Nos Por Haya Bendicion di Dios pa Semper

Dios a priminti Profeta Abraham cu un di su descendientenan lo trece bendicion pa “tur e nacionnan di e Tera.” (Genesis 22:18) Ta ken e descendiente aki a resulta di ta?

Casi 2.000 aña pasa, Dios a duna Hesus, kende ta un descendiente di Abraham, poder pa haci hopi milager impresionante. E milagernan aki a indica cu e promesa cu Dios a haci na Abraham lo cumpli mediante Hesus.—Galationan 3: 14.

E milagernan cu Hesus a haci a yuda identific’e como esun cu Dios a scoge pa bendiciona humanidad. Ademas, e milagernan ey a demostra con Dios lo uza Hesus pa bendiciona humanidad pa semper den futuro. Ban wak con e milagernan cu Hesus a haci ta laga nos mira su bunita cualidadnan.

Ternura—Hesus a cura hende malo.

Un biaha, un leproso a suplica Hesus pa cur’e. Hesus a mishi cu ne y a contest’e: “Mi kier.” Y mesora e lepra a kita for di dje.—Marco 1:40-42.

Generosidad—Hesus a percura cuminda pa  hende cu tin hamber.

Hesus no tabata kier pa hende pasa hamber. Na mas cu un ocasion, el a haci milager pa alimenta miles di hende cu solamente algun pida pan y pisca chikito. (Mateo 14:17-21; 15:32-38) Despues di a come, tur hende a keda satisfecho y ainda a resta hopi cuminda.

Compasion—Hesus a resucita hende cu a muri.

Un viuda, kende no tabatin niun hende mas pa cuid’e, a perde su unico yiu homber. Hesus “a haya duele di dje” y a resucita su yiu.—Lucas 7:12-15.