Ki Efecto Tecnologia Tin Riba Bo Capacidad Mental?

Constantemente hende mester siña, sea ta pa scol, trabou of otro motibo. Tecnologia por yuda nos den esey. Nunca prome den historia tabata asina facil pa haya asina tanto informacion sin cu bo tin cu sali for di bo cas of ni sikiera lanta for di bo stoel.

Sinembargo, hopi hende cu ta uza tecnologia demasiado a ripara lo siguiente:

Nan tin dificultad pa concentra ora nan ta lesa.
Nan ta ser distrai facilmente.
Masha lihe nan ta sinti nan laf ora nan ta nan so.

LOKE TA BON PA BO SA

Un mucha muher teenager ta haci yen di cos pareu. E ta manda mensahe riba su telefon, ta video call su amiga y ta uza su computer y un buki pa studia.

LESAMENTO

Hende cu ta uza aparatonan electronico hopi no sa tin pasenshi pa lesa henter un articulo of buki. Mas bien, nan ta pasa lihe lihe riba dje pa haya un idea general di loke nan ta lesa.

No ta malo pa lesa algo lihe lihe pa haya un contesta pa un pregunta den pura. Pero esaki no ta un bon manera pa lesa si bo kier compronde algo bon.

PENSA RIBA ESAKI: Bo tin pasenshi pa lesa articulonan largo? Dicon lo bo compronde mihor si bo tuma bo tempo pa lesa algo bon?—PROVERBIONAN 18:15.

CONCENTRACION

Algun hende ta purba di uza tecnologia pa haci dos cos pareu, por ehempel, manda mensahe pa nan amigonan mientras cu nan ta studia. Pero e ora ey nan no ta pone bon atencion na ningun di e dos cosnan cu nan ta haci, y nan lo no haci niun di nan bon, specialmente ora tur dos cos ta rekeri concentracion.

Ta berdad cu ta rekeri esfuerso pa concentra y evita distraccion, pero bo esfuerso lo ta bale la pena. Wak kico un hoben cu yama Grace a bisa: “Lo bo haci menos fout y lo bo haya menos stress. Mi a siña cu ta mihor pa concentra riba un cos y evita e distraccion cu ta bin ora bo haci yen di cos pareu.”

PENSA RIBA ESAKI: Tecnologia ta hacie mas dificil pa bo concentra y corda loke bo ta studia?—PROVERBIONAN 17:24.

ORA BO TA BO SO

Tin hende no gusta ta nan so y pesey nan ta uza tecnologia pa entretene nan mes. Un señora cu yama Olivia a admiti: “Mi ta sinti mi laf si mi keda 15 minuut sin wak mi telefon, tablet of television.”

Sinembargo, ora un persona ta su so e ta haya oportunidad pa pensa of medita. Y esey ta hopi importante ora un persona ta siña, sea e ta hoben of hende grandi.

PENSA RIBA ESAKI: Ora bo ta bo so, bo ta uza e tempo ey pa pensa?—1 TIMOTEO 4:15.

LOKE BO POR HACI

PENSA CON BO TA UZA TECNOLOGIA

Den ki manera tecnologia por yuda bo mehora bo capacidad mental? Con tecnologia por stroba bo di concentra y siña?

PRINCIPIO DI BIJBEL: “Retene sabiduria sano y discrecion [esta, capacidad di pensa].”—PROVERBIONAN 3:21.

PUNTRA BO MES . . .

Ora mi ta riba un aparato electronico ta dificil pa mi lesa un articulo largo? Si esey ta e caso, kico ta distrai mi mas?
Kico mi por haci pa limita of elimina e distraccionnan ey?

Sugerencia: Purba di lesa un paragraf prome, y despues tiki tiki bo ta lesa mas paragraf. Lesa na bos abou pa asina bo por concentra riba loke bo ta lesa.

Mi ta tuma suficiente tempo pa pensa riba loke mi a lesa?

Sugerencia: Uza e ultimo dies minuutnan di e tempo cu bo a aparta pa studia pa repasa loke bo a siña.

Ki ora mi ta sinti cu mi tin cu haci mas cos pareu?
Kico mi por haci pa logra concentra riba un cos so?

Sugerencia: Ora bo ta studia, warda tur cos cu por distrai bo pa asina bo por concentra riba loke bo ta lesa.

PRINCIPIO DI BIJBEL: “Adkiri sabiduria! Adkiri comprondemento!”—PROVERBIONAN 4:5.