Dicon Dios No Ta Contesta Tur Oracion?

Jehova Dios, nos Tata celestial, ta cla pa tende nos oracionnan. Pero Dios no ta scucha tur oracion. Dicon no? Y kico nos mester tene na mente ora nos ta haci oracion? Wak kico Bijbel ta bisa.

Un grupo di hende na misa ta ripiti un oracion for di un buki.

“Ora bo ta haci oracion, no keda ripiti e mesun palabranan.”—Mateo 6:7.

Jehova no kier pa nos siña un oracion fo’i cabes y ta keda ripitie. E kier pa nos papia cu ne di curason. Con lo bo sinti si un amigo ta ripiti e mesun palabranan tur ora bay? Lo bo sinti bon? Probablemente cu no, pasobra bon amigonan ta papia cu otro na un manera sincero y habri. Ora nos resa na nos Tata den cielo cu nos propio palabra, nos ta mustr’e cu e ta nos amigo.

Un meneer ta raspa su carchi di raspa y ta wak na halto.

“Ora boso pidi, boso no ta haya, pasobra boso ta pidi cu mal intencion.”—Santiago 4:3.

Nos no por spera cu Dios ta bay scucha nos oracion si nos ta pidi pa algo cu e no ta di acuerdo cu ne. Ban wak un ehempel. Bo ta kere cu Dios lo contesta un oracion di un hende cu ta pidi Dios den oracion pa e gana, por ehempel, catochi? Dios a bisa claramente pa nos no ta golos y pa no kere den “suerte.” (Isaias 65:11, BPK; Lucas 12:15) Claramente nos no por spera cu Dios ta bay contesta e oracionnan ey. Pues pa Dios scucha nos oracion, e mester ta di acuerdo cu loke Bijbel ta siña.

Un pastoor ta resa pa un grupo di soldaat.

“Si kualke hende sera orea pa lei, asta su orashonnan ta detestabel.”—Proverbionan 28:9, BPK.

Den tempo di Bijbel, Dios no tabata contesta oracion di esnan cu tabata desobedece su ley. (Isaias 1:15, 16) Dios no a cambia. (Malakias 3:6) Si nos kier pa Dios contesta nos oracionnan, nos mester obedece su leynan. Kico si den pasado b’a haci algo malo? Dios lo scucha bo oracion? Claro cu si! Dios ta cla pa pordona nos si nos arepenti y haci nos best pa agrad’e.—Echonan 3:19.