Con pa Haya e Caminda

BO TA SINTI CU BO TA FELIZ? Si ta asina, kico ta haci bo feliz? Bo famia, bo trabou of bo religion? Kisas bo ta sperando ansiosamente riba algo cu por haci bo feliz, manera por ehempel caba scol, haya un bon trabou of cumpra un auto nobo.

Hopi hende ta sinti un grado di felicidad ora nan logra un meta of ora nan haya algo cu nan tabata desea. Pero pa cuanto tempo e felicidad ey ta dura? Hopi biaha, e sintimento ey ta dura un poco tempo so y bo no ta keda satisfecho.

Un fuente ta describi felicidad como un estado placentero di animo cu ta relativamente permanente. E ta caracterisa pa emocionnan cu ta varia entre simplemente un sintimento di satisfaccion y un goso profundo den bida cu lo bo kier pa keda.

Ademas, como cu e ta un estado placentero di animo cu ta dura, a describi felicidad no como un destinacion of meta, sino como un biahe. Esey kiermen cu si un hende bisa, “Lo mi ta feliz ora mi haya esaki of haci esaya”, nunca lo e por ta feliz.

Pa nos compronde e asunto aki mas mihor, laga nos compara felicidad cu salud. Con nos por logra haya un bon salud? Wel, nos lo tin cu zorg pa come bon, haci ehercicio y hiba un estilo di bida saludabel. Asina tambe, bo por logra haya felicidad si bo sigui un bon caminda, esta door di aplica principionan practico den bo bida.

Ki principio- of cualidadnan por yuda bo logra haya felicidad? Aunke algun di nan ta mas importante cu otro, e siguiente lista ta hunga un rol masha importante:

• KEDA CONTENTO CU LOKE BO TIN Y SEA GENEROSO

• SALUD Y E CAPACIDAD DI SUPERA

• AMOR

• PORDONA

• PROPOSITO DEN BIDA

• SPERANSA

Un buki sumamente respeta ta bisa cu feliz “ta esnan cu nan caminda ta sin mancha.” (Salmo 119:1) Laga nos ban wak ta cua caminda esey ta.