Kico Ta Stress?

Stress ta un reaccion di e curpa humano na situacionnan hopi dificil. E celebro ta manda un gran cantidad di hormoon pa henter e curpa. E hormoonnan ta pone e curason bati mas duro, regula bo presion di sanger, pone bo hala rosea mas lihe y pone bo spiernan bira tenso. Prome cu bo realisa kico ta pasando, ya bo curpa a haci tur e cosnan ey pa prepara bo pa enfrenta e situacion dificil. Ora e situacion cu ta causa stress pasa, tur cos den bo curpa ta normalisa atrobe.

STRESS TIN SU BANDA BON Y SU BANDA MALO

Stress ta un reaccion normal di e curpa cu ta yuda bo enfrenta situacionnan peligroso of dificil. E proceso aki ta cuminsa den bo celebro. E bon di stress ta cu e ta yuda bo reacciona lihe. Ademas, un cierto grado di stress por yuda bo logra bo metanan of haci loke bo tin cu haci mas mihor, manera entre otro un examen, entrevista of deporte.

Pero di otro banda, demasiado stress pa un tempo mucho largo por causa bo daño. Si bo curpa constantemente tin cu prepara bo pa enfrenta situacion dificil, bo por sufri daño fisico, emocional y mental. Bo comportacion y bo manera di trata hende por cambia. Ademas, hende cu ta sufri di stress cronico hopi biaha ta cuminsa bebe di mas, droga, abusa di remedi, come di mas, huma, etcetera. Otro consecuencianan por ta tambe depresion, burnout of pensamentonan pa mata curpa.

Aunke stress no tin e mesun efecto riba tur hende, e por causa varios maleza y afecta casi tur parti di e curpa.