“Mi Ta Haci Tur Loke Mi Por”

Irma tin casi 90 aña di edad y ta biba na Alemania. Despues di dos accidente grave y varios operacion, e no por a predica mas di cas pa cas manera e tabata haci prome. Awor, Irma ta skirbi carta pa papia cu su famia y conocinan tocante su fe. E hendenan cu ricibi un carta di animacion of di condolencia ta aprecia esey masha y pesey nan ta yam’e pa puntr’e ki dia nan lo haya e siguiente carta. Irma ta haya hopi carta di gradicimento tambe den cua nan ta pidie pa manda nan mas carta. Irma ta bisa: “Esey ta haci mi masha contento y ta yuda mi keda spiritualmente activo.”

Irma ta manda carta pa hende den cas di cuido tambe. E ta conta: “Un señora di edad avansa a yama mi bisa mi cu e carta cu mi a mand’e, despues cu su casa a muri, tabata un consuelo p’e. E señora ta warda e carta den su Bijbel y, hopi biaha, e ta bolbe les’e anochi. Un otro señora, kende su casa tambe a muri recientemente, a bisa cu e carta a yud’e mas cu e sermon di e pastoor. E tabatin hopi pregunta, pesey el a pidi mi si e por a bishita mi.”

Un conoci di Irma cu no ta testigo a muda bay biba leu y a pidi Irma pa skirbie carta. Irma a bisa: “E señora a warda tur e cartanan cu mi a skirbie. Despues cu e señora a muri, su yiu muher a yama mi. El a bisa mi cu el a lesa tur e cartanan cu mi a skirbi su mama y a pidi mi pa skirbi carta tocante Bijbel p’e tambe.”

Irma ta gusta predica pa medio di carta. El a bisa: “Mi ta roga Jehova pa sigui duna mi forsa pa sirbie. Aunke mi no por bay di cas pa cas mas, mi ta haci tur loke mi por.”