Hobennan Sa Puntra . . .

Kico Si E Bisa No?

PROME bo tawata consider’e un amigo. Pero despues bo a cuminsa mir’e di otro manera. Podise tawata su bon manera of e manera cu e tawata smile cu bo ora e ta papia, a pone bo sinti bo atrai na dje. Sea cual sea e motibo, tempo a pasa y e no a mustra ningun interes romantico den bo. Pesei bo a dicidi di puntr’e si e ta interesa pa ta mas cu djis bo amigo. Pero pa bo gran desilusion, di un manera bondadoso pero toch firme, el a bisa no.a

Ta natural pa bo sinti bo gehurt. Pero domina bo sintimentonan; purba mira cosnan for di e perspectiva corecto. Si, un yoncuman a bisa cu e no ta interesa den un relacion romantico cu bo. Corda cu su decision no ta kita nada di bo dignidad como persona, ni e no ta nifica cu otro hende no ta stima bo y respeta bo mas. De echo, e decision di e yoncuman aki podise tin mas di aber cu su metanan y prioridadnan personal cu nan tin di aber cu bo.

Si bo ta un cristian, bo por corda tambe cu ‘Dios no ta inhusto pa lubida bo trabou y e amor cu bo a mustra pa su nomber.’ (Hebreonan 6:10) Sonjab a expres’e asina aki: “Bo ta keda cu bo balor. Como un persona soltero bo ta balioso pa Yehova.” Si pa e Haltisimo y otro hende bo ta di hopi balor, pakico bo tin cu perde respet pa bo mes?

Podise toch bo ta sinti cu un caminda bo a faya of bo tin miedo cu kisas lo bo no ta un bon hende pa casa cu ne. Pero no ta pasobra bo no tawata e persona “corecto” pa e yoncuman aki, bo no por ta “net esun corecto” pa un otro persona. (Huesnan 14:3) Pues, en bes di pensa cu bo a fracasa den bo intento pa haya un bon casa, bo tin cu realisa cu bo esfuersonan a logra un bon resultado: Bo a haya sa cu e yoncuman aki no ta pa bo. Dicon nos ta bisa esaki?

E Tawata Esun Corecto pa Bo?

Bijbel ta manda esposonan pa “stima nan esposa manera nan mes curpa.” (Efesionan 5:28) Tambe e ta manda esposonan ‘duna honor’ na nan esposa. (1 Pedro 3:7) Pues den e caso aki, por ta masha bon cu e yoncuman aki ta aprecia bo como amiga. Pero door di bisa no, basicamente el a mustra cu actualmente e no ta prepara pa stima bo ni honra bo como esposa. E tin derecho di tuma e decision ei. Pensa riba esaki: Si ta asina e ta sinti, lo e por ta realmente un bon esposo pa bo? Imagina bo con infelis lo bo tawata si bo a casa cu un persona cu no ta stima bo ni aprecia bo manera e Scritura ta manda!

Loke tambe lo por yuda bo, unabes cu bo speransa pa un enamoracion lo no bira realidad, ta di mira e yoncuman aki su accionnan for di un otro angulo. Tin bes enamoracion pasahero ta ciega hende y nan no ta mira deficiencianan personal y spiritual cu pa otro hende ta bisto. Por ehempel, e no tawata conciente cu bo sintimentonan p’e tawata birando mas profundo, of e tawata stimula bo sintimentonan concientemente door di asocia constantemente cu bo? Si ta e ultimo ei el a haci, esei lo no ta un indicacion cu e no ta cla pa ta un esposo cristian cu consideracion y cu sintimento? Si ta asina, ta bon cu bo a haya sa aunke esei por ta doloroso.

Marcia a cuminsa sinti algo pa un yoncuman ora cu esaki a cuminsa dun’e hopi atencion. Ora el a puntra e yoncuman kico tawata su intencion, esaki a bis’e cu e no tawata interesa den un relacion cu ne. Kico a yuda Marcia trata cu su desilusion? El a bisa: “E echo cu mi a bai tras di mi mente y no mi curason a yuda mi trata cu mi sintimentonan.” Cordando riba e rekisitonan cu Bijbel ta duna esposonan a yud’e realisa cu simplemente e yoncuman ei no tawata e esposo apropiado. Esaki a yud’e pasa over di su tristesa.

Andrea tawatin un experencia similar cu un yoncuman. Despues el a realisa cu e manera cu e yoncuman a trata cu ne a mustra cu esaki no tawata madura ainda. Cu tempo el a bin compronde cu e yoncuman no tawata cla pa casa, y e ta masha gradicido cu Yehova a habri su wowo pa e mira esei. El a bisa: “Mi ta kere cu Yehova por proteha bo for di circunstancianan cu por hurt bo pero bo tin cu confi’e si.” Claro cu den hopi caso un yoncuman ta comporta su mes bon y e ta bisa no pa un motibo valido. Sea cual sea e caso, con bo por trata cu e sintimentonan cu ta bin como resultado di esei?

Loke Bo Por Haci Tocante Bo Sintimentonan

Kisas bo curason tin mester di tempo pa acepta e echo cu el a bisa no. Bo cariño p’e a crece cu tempo, y ta tuma tempo tambe pa e mengua. Masha poco bes bo por elimina sintimentonan romantico manera bo ta paga un lus electrico. Tin dia cu e sintimentonan ei por ta hopi fuerte! Tene pasenshi cu bo mes. Segun cu tempo ta pasa e sintimentonan ei tambe ta mengua. Pero si bo kier pa e sintimentonan ei disparce mas lihe, evita di alimenta nan.

Por ehempel, evita di critica bo mes door di sinta repasa cada palabra y gesto cu bo a expresa ora bo a declara bo sintimentonan na e yoncuman. Si bo no domina e pensamentonan ei, lo bo cuminsa kere cu e no tawata kiermen echt no, of cu si bo purba acerc’e di un otro manera kisas e por acepta. Acepta e echo cu bo no por cambia su sintimentonan. Cu tur probabilidad, maske con bo a acerc’e, su contesta lo tawata mescos.

Soñamento lanta por ta un otro trampa. Bo ta crea un cuadro mental den cua boso dos ta biba felis pa semper. E fantasianan aki por parce di ta consola bo, pero nan no ta real. Ora nan termina, bo ta bolbe sinti bo bashi y cu un dolor inmenso. E ciclo aki di placer y despues un dolor insoportabel lo por sigui pa hopi tempo si bo no haci esfuerso pa stop e.

Haci esfuerso pa elimina e soñonan ei for di bo mente. Ora nan bin, lanta y cana un rato. Haci trabou fisico, algo cu ta pone bo pensa riba otro cos. Consentra riba cosnan cu ta edifica, no cosnan cu ta deprimi bo. (Filipensenan 4:8) Na principio esaki lo por ta dificil, pero cu tempo, lo bo gana e bataya y haya pas y trankilidad.

Apoyo di amigonan pega tambe por yuda. (Proverbionan 17:17) Sinembargo, Sonja ta duna e advertencia aki: “No ta bon pa tur bo amigonan ta personanan soltero, di e mesun edad, y deseoso pa casa. Bo tin mester di amigonan mas grandi tambe, cu por yuda bo mira cosnan den e perspectiva corecto.” Y corda, tin un persona cu por duna bo asta mas yudansa pa bo vence bo dolor.

Yehova—Un Amigo y Apoyo

Ora un homber fiel den tempo di antiguedad a hay’e cu decepcion, el a pidi Yehova den oracion pa yudansa. Kico tawata e resultado? El a skirbi: “Ki ora cu mi ta angustia y precupa, bo ta consola mi y haci mi contento.” (Salmo 94:19, Today’s English Version) Yehova lo consola y sostene abo tambe si bo eherce fe den dje y haci oracion na dje. Esei ta loke Andrea a haci. El a bisa: “Oracion ta masha importante pa yuda bo pasa over di e dolor y sigui padilanti.” Sonja tambe a bisa mescos di oracion: “E ta yuda bo haya un balor propio cu no ta depende di e echo cu si hende ta gusta bo of laga.”

Aunke ni un hende no por compronde bo sintimentonan plenamente, Yehova si ta compronde bo. El a crea hende cu e deseo pa stima y ser stima den matrimonio. E sa di e poder di atraccion romantico, y e sa con pa control’e. E por yuda bo vence dolor fuerte di curason, pasobra 1 Huan 3:20 ta bisa: “Dios ta mas grandi cu nos curason y sa tur cos.”

Keda Balansa

Aunke matrimonio por ta un fuente di gran felicidad, e no ta e unico fuente. Tur hende cu ta sirbi Yehova por ta felis, y no hende casa so. Den cierto sentido, hende soltero tin asta algun bentaha riba hende casa. Nan no ta sufri di e “tribulacion den e bida aki”, cu 1 Corintionan 7:28 ta menciona. E “tribulacion” aki ta referi na e stress y angustianan cu tur pareha casa ta haya nan cu ne. Tambe personanan soltero tin mas libertad y por uza nan bida mas facil den e sirbishi di Yehova. Pesei Bijbel ta siña: “Esun cu duna su birgen pa casa ta haci bon, ma esun cu no dun’e pa casa ta haci miho ainda.” (1 Corintionan 7:38) Asta si bo tin deseo fuerte pa casa, meditacion riba e siñansanan biblico aki por yuda bo keda balansa y saca lo maximo for di bo circunstancianan actual.

Algun amigo cu bon intencion lo por bisa bo: “No worry, lo yega e dia cu lo bo haya un persona magnifico.” Y ta berdad cu aunke un persona a rechasa bo, esei no ta nifica cu lo bo keda bo so pa semper. Apesar di tur cos, un mucha mohe cristian cu yama Candace ta rasona di e manera aki: “Mi tin confiansa den Yehova. Mi no ta spera cu e mester duna mi un esposo pa mi ta felis. Pero mi sa cu lo e duna mi loke mi tin mester pa yena e bashi ei.” E manera positivo di pensa aki a yud’e pasa over di e desilusion romantico cu el a hay’e cu ne.

Hopi bes e intentonan pa cuminsa un relacion amoroso den e mundo aki ta fracasa, pero esei ta e caso cu hopi matrimonio tambe. Si bo pone bo confiansa den Yehova y obedece su conseho, e por yuda bo remplasa desilusion cu goso. Bo por tin e mesun experencia cu Rei David, kende a skirbi: “Señor, tur mi deseo ta bo dilanti; y mi suspiro no ta scondi pa bo. Pasobra mi ta spera riba bo, o SEÑOR; abo lo contesta, o Señor mi Dios.”—Salmo 38:9, 15.

[Nota]

[Plachinan na pagina 14]

Probecha di e yudansa cu Dios ta percura