Probecha di e Oportunidadnan Cu Abo Tin pa Plama e Mensahe di Reino
1. Ki les nos por siña for di e actitud di David?
1 Rey David no a laga su circunstancianan den bida bira un obstaculo p’e. Por ehempel, e kier a traha un cas di adoracion pa Jehova pero Dios no a permitie haci esey. Pues, David a ahusta su meta y a prepara tur cos pa su yiu Salomon traha e tempel. (1 Rey. 8:17-19; 1 Cro. 29:3-9) Na luga di sinta lamenta riba loke e no por a haci, David a enfoca riba loke si e por a haci. Con nos por tin e mesun actitud ey ora di plama e mensahe di Reino?
2. Kico cada un di nos por analisa di nos mes?
2 Haci Loke Bo Por: Hopi ruman a simplifica nan bida pa nan por traha sea pionero auxiliar of regular. (Mat. 6:22) Abo por join nan? Ora bo pidi Jehova yuda bo analisa bo circunstancianan, kisas lo bo mira cu tin “un porta grandi cu ta hiba na actividad” habri bo dilanti. Si ta asina, probecha di e oportunidad ey!—1 Cor. 16:8, 9.
3. Aunke nos circunstancianan no ta permiti nos traha como pionero, cua oportunidadnan nos por probecha di dje pa duna testimonio?
3 Pero, kico si bo circunstancianan no ta permiti bo traha pionero? Pensa riba e otro opcionnan cu tin. Por ehempel, si na bo trabou bo tin contacto cu hende cu no ta Testigo, dicon no busca un oportunidad pa duna nan testimonio? Of si bo tin problema di salud, dicon no papia tocante e Reino cu e personal medico y esnan cu ta duna cuido? Corda cu publicadornan cu no por haci mucho debi na edad avansa of problema serio cu salud por raporta nan ora di sirbishi di veld den fraccionnan di 15 minuut. Ora cu bo ta yena bo rapport fin di luna, haci sigur di conta tur e minuutnan cu bo a duna testimonio informal y tambe tur literatura cu bo a laga, hasta tratado y invitacion di Memorial of congreso. Lo bo keda sorprendi di mira e total di tur e esfuersonan chikito ey!
4. Kico nos ta determina pa haci?
4 Sea cual sea nos circunstancianan, laga nos probecha di cada oportunidad cu presenta pa plama e bon noticia. Esey lo laga nos sinti e satisfaccion di sa cu nos ta haci tur loke nos por pa e Reino.—Mar. 14:8; Luc. 21:2-4.