Tuma e Profetanan Como Ehempel: Amos
1. Dicon e ehempel di Amos por duna nos curashi pa predica?
1 Bo a yega di sinti cu bo no ta cualifica pa predica pasobra bo no tin educacion halto y a bin di un famia cu no tin masha moda? Si ta asina, e ehempel di Amos por duna bo curashi. Amos tabata un wardador di carne i un trahador temporal. Sinembargo, Jehova a dun’e poder pa proclama un mensahe importante. (Amos 1:1; 7:14, 15) Asina tambe, den nos tempo, Jehova ta uza esnan cu ta humilde y manso. (1 Cor. 1:27-29) Ki otro lesnan nos por siña di profeta Amos cu por yuda nos den nos sirbishi?
2. Dicon nos por keda firme ora nos ta enfrenta oposicion den sirbishi?
2 Keda Firme ora Nos Ta Enfrenta Oposicion: Ora cu Amasias, un sacerdote di e reino di noord di dies tribu di Israel i cu tabata adorador di bishe, a scucha e profecia di Amos, tabata comosifuera el a bisa: ‘Bay bo cas! Laga nos na paz! Nos tin nos mes religion caba!’ (Amos 7:12, 13) Amasias a pidi Rey Jeroboam pa prohibi e trabou di Amos. I pa logra esey, el a troce e palabranan di e profeta. (Amos 7:7-11) Pero Amos no a laga Amasias intimid’e. Awe, algun miembro di clero ta busca apoyo politico den nan esfuerso pa persigui Jehova su pueblo. Sinembargo, Jehova ta sigura nos cu ningun arma cu wordo forma contra nos lo no tin exito duradero.—Isa. 54:17.
3. Menciona dos aspecto di e mensahe cu nos ta declara awe.
3 Declara Dios Su Huicio y Futuro Bendicionnan: Aunke Amos a profetisa huicio contra e dies tribunan di e reino di Israel, el a conclui e buki di Bijbel cu ta carga su nomber cu Jehova su promesa di restaura Israel y bendicion’e abundantemente. (Amos 9:13-15) Nos tambe ta papia di Dios su binidero “dia di huicio”, pero esaki ta solamente un parti di e ‘bon noticia di reino’ cu nos mester declara. (2 Ped. 3:7; Mat. 24:14) Ora Jehova destrui e malbadonan na Armagedon, esaki lo habri caminda pa e paradijs terenal.—Sal. 37:34.
4. Ki siguransa Jehova ta duna nos pa nos por cumpli cu su boluntad?
4 E echo cu nos ta predica e mensahe di Reino den un mundo yen di opositor sin duda ta pone nos dedicacion na Jehova y nos determinacion pa haci su boluntad na prueba. (Juan 15:19) Sinembargo, nos ta sigur cu Jehova lo sigui yuda nos pa nos por cumpli cu su boluntad manera el a yuda Amos.—2 Cor. 3:5.