UN MUNDO TURBULENTO

1 | Cuida Bo Salud

DICON E TA IMPORTANTE

Un crisis of desaster por afecta hende su salud sea directamente of indirectamente.

Ora hende tin cu trata cu situacion dificil, nan por haya stress, y si nan keda den stress pa un tempo largo, hopi bes nan ta bira malo.
Ora un crisis tuma luga, por ta dificil pa hospital duna bon cuido. Pasobra nan mester trata hopi hende malo pareu, y kisas nan no tin suficiente ekipo medico of remedi.
Ora un calamidad sosode, por bira dificil pa hende paga pa e cosnan cu nan echt tin mester di dje, manera cuminda y cuido medico.

Loke Ta Bon pa Bo Sa

Maleza serio y stress por pone bo tuma mal decision, loke por stroba bo di haci cos cu ta bon pa bo salud. Como resultado, bo por bira hasta mas malo.
Si bo neglisha un problema di salud, e por bira pio y e por hasta pone bo bida na peliger.
Mas mihor bo cuida bo salud, mas mihor prepara bo ta pa tuma bon decision ora un crisis of calamidad tuma luga.
Sin importa bo situacion economico, tin cos cu bo por haci pa cuida bo salud.

Loke Bo Por Haci Awor

Un persona sabi ta mira posibel peliger y ta haci tur loke e por pa evita nan. Esaki ta conta pa nos salud tambe. Hopi bes bo por baha bo chens di bira malo si bo mantene bon higiena y tene bo cas limpi. Preveni ta mihor cu cura.

“Door di mantene higiena personal y tene nos cas limpi, nos ta spaar placa na dokter y remedi.”—Andreas.a

a A cambia algun nomber den e revista aki.

LOKE BO POR HACI Algun Sugerencia Practico

Loke bo por haci pa cuida bo salud den tempo di crisis y calamidad

MANTENE BON HIGIENA

Mantene bon higiena

Bijbel ta bisa: “Un hende sabi ta mira peliger, y e ta evit’e.” (Proverbionan 22:3) Purba anticipa loke por pone bo salud na peliger y evita esey.

Laba man regularmente cu awa y habon, specialmente prome cu bo mishi cu cuminda of despues cu bo bay baño.
Limpia y desinfecta bo cas regularmente, specialmente superficie y obheto cu ta mishi cu ne hopi.
Ora cu ta posibel, mantene distancia fisico for di un persona cu tin un maleza contagioso.

COME CUMINDA SALUDABEL

Come cuminda saludabel

Bijbel ta bisa: “Ningun hende hamas a odia su mes curpa; ma e ta aliment’e y trat’e cu masha cariño.” (Efesionan 5:29) Nos ta mustra cu nos ta stima nos curpa ora nos tene cuenta cu loke por afecta nos salud.

Bebe hopi awa.
Come un variedad di fruta y berdura.
Limita e cantidad di salo, sucu y vet.
No uza tabaco ni droga y no bebe demasiado alcohol.

“Pa nos evita di bira malo, nos ta purba di come saludabel, sino nos lo gasta e tiki placa cu nos ta gana na dokter y remedi. Nos ta prefera di uza nos placa pa cumpra cuminda saludabel.”—Carlos.

HACI EHERCICIO Y SOSEGA SUFICIENTE

Haci ehercicio

Bijbel ta bisa: “Un poco sosiego ta mihor cu hopi trabou duro y coremento tras di biento.” (Eclesiastes 4:6) Nos mester traha, pero nos mester di suficiente sosiego tambe.

Keda fisicamente activo. Bo por cuminsa door di djis dal un cana regularmente. Si bo ta activo, bo por mehora bo salud hasta si bo ta di edad, tin un limitacion of un maleza cronico.
Sosega suficiente

Sosega suficiente. Si bo no sosega suficiente, bo por haya mas stress y problema di concentracion. Cu tempo, esey por hiba na problema serio di salud.
Pone un ora realistico pa bay drumi, y tene bo mes na dje. Purba di drumi y lanta na e mesun ora tur dia.
Evita di wak television of uza aparato electronico riba cama.
Evita cuminda pisa, cafeina y alcohol prome cu bo bay drumi.

“Mi ta haya cu mi drumimento ta afecta tur aspecto di mi salud. Si mi no drumi suficiente, tin biaha mi ta haya dolor di cabes, y mi curpa ta bira stijf. Pero ora mi drumi suficiente, mi ta sinti cu mi por trata cu kico cu presenta. Mi ta yen di energia, y mi ta bira malo hopi menos.”—Justin.