For di Nos Lectornan
Curashi na Momento di Desaster Masha danki pa e serie cu e portada “Curashi na Momento di Desaster—E Dia Cu Twin Towers A Basha Abou.” (8 di januari 2002) E articulonan aki a conmove mi masha hopi, y nan a pone mi realisa cu tempo y suseso imprevisto por afecta nos tur. Mi ta sinti masha duele ora mi pensa riba tur e bidanan cu a bai perdi.
S.B.R., Dinamarca
Danki pa publica “E Oracion di Tatiana.” For di ora mi tawata lesa e serie di articulo mi tawata yora caba, pero ora mi a lesa e parti ei, mi a grita yora. Mi kier resa pa crecemento spiritual di e muchanan cu a perde un mayor den e atake terorista ya nan por topa otro atrobe den e mundo nobo. Tambe, e articulo aki a pone mi aprecia mas tanto ainda e echo cu como un Testigo di Yehova, mi tin un speransa briyante pa futuro.
T. A., Hapon
Maske ta na Alemania mi ta biba, e susesonan di 11 di september tawata un shock pa mi y mi famia. Tres luna despues, ainda mi yiu mohe di nuebe aña tawata pinta avion cu ta dal den un edificio halto. Nos ta spera cu anhelo riba e dia cu tragedianan asina lo no existi mas.
E. G., Alemania
Ora mi a mira loke a pasa na New York, mi a resa na Yehova y a pidie duna forsa na e sobrevivientenan y speransa na famia di e victimanan. Ora mi a lesa e articulonan aki, mi a mira con Yehova a scucha mi oracion y tambe e oracion di hopi hende mas. E susesonan aki a haci mi conciente cu un tragedia por tuma luga na cualkier momento, y esei a pone mi reevalua mi bida.
M. V., Italia
Nos a aprecia specialmente e comentarionan di hende cu a experencia personalmente loke a pasa. E declaracionnan di e sobrevivientenan a pone nos wowo yena cu awa. Nos ta pidi Yehova yuda tur esnan cu ta sufri y ta spera cu via Spierta! nan lo por haya consuelo. Como cu nos ta jong, e preguntanan a anima nos pa pensa riba nos bida y riba nos prioridadnan. Nos kier pa boso sigui publica e revista aki pa semper.
T. M. y A. P., Slovenia
Mi tin 14 aña y ta den klas 3 di scol secundario. Ora mi a lesa e serie aki, mi a bin comprende e miedo cu a compaña e suseso. Mi a mira con hende a sacrifica nan bida pa salba otronan. Mi a tende na noticia cu hopi bombero a perde nan bida, pero nunca mi no a sintie asina personal manera ora mi a lesa e articulonan. Mi a yora ora mi a lesa e parti “E Oracion di Tatiana.” Mi tambe a perde mi tata, debi na malesa, ora mi tawata den e prome klas di scol secundario. E parti di Tatiana a pone mi puntra mi mes: ‘Mi ta mira e mundo nobo como algo asina real, manera Tatiana ta mir’e?’ Mi kier duna mi maestronan na scol y hopi di mi amiganan e revista aki. Por fabor, sigui publica e revistanan maravioso aki!
H. T., Hapon
Diseño Nobo Ta un placer pa mira con e aparencia di Spierta! a drecha for di tempo cu mi a cuminsa lesa e revista na 1978. Ora mi a analisa e edicion di 8 di januari 2002, e paginanan realmente a capta mi atencion. E titulo di e articulonan ta destaca, y e plachinan ta impresionante. E diseño di e articulonan ta haci e lesamento asta mas dushi ainda. Mi tin sigur cu e look nobo aki lo atrae hopi mas hende sinsero na Yehova.
V.P.L., Brasil