Un Serie Practico pa Uza den Sirbishi
1. Kico ta e dos metanan di e serie “Un Combersacion Interesante Tocante Bijbel”?
1 Cada pasa tanto tempo, E Toren di Vigilancia pa publico tin e serie “Un Combersacion Interesante Tocante Bijbel.” E serie aki tin dos meta: presenta siñansa biblico na un manera cu ta atrae hende y yuda nos mira con pa uza tacto ora nos ta rasona riba cierto tema. (1 Ped. 3:15) Con nos por haci bon uzo di e articulonan aki?
2. Con nos por uza e articulonan aki den sirbishi?
2 Uza Nan den Sirbishi: Lo ta bon pa nos warda algun ehemplar di E Toren di Vigilancia cu tin un articulo di e serie aki den nan. Ora un doño di cas, un persona interesa of un studiante di Bijbel haci un pregunta of bin cu un obhecion cu un di e articulonan aki a trata, nos lo por dun’e un ehemplar di e revista cu ta contene e articulo ey y ofrec’e pa analis’e hunto cu ne. Si bo no tin e revista cu ta trata e articulo, bo por download esaki for di jw.org.
3. Con nos por analisa un di e articulonan cu un doño di cas?
3 Con nos por analisa un di e articulonan aki cu un persona? Algun publicador ta pidi e persona pa hunga e rol di e doño di cas y nan ta hunga e rol di e Testigo. E manera aki di analisa e dialogo na bos halto por duna bon resultado pasobra e ta laga e persona analisa nos creencianan sin cu e ta sintie intimida.—Deu. 32:2.
4. Con nos por uza e articulonan di e serie aki pa siña nos mes?
4 Siña Bo Mes y Bo Studiante di Bijbel: Ora bo ta lesa e articulonan aki, tuma nota di e textonan, e ilustracionnan y e forma di rasona. Wak cu ki tono e publicador ta trece e informacion padilanti. Despues purba sigui e ehempel aki den sirbishi. (Prov. 1:5; 9:9) Un ruman muher a bisa: “Ora mi ta lesa e articulonan aki, ta manera mi ta siña for di un compañero pionero ‘perfecto’—uno cu semper sa ta kico e tin cu bisa.”
5. Con nos por yuda nos studiantenan di Bijbel prepara pa sirbishi?
5 Nos por uza e articulonan aki tambe pa yuda nos studiantenan di Bijbel prepara pa sirbishi. Lesa e informacion hunto, anto laga nan hunga e rol di e publicador. Esaki ta siña nan papia di nan creencianan cu tacto. (Col. 4:6) Sin duda, e serie di articulonan aki ta un di e diferente maneranan cu Jehova ta yuda nos “cumpli cu [nos] sirbishi cabalmente.”—2 Tim. 4:5.