Esnan Cu Tin Mas Ta Yuda Esnan Cu Tin Menos

Testigonan di Jehova ta haci actividad religioso y humanitario den mas cu 200 pais. Pero ta 35 di e paisnan aki so ta haya suficiente donacion pa cubri nan gastonan. Con e paisnan di menos recurso ta logra cubri nan gastonan?

Cuerpo Gobernante di testigonan di Jehova ta analisa kico e Testigonan rond mundo tin mester pa adora Jehova y pa predica e bon noticia. Nan ta haci sigur cu nan ta maneha y uza e donacionnan bon. Si un sucursal haya mas donacion cu e tin mester pa percura pa actividad local, e ta haci e fondonan ey disponibel pa e paisnan cu tin menos recurso. Di e manera aki, nan ta sigui ehempel di e prome cristiannan cu a yuda otro y “asina trece un balansa.” (2 Corintionan 8:14) Nan a uza loke nan tabatin di mas pa yena e necesidad di otro cristian cu tabatin menos.

Con e rumannan cu a ricibi contribucion for di e sucursalnan cu tin mas ta sinti? Por ehempel, na Tanzania, mas cu mitar di e poblacion ta biba cu menos cu dos dollar pa dia. Nan a uza e fondonan ey pa renoba e Salon di Reino di congregacion Mafinga. E congregacion a skirbi: “Despues di e renobacion, hopi mas hende ta asisti na nos reunionnan! Nos ta hopi agradecido na e organisacion di Jehova y e hermandad mundial pa nan generosidad, cu a haci posibel cu nos por tin un bunita luga di adoracion.”

Debi na e pandemia di COVID-19, algun ruman na Sri Lanka no tabatin suficiente cuminda. Entre nan tabatin Imara Fernando y su yiu homber chikito, Enosh. Pero, danki na e contribucionnan for di otro pais, nan a haya e yudansa cu nan tabatin mester. Den un carchi cu nan mes a traha, nan a skirbi: “Nos ta gradici nos rumannan cu a mustra amor na nos durante e temponan dificil aki. Nos ta masha contento di forma parti di e famia aki, y nos ta sigui haci oracion pa Jehova yuda tur nos rumannan den e ultimo dianan aki.”

Sin importa unda nos rumannan ta biba, nan ta sinti nan motiva pa comparti loke nan tin. Por ehempel, Enosh, a traha su mes caha chikito di contribucion pa asina e tambe por contribui y yuda e famianan den necesidad. Guadalupe Alvarez tambe ta masha generoso. E ta biba na un parti di Mexico caminda mayoria hende no tin un entrada regular y algun so ta haya un salario minimo. Toch, e ta duna loke e por. El a skirbi: “Mi ta agradecido pa Jehova su bondad y amor. Mi sa cu mi contribucion lo bay hunto cu e donacionnan di otro hende y lo yuda mi rumannan cu ta den necesidad.”

E sucursalnan cu ta manda placa ta masha contento cu nan por yuda e paisnan cu tin mas necesidad. Anthony Carvalho, cu ta sirbi den e Comite di Sucursal na Brazil, a bisa: “Pa hopi aña, e obra den nos pais tabatin mester di yudansa financiero di otro pais. Danki na e apoyo aki, nos a mira un crecemento grandi. Awor, nos situacion financiero a mehora, y nos tin e privilegio di yuda otro hende. E rumannan na Brazil ta consciente cu e trabou di predica ta un obra mundial y ta wak cu nan por duna di nan mes como bon discipel di Hesus.

Cua ta e mihor manera pa testigonan di Jehova yuda nan rumannan den necesidad? No door di manda placa directamente na e sucursalnan di otro pais, sino door di contribui na e obra mundial. Por haci esaki via e caha di contribucion di congregacion marca “Obra Mundial” of via donate.jw.org. Tur e donacionnan aki ta ser aprecia masha.