Dios Tin Nomber!

Kico ta Dios su nomber? Tur hende tin un nomber personal. Hopi hende asta ta duna nan bestia di cas nomber! Lo no ta rasonabel anto cu Dios tambe tin nomber? Un cos ta sigur, un parti masha importante di hende su relacion y trato cu otro ta e echo cu cada hende tin un nomber personal y cu e ta wordo uza. Acaso esei lo mester ta diferente pa loke ta nos relacion cu Dios? Contrario na loke kisas bo ta verwacht, miyones di hende cu ta pretende cu nan tin fe den e Dios di Bijbel no ta uza su nomber personal. Y toch, Dios su nomber ta conoci pa siglonan. Segun cu bo ta lesa e serie di articulo aki, lo bo haya sa di temponan di antes ora cu hende tawata uza Dios su nomber ampliamente. Mas importante, lo bo haya sa kico Bijbel ta bisa tocante siña conoce Dios pa nomber.

YA PA siglo 17, varios pais Europeo tawata traha moneda cu e nomber di Dios ariba. Un moneda Aleman traha na aña 1634 tawatin e nomber Yehova prominentemente riba dje. E monedanan ei a bira popularmente conoci como Jehovah talers, es decir, monedanan di Yehova, y tawata den circulacion pa hopi decada.

Yehova,a ta un traduccion di e nomber di Dios cu hende a reconoce pa siglonan. Na Hebreo, un idioma cu hende ta lesa di banda drechi bai banda robes, e nomber ta aparece como cuater consonante, יהוה. E cuater letternan Hebreo aki—gespel den nos alfabet como YHWH—ta conoci como e Tetragramaton. Pa hopi decada, nan a graba e nomber di Dios den e forma aki tambe di Tetragramaton riba monedanan Europeo.

Tambe nos por haya e nomber di Dios riba edificio-, monumento- y obranan di arte y den hopi cantica di misa. Segun e enciclopedia Aleman Brockhaus, un tempo prinsnan protestant tawatin e custumber di bisti un emblema cu a consisti di un diseño di solo cu e Tetragramaton. E simbolo aki, cu nan a uza tambe riba bandera y moneda, tawata conoci como e emblema di Yehova-Solo. Pues ta bisto anto cu e Europeonan sumamente religioso di siglo 17 y 18 tawata sa cu Dios Todopoderoso tawatin un nomber. Loke ta mas importante ainda ta cu nan no tawatin miedo di uz’e.

E nomber di Dios no tawata un misterio tampoco na Merca den su era colonial. Tuma por ehempel, Ethan Allen, un solda di e Revolucion Mericano. Segun su autobiografia, na aña 1775 el a exigi di su enemigonan pa entrega nan mes “den nomber di e Gran Yehova.” Despues, durante presidencia di Abraham Lincoln, varios consehero a menciona Yehova su nomber cu frecuencia den nan cartanan dirigi na Lincoln. Den hopi biblioteca tambe bo ta haya otro documentonan historico di Merca cu ta contene e nomber di Dios y cu publico por wak libremente. Esakinan ta djis un par di ehempel cu ta mustra con pa siglonan hende a duna prominencia na e nomber di Dios.

Kico djawe? Hende a lubida e nomber di Dios? Absolutamente cu no. Tin varios traduccion di Bijbel cu ta uza e nomber personal di Dios den hopi versiculo.b Un bishita cortico na un biblioteca of un par di minuut di investigacion den bo propio diccionarionan, probablemente lo revela cu e nomber Yehova ta ser acepta ampliamente como e ekivalente local di e Tetragramaton. Por ehempel, e Dikshonario Hulandes – Papiamentu di Sydney Joubert ta bisa bou di e entrada Jehova: “E nomber Hebreo di e Dios di Israel.” Un edicion resien di The New Encyclopædia Britannica ta splica cu Yehova ta e “nomber Hudiu-cristian pa Dios.”

Pero kisas bo ta puntra bo mes: ‘Hende ta interesa anto den Dios su nomber awe?’ Wel, ainda bo ta haya e nomber di Dios den varios forma na hopi luga publico. Por ehempel, e nomber Yehova ta graba riba e piedra di skina di un edificio na New York City. Den e mesun stad ei, bo ta haya e nomber tambe skirbi na Hebreo riba un mosaico colorido cu ta dorna un stacion di metro hopi druk. Sinembargo, ta probablemente berdad cu di e miles di personanan cu a cana pasa banda di e luganan aki, masha poco di nan lo a considera e inscripcionnan aki como importante.

E nomber di Dios ta importante pa hende caminda abo ta biba? Of mayoria di nan ta yama e Creador “Dios”, como si fuera e titulo aki ta su berdadero nomber? Podise bo mes a ripara cu hopi hende no ta pensa mes riba e asunto di si Dios tin nomber. Ke tal di abo? Bo ta sinti bo comodo pa yama Dios na su nomber personal, Yehova?

[Nota]

[Cuadro/Plachi na pagina 4]

Un Rei Cu A Haci e Nomber di Yehova Conoci

Na aña 1852 un grupo di misionero a biaha for di Hawai rumbo pa e islanan di Micronesia. Nan tawatin un carta di introduccion cu e seyo oficial di Rei Kamehameha III, cu e tempo ei tawata e monarca cu a goberna e Islanan di Hawai. E carta aki, originalmente skirbi na idioma Hawaiano y dirigi na varios gobernante di Islanan di Pacifico, a bisa en parte: “Tin algun maestro di e Dios Haltisimo, Yehova, cu ta a punto di sali rumbo pa boso islanan, pa laga boso conoce Su Palabra pa boso salbacion eterno. . . . Mi ta considera e bon maestronan aki digno di boso alto aprecio y amistad y ta anima boso masha hopi pa scucha nan instruccion. . . . Mi ta conseha boso pa benta boso idolonan afo, acepta e Señor Yehova como boso Dios, ador’e y stim’e y E lo bendiciona boso y salba boso.”

[Plachi]

Rei Kamehameha III

[Reconocemento]

Hawaii State Archives

[Plachi na pagina 3]

E Tetragramaton, cu ta nifica “cuater letter”, ta spel e nomber personal di Dios na Hebreo