Testigonan di Jehova Ta Predica Djis pa Haya Salbacion?

No. Regularmente nos ta bay predica di cas pa cas, pero nos no ta kere cu nos lo haya salbacion door di predica. (Efesionan 2:8) Dicon no?

Pensa un rato riba e comparacion aki: Imagina cu un homber generoso a priminti cu e ta bay duna un regalo valioso na tur hende cu bin na un cierto luga riba un cierto dia. Si di berdad bo ta kere e homber su promesa, sigur lo bo sigui su instruccion. No esey so, bo lo conta bo famia y amigonan pa nan tambe por probecha di e oportunidad. Asina mes, no ta pasobra bo a sigui e homber su instruccionnan bo a merece e regalo. Bo a hay’e door di su generosidad.

Asina tambe como testigonan di Jehova, nos ta kere den Dios su promesa di bida eterno pa tur esnan cu obedec’e. (Romanonan 6:23) Nos ta desea cu otro hende tambe por beneficia di Dios su promesanan, pesey nos ta haci esfuerso pa predica na tur hende. Pero nos no ta pensa cu nos merece salbacion pasobra nos ta predica. (Romanonan 1:17; 3:28) En realidad, no tin nada cu un hende por haci pa merece un bendicion asina special di Dios. “El a salba nos, no a base di obranan cu nos a haci den husticia, ma segun su misericordia.”—Tito 3:5, Beibel Santu.