Consuelo pa Esnan Cu Ta Yora

E ATAKE terorista cu a tuma luga dia 11 di september 2001 na New York City y Washington, D.C., a shock hende na tur parti di mundo. Riba un solo dia, miles di hende a muri, entre nan cientos di bombero, polis y paramedico balente.

For di dia di e suceso ei, Testigonan di Yehova a haci un esfuerso uni pa consola esnan cu a perde sernan keri den e tragedia. Nan a haci esaki afin di “cura hende di curason kibra” y “pa consola tur esnan cu ta yora.”—Isaias 61:1, 2.

Atraves di añanan, Testigonan di Yehova a ripara cu hende cu perde un ser keri hopi bes ta pensa riba e preguntanan cu ta sigui akibou. Bijbel tin contesta pa nan. Pakico bo no ta busca e textonan biblico menciona aki bou den bo mes Bijbel?

Morto di un persona ta predestina?

Na Eclesiastes 9:11, Bijbel ta declara cu “tempo y suerte” ta alcansa tur hende. Si ta berdad cu morto ta predestina, dicon Bijbel ta anima nos pa tuma medidanan di precaucion anto?—Por ehempel, wak Deuteronomio 22:8.

Dicon nos ta muri?

Dios a pone e prome pareha humano, Adam cu Eva, den un paradijs riba tera. Si nan a keda obediente, nan lo no a muri. Solamente si hende a desobedece Dios nan lo a muri. (Genesis 1:28; 2:15-17) Lamentablemente, Adam cu Eva a desobedece nan Creador. Como resultado, nan a haya e castigo: morto. Siendo cu tur hende a bini for di Adam cu Eva, nan tur a hereda pica y morto. Bijbel ta splica: “Door di un hende [Adam] pica a drenta den mundo, y morto door di pica, y asina morto a pasa pa tur hende.”—Romanonan 5:12.

Den ki condicion e mortonan ta?

Despues cu Adam a rebeldia, Dios a bisa: “[Lo] bo bolbe na tera, pasobra for di dje bo a wordo tuma; pasobra stof bo ta, y na stof lo bo bolbe.” (Genesis 3:19) Pues, morto ta un condicion totalmente inconciente, miho bisa, di inexistencia. Bijbel ta declara: “E bibonan sa cu nan lo muri, ma e mortonan no sa nada.” (Eclesiastes 9:5) Tambe Bijbel ta bisa cu ora un persona muri, “e ta bolbe na tera; e mes dia ei su pensamentonan ta perece.”—Salmo 146:3, 4.

Nos no tin un alma cu ta keda na bida ora nos muri?

Bijbel ta siña bon cla cu bo alma ta simplemente bo mes, no un of otro entidad abstracto cu lo keda na bida ora bo muri. (Genesis 2:7, NW; Proverbionan 2:10; Yeremias 2:34, NW) Siendo cu esei ta e caso, nos por bisa cu ora un persona muri, un alma a muri. Bijbel ta bisa bon cla: “E alma [es decir, e persona] cu peca lo muri.”—Ezekiel 18:4.

Ki speransa tin pa esnan cu a muri?

Bijbel ta revela cu Dios su proposito ta pa lanta e mortonan mediante un resureccion pa nan biba riba e tera transforma den un paradijs, caminda lo no tin malesa ni morto mas. Hesus a bisa: “E ora lo yega den cual tur cu ta den graf lo tende su bos, y lo sali.”—Huan 5:28, 29; Revelacion 21:1-4.

Ora Hesus a papia di su amigo Lazaro cu a caba di muri, el a compara morto cu soño. (Huan 11:11-13) Ademas, despues cu Hesus a resucit’e, Lazaro no a bisa ningun ora so cu el a bai na un luga di tormento ni na un luga di felicidad durante e periodo breve di su morto. (Huan 11:37-44) Esaki ta logico, pasobra e mortonan ta inconciente. Nan no ta sufriendo, sino ta wardando riba e “ora” cu lo lanta nan. Mas importante ainda, e echo cu Hesus a resucita Lazaro ta mustra cu e mortonan por biba atrobe. Si, cu e milager aki Hesus a demostra na un escala chikito kico lo tuma luga riba tera bou di gobernacion di e Reino di Dios. (Echonan 24:15) Ki un consuelo esei ta pa esnan cu tin ser keri cu a muri durante e tempo turbulento aki!