E Scol di Ministerio Teocratico 2015 Ta Yuda Nos Mehora Nos Manera di Siña Hende

¹ David a skirbi: “Laga e palabranan di mi boca y e meditacion di mi curason ta aceptabel den bo bista, o SEÑOR, mi baranca y mi Redentor.” (Sal. 19:14) Nos tambe kier pa nos palabranan agrada Jehova pasobra nos ta balora nos privilegio di papia di e berdad den congregacion y sirbishi. E Scol di Ministerio Teocratico ta un di e maneranan cu Jehova ta prepara nos pa esey. Ta tene e scol un biaha pa siman rond mundo den mas cu 111.000 congregacion. E ta yuda rumannan di diferente pais y di tur background bira predicador efectivo cu por siña hende e bon noticia cu conviccion, curashi y tacto.—Echo. 19:8; Col. 4:6.

² Den e programa di scol pa 2015 nos lo analisa tanto informacion cu tin den e foyeto chikito Kico Nos Por Siña for di e Palabra di Dios? como e buki Perspicacia. Ademas, a ahusta duracion di e puntonan sobresaliente di Bijbel y Parti Num. 1. Ban wak kico e cambionan ta y con nos mester duna cada parti.

³ Puntonan Sobresaliente di Bijbel: Ruman hombernan cu haya e parti aki tin dos minuut pa presenta un punto interesante y practico for di e lesamento di Bijbel asigna pa e siman ey. Pa presenta un punto util den e tempo asigna, bon preparacion ta necesario. Despues, manera ta custumber, esnan presente tin seis minuut pa duna comentario di 30 seconde of menos riba puntonan cu nan a haya interesante durante nan lesamento di Bijbel. Pa nos por duna un bon comentario den 30 seconde of menos, ta rekeri preparacion y disciplina. Sinembargo, esaki ta un bon training pa nos y asina mas ruman ta haya chens di duna comentario di loke nan a siña durante nan investigacion personal.

⁴ Parti Num. 1: A reduci duracion di e lesamento di Bijbel na tres minuut of menos y lo cubri menos informacion. E ruman homber cu haya e parti aki mester train e lesamento varios biaha na bos halto y presta atencion na pronunciacion corecto y fluidez. Tur testigo di Jehova mester haci esfuerso pa lesa bon, ya cu lesamento ta un parti importante di nos adoracion. Nos ta contento cu hopi di nos muchanan ta lesa bon! Y nos ta elogia e mayornan cu ta haci esfuerso pa yuda nan yiunan bira bon lesador.

⁵ Parti Num. 2: E parti aki ta cinco minuut y lo asigna esaki na un ruman muher. E ruman mester uza e tema asigna. Ora e parti ta basa riba e foyeto Kico Nos Por Siña, e studiante mester uza un aspecto di sirbishi cu ta realistico y tambe practico pa e teritorio di e congregacion local. Ora e ta basa riba un personahe biblico for di e buki Perspicacia, e studiante mester studia e informacion, scoge e textonan di Bijbel cu e ta haya apropia y mustra kico nos por siña for di e ehempel di e personahe ey. Tambe e por inclui otro texto di Bijbel cu ta relaciona cu e tema. E superintendente di scol ta asigna un ayudante.

⁶ Parti Num. 3: E parti aki ta cinco minuut y por asign’e na un ruman homber of ruman muher. Si asigna e parti aki na un ruman muher, e mester sigui e instruccionnan di Parti Num. 2. Si asign’e na un ruman homber, y si e informacion ta basa riba un personahe biblico for di e buki Perspicacia, e ruman mester duna un discurso dirigi na esnan presente. E studiante mester trata e tema, uzando textonan di Bijbel cu e ta haya apropia y e mester mustra kico nos por siña for di e ehempel di e personahe biblico.

⁷ Un Manera Nobo pa Ruman Homber Duna Parti Num. 3: Den caso cu un ruman homber haya un di e partinan cu tin strea (*), e mester uza como su marco di circunstancia estudio di famia of sirbishi di veld. Por lo general, e superintendente di scol ta asigna un ayudante y e marco di circunstancia. E ayudante mester ta un miembro di famia di e studiante of un ruman homber di e congregacion. Por inclui den e parti tambe otro texto di Bijbel cu ta yuda resalta principionan biblico relaciona cu e tema. De bes en cuando, por asigna e parti aki na un anciano. E tin mag di scoge su ayudante y marco di circunstancia. Sin duda, lo ta animante pa e congregacion mira con ancianonan ta demostra e arte di siña cu un miembro di su famia of un ruman homber.

⁸ Conseho: Despues di cada parti, e superintendente di scol lo uza dos minuut pa anima e studiante y dun’e conseho util for di e buki Skol di Ministerio. Ora e superintendente di scol ta introduci un parti, e no ta menciona e punto di conseho cu e studiante tin cu traha ariba. Sinembargo, despues cu e studiante duna e parti, e superintendente di scol lo bis’e algun palabra di elogio y menciona e punto di conseho cu e mester a traha ariba. Ademas, lo e splica con e studiante a aplica e punto aki of mustra na un manera amabel dicon ta bon pa e studiante presta mas atencion riba dje.

⁹ E studiante por haya su formulario di conseho den e buki Skol di Ministerio na pagina 79 pa 81. Despues di reunion, e superintendente di scol lo haci anotacion den e buki di e studiante y puntr’e si el a haci e tarea relaciona cu e punto di conseho asigna. E por uza e momento ey of un otro momento apropia pa elogia e studiante y pa dun’e mas conseho util. Cada studiante mester mira cu e consehonan cu e superintendente di scol ta dun’e ta pa yud’e crece den sentido spiritual.—1 Tim. 4:15.

¹⁰ Si e studiante bay overtime, e superintendente di scol of su assistent mester duna un señal pa indica na un manera discreto cu e tempo a pasa, uzando por ehempel un bel of door di bati leve riba algo. E ora ey, e studiante mester termina su frase y baha for di plataforma.—Wak e buki Skol di Ministerio, pag. 282, par. 4.

¹¹ Nos ta anima tur persona cu ta cumpli cu e rekisitonan pa inscribi den e Scol di Ministerio Teocratico. (Wak e buki Skol di Ministerio, pag. 282, par. 6.) E scol aki ta prepara Jehova su sirbidornan pa predica y siña hende e bon noticia di Reino cu conviccion, dignidad y amor. Sin duda Jehova ta contento cu nos ta uza e instruccion teocratico cu nos ta haya pa alab’e.—Sal. 148:12, 13; Isa. 50:4.