Con pa Touch Curason di Hende Cu Ta Scucha Nos
1. Ki efecto loke Hesus a siña tabatin riba curason di hende cu a scuch’e?
1 Hesucristo a papia na un manera cu a touch curason di su oyentenan. Na por lo menos un ocasion e curason di Hesus su discipelnan tabata “manera na candela” despues cu el a splica nan e Scritura na placa chikito. (Luc. 24:32) Obediencia na Dios mester ta di curason. Pesey, con nos por touch curason di hende cu ta scucha nos y asina anima nan pa haci cambio den nan bida?—Rom. 6:17.
2. Si nos kier touch curason di hende, dicon nos tin cu uza tacto y mustra comprension?
2 Mustra Tacto y Comprension: Pa mayoria di hende, djis bisa nan kico ta bon y kico ta malo lo no motiva nan pa haci cambio. Y ataca nan creencia cu boshi texto di Bijbel lo por hasta pone nan rechasa e mensahe. Pa motiva un persona, nos mester haya sa kico e ta kere y dicon e ta haci cierto cosnan. Pesey, nos tin cu uza tacto y haci pregunta apropia pa anim’e pa e expresa su mes. (Prov. 20:5) Anto ora nos haya sa kico e ta pensa, nos lo por scoge texto di Bijbel cu lo por touch su curason. Pesey, ta importante pa nos mustra interes personal y tene pasenshi. (Prov. 25:15) Corda tambe cu cada persona su progreso spiritual ta diferente. Pesey, duna e spirito santo di Jehova chens pa yud’e cambia su pensamento y conducta.—Mar. 4:26-29.
3. Con nos por yuda nos studiantenan cultiva bon cualidad?
3 Yuda Nan Cultiva Bon Cualidad: Nos por uza textonan cu ta demostra Jehova su amor y bondad pa yuda hende cu ta scucha nos cultiva bon cualidad. Nos por uza textonan manera Salmo 139:1 te cu 4 of Lucas 12:6 y 7 pa mustra nan cu Dios ta interesa den cada un di nos. Y ora nan cultiva aprecio di curason pa Jehova su bondad inmereci, nan amor p’e y nan devocion na dje lo crece. (Rom. 5:6-8; 1 Juan 4:19) Ademas, ora nan haya sa cu nan conducta por haci Jehova sea contento of tristo, nan lo kier haci cambio pa biba na un manera cu ta agrada y honra Jehova.—Sal. 78:40, 41; Prov. 23:15.
4. Ora di siña hende, con nos por mustra cu nos ta respeta nan derecho di scoge pa nan mes?
4 Jehova no ta obliga ningun hende pa obedece su mandamentonan. Mas bien, e ta mustra nan dicon ta sabi pa sigui su conseho. (Isa. 48:17, 18) Nos ta imita Jehova ora nos ta yuda hende yega na nan propio conclusion. Anto, ora un hende convence su mes cu e tin cu haci cambio den su bida, e cambionan ey lo ta mas duradero. (Rom. 12:2) Ademas, lo e hala mas cerca Jehova, esun cu ta “sondea, [of, examina] curason.”—Prov. 17:3.