E Diferente Tareanan di un Mama

4:50 a.m. Alex, (e baby yorando y mita na soño) ta subi e banda di cama caminda Helen, su mama, ta. Helen su casa Nick y e otro dos yiunan, Penny di 5 aña cu Joanna di 12, ta drumi. Helen ta hisa Alex riba cama y ta dun’e pecho. Awor e mes no por bai drumi mas.

5:45 a.m. Helen ta cana keto keto bai den cushina, traha cofi, y lesa.

6:⁠15–​7:20 a.m. Nick ta lanta. Helen ta lanta Penny cu Joanna for di soño, ta prepara desayuno y haci algun trabou di cas. Ora tin 7:15, Nick ta sali pa bai trabou y ta pasa baha Joanna na scol. Helen su mama ta yega pa babysit Alex.

7:30 a.m. Helen ta baha Penny na kleuterschool. Riba caminda pa trabou Helen ta haya chens pa pensa riba loke ser mama ta encera. E ta bisa: “E ta e trabou di mas dificil cu mi a yega di tin.”

8:10 a.m. Ora Helen yega trabou e ta hay’e cu masha hopi cos di haci. E tin miedo di sali na estado atrobe pasobra esei lo por nifica cu e ta perde su trabou. Y su famia mester di e entrada extra.

10:⁠43 a.m. Despues cu Helen cera e telefon (un yamada tocante su yiunan), Nancy su colega di trabou ta consol’e bisando: “Bo ta haciendo un bon trabou como mama.” Lagrimanan ta basha for di Helen su wowo.

12:⁠05 p.m. Tanten cu Helen ta come un sandwich pura pura, e ta reflexiona riba e tempo prome cu su yiu mohe a nace. E tempo ei e tawata plania cosnan pa e haci den su tempo “liber.” ‘Esta kiboca mi tawata!’ e ta conclui.

3:10 p.m. Despues di varios yamada di telefon tocante e cosnan pret cu Alex a haci, Helen ta menciona cu e tin un relacion special cu su yiunan: “Nunca mi a yega di sinti e amor aki pa ningun otro hende.” Ta e sintimentonan profundo aki a yud’e vence e problemanan inespera cu el a hay’e cu ne na principio.

5:10 p.m. Despues cu e caba di busca Joanna, Helen ta haci algun diligencia. E ta yama Nick na telefon pa cord’e cu ta su beurt pa pasa busca Penny for di scol.

6:⁠00–​7:30 p.m. Ora Helen yega cas bek, Wela por bai cas. Anto Helen ta sigui cuida Alex y haci trabou di cas, y prepara cuminda. Ora nan a puntr’e kico cuida un baby ta encera, Helen a suspira bisando: “Un baby kier tur cos di su mama: su brasanan, curpa, lechi y asta e ta pon’e perde soño.”

8:⁠30–​10:⁠00 p.m. Helen ta yuda Joanna cu huiswerk y ta duna Alex pecho. Mientras Nick ta lesa un mei ora asina pa Penny, Helen ta haci algun trabou di cas mas.

11:⁠15 p.m. Despues cu Penny cu Joanna a bai drumi, Alex ainda ta lanta den brasa di su mama, pero finalmente e ta pega soño. “Mi ta kere cu awor e por bai drumi den su cama”, Helen ta bisa Nick, kende ta mita na soño caba.