bo ta un ruman homber hoben batisa, ban wak kico bo por haci pa sirbi den congregacion.
2. Con un hoben por cultiva y demostra e deseo di yuda?
2 Cultiva e Deseo di Yuda: Corda cu bo ta haciendo esfuerso pa alcansa un trabou excelente, no pa haya un titulo. Pesey, cultiva e deseo di yuda bo rumannan. Pa bo por logra esaki, bo mester medita riba e bon ehempel di Hesus. (Mat. 20:28; Juan 4:6, 7; 13:4, 5) Pidi Jehova yuda bo mustra interes den otronan. (1 Cor. 10:24) Bo por yuda rumannan cu ta malo di salud of di edad avansa? Bo ta dispuesto pa yuda cu trabou di limpieza y mantencion di e Salon di Reino? Bo ta ofrece bo mes pa duna parti boluntario den e Scol di Ministerio Teocratico? Lo bo ripara cu ora bo duna di bo mes pa yuda otronan, lo bo ta hopi feliz.—Echo. 20:35.
3. Kico ta importante pa un ruman homber por sirbi den congregacion, y con e por desaroy’e?
3 Traha Riba Bo Spiritualidad: Un ruman cu kier sirbi den congregacion mester ta na prome luga un homber spiritual; esey ta mucho mas importante cu talento special of habilidad natural. Un homber spiritual ta haci esfuerso pa mira cosnan manera Jehova y Hesus ta mira nan. (1 Cor. 2:15, 16) E ta desplega e “fruta di spirito.” (Gal. 5:22, 23) Ademas, e ta un evangelisado celoso cu ta pone interes di Reino na prome luga. (Mat. 6:33) Pa bo por desaroya cualidadnan spiritual, bo tin cu haci esfuerso pa sigui un bon rutina di estudio personal. Esaki ta inclui lesa Bijbel tur dia y lesa cada edicion di E Toren di Vigilancia y ¡Despertad! Tambe ta importante pa prepara pa e reunionnan y asisti na nan. (Sal. 1:1, 2; Heb. 10:24, 25) Ora Pablo a anima e hoben Timoteo pa sigui haci progreso spiritual, el a skirbie e siguiente palabranan: “Presta atencion constantemente na ... e siñansa cu bo ta duna.” (1 Tim. 4:15, 16) Pues, prepara bon pa e partinan cu bo haya den e Scol di Ministerio Teocratico. Prepara y sali regularmente den sirbishi. Pone metanan spiritual, manera, traha pionero, sirbi na Betel, asisti na e Scol Biblico pa Ruman Homber Soltero, y traha pa alcansa nan. Ora bo fortalece bo spiritualidad, esey lo yuda bo “huy for di e deseonan di hubentud.”—2 Tim. 2:22.
4. Dicon ta importante pa bo ta fiel y confiabel?
4 Sea Fiel y Confiabel: Den prome siglo e apostelnan a nombra ruman hombernan “di bon reputacion”, cu tabata fiel y confiabel, pa percura cuminda pa e cristiannan den necesidad. Asina e apostelnan por a atende otro cosnan importante ya cu nan por a confia cu e ruman hombernan aki lo a cumpli cu nan asignacion. (Echo. 6:1-4) Pesey, ora bo haya un asignacion den congregacion, haci tur bo esfuerso pa cumpli mas mihor posibel cu ne. Imita Noe, kende a cumpli exactamente cu tur e instruccionnan cu el a haya pa traha e arca. (Gen. 6:22) Fieldad ta algo masha importante pa Jehova y e ta un muestra di madurez spiritual.—1 Cor. 4:2; wak e cuadro “E Beneficionan di Entrenamento.”
5. Dicon ruman hombernan hoben mester haci esfuerso pa ricibi privilegio den congregacion?
5 Manera Bijbel a profetisa, Jehova ta acelerando e cosecha spiritual. (Isa. 60:22) Como promedio, tur aña 250.000 hende ta batisa. Debi cu tin asina tanto hende nobo ta bin den e berdad, mester di mas ruman homber spiritualmente capacita pa cumpli cu e responsabilidadnan di congregacion. Awor mas cu nunca tin hopi trabou den e sirbishi di Jehova. (1 Cor. 15:58) Pesey, ruman hombernan hoben, boso ta haci esfuerso pa ricibi privilegio den congregacion? Si ta asina, boso di berdad ta desea un trabou excelente.
[Comentario na pagina 2]
Debi cu tin asina tanto hende nobo ta bin den e berdad, mester di mas ruman homber spiritualmente capacita pa cumpli cu e responsabilidadnan di congregacion
[Cuadro na pagina 3]
E Beneficionan di Entrenamento
Ruman hombernan hoben ehemplar ta progresa ora ancianonan duna nan asignacion y entrena nan. Un biaha despues di reunion, un superintendente di circuito tabata sinta riba plataforma ta anima un publicador. El a nota cu un mucha homber tabata para den cercania, pues el a puntr’e si e tabata wardando pa papia cu ne. E mucha homber a contest’e cu e ta asigna pa stofzuig e plataforma despues di cada reunion. Su mayornan tabata cla pa bay cas, pero e no tabata kier bay sin cumpli cu su asignacion. Mesora e superintendente a baha for di plataforma. El a bisa: “Den e congregacion ey, e ancianonan tin custumber di entrena hobennan ehemplar y duna nan asignacion den congregacion. Pesey ta masha normal pa cada bes cu mi bishita e congregacion, nan tin ruman homber hoben pa recomenda como sirbidor ministerial.”