Tuma e Profetanan Como Ehempel: Habacuk
1. Dicon nos por compronde loke profeta Habacuk a sinti?
1 Ora nos mira con maldad ta aumenta den e mundo rond di nos, ta facil pa nos sinti mescos cu Habacuk, kende a puntra Jehova: “Pakiko ... Abo mes ta tolerá e inhustisia ei?” (Hab. 1:3, BPK; 2 Tim. 3:1, 13) Si nos medita riba Habacuk su mensahe y su bon ehempel, nos ta ser fortaleci mientras nos ta spera riba Jehova su dia di huicio.—2 Ped. 3:7.
2. Con nos por demostra cu nos ta biba pa medio di fe mescos cu Habacuk?
2 Biba pa Medio di Fe: En bes cu Habacuk a lamenta di su situacion, el a keda alerta y activo den sentido spiritual. (Hab. 2:1) Jehova a sigur’e cu Su palabra lo cumpli net na tempo y cu “e husto lo biba pa medio di su fe.” (Hab. 2:2-4) Kico esaki ta nifica pa cristiannan cu ta biba den e ultimo dianan di e tempo di fin? Ta bon pa sa na ki tempo e fin lo bin. Pero mas importante ainda ta pa nos ta convenci cu e fin ta bin. Nos fe por motiva nos pa keda alerta y duna prioridad na nos sirbishi.—Heb. 10:38, 39.
3. Dicon nos tin cu sigui sirbi Jehova cu goso?
3 Sirbi Jehova cu Goso: Ora Gog di Magog ataca e pueblo di Jehova, nos fe lo ser poni na prueba. (Eze. 38:2, 10-12) Ora tin guera cosnan ta bira dificil, hasta pa esun cu sali victorioso. Hende por perde propiedad, por tin scarsedad di cuminda y calidad di bida por baha. Con nos lo reacciona ora e dificultadnan ey presenta? Habacuk tabata sa cu cosnan lo a bira dificil, pesey e tabata determina pa mantene su goso den su sirbishi na Jehova. (Hab. 3:16-19) “E goso” di Jehova lo yuda nos tambe wanta e pruebanan cu ta na caminda.—Neh. 8:10; Heb. 12:2.
4. Ki privilegio nos por disfruta di dje tanto awor como den futuro?
4 Jehova lo sigui siña hende cu sobrevivi e dia di huicio. (Hab. 2:14) Esnan cu lanta for di morto tambe lo siña tocante Jehova. Laga nos ta determina for di awor pa uza tur oportunidad cu presenta pa papia di Jehova y su obranan maraviyoso.—Sal. 34:1; 71:17.