Nos A Dicidi di Biba Mas Simpel

Madian cu Marcela tabatin un bida comodo na Medellin, Colombia. Madian tabatin un trabou cu tabata paga bon. Pesey, nan por a biba den un cas comodo. Pero algo a motiva nan pa pensa tocante nan sirbishi na Jehova Dios y nan prioridadnan. Nan a splica: “Na aña 2006, nos a asisti na e dia special di asamblea cu tabatin como tema: ‘Mantene Bo Wowo Simpel.’ Hopi di e discursonan a enfatisa e importancia di simplifica nos bida pa nos por haci mas den sirbishi na Jehova. Bayendo cas, despues di e asamblea, nos a realisa cu nos tabata haciendo net contrario. Nos tabata cumpra cos pa loco y nos tabatin un debe grandi pa paga.”

E asamblea ey a pone nan reflexiona y despues di esey Madian cu Marcela a cuminsa simplifica nan bida. Esaki ta loke nan a bisa: “Nos a cuminsa baha nos gastonan. Nos a muda pa un apartamento mas chikito; nos a bende nos auto y nos a cumpra un motorcycle.” Ademas, nan a stop di bay e centronan comercial pa nan no cay den tentacion di cumpra mas cos. Nan a cuminsa dedica mas tempo papiando cu hende tocante Bijbel. Anto, nan a cuminsa anda cu ruman cu tabata pionero special, ruman cu tabata hopi ocupa den sirbishi na Jehova Dios.a

Poco despues, Madian cu Marcela a dicidi di haci hasta mas den nan sirbishi na Jehova. Nan a muda bay un congregacion chikito pafo di stad cu tabatin mester di yudansa. Pa nan por a muda, Madian mester a kita for di su trabou. Su supervisor no por a compronde dicon el a kita siendo cu e tin asina un bon trabou. Madian a puntra su supervisor: “Señora ta gana hopi placa, pero señora ta feliz?” Su supervisor a admiti cu e no tabata feliz. E tabatin hopi problema y e no tabata sa con pa resolve nan. Anto Madian a bis’e: “Pues, realmente, no ta importante cuanto placa bo ta gana. Loke ta importante ta loke realmente ta haci bo feliz. Siña hende tocante Dios ta haci ami y mi casa masha feliz. Anto, nos kier bira hasta mas feliz. Pesey, nos kier dedica mas tempo haciendo e trabou aki.”

Madian cu Marcela ta masha feliz pasobra pa nan, sirbi Dios ta e cos mas importante den nan bida. E ultimo 13 añanan, nan a sirbi den varios congregacion na e parti noordwest na Colombia caminda tin mas necesidad di predicador. Actualmente, nan tin e privilegio di sirbi como pionero special.