Dios A Test Abraham Su Fe

BO TA compronde kico Abraham ta haci ei? E tin un cuchiu, y ta parce cu e ta bai mata su yiu. Pakico? Prome, ban mira con Abraham cu Sara a haya un yiu.

No lubida, Dios a priminti nan cu nan lo haya un yiu. Pero, esei a parce imposibel, pasobra Abraham cu Sara tabata hopi bieu. Sinembargo, Abraham a kere cu Dios por haci loke ta parce imposibel. Pues, kico a sosode?

Despues cu Dios a duna e promesa, henter un aña a pasa. Anto ora Abraham tabatin 100 aña di edad y Sara tabatin 90, nan a haya un yiu homber cu nan a yama Isaak. Dios a cumpli cu su promesa!

Pero ora Isaak a bira mas grandi, Jehova a test e fe di Abraham. El a yama: ‘Abraham!’ Y Abraham a contesta: ‘At’ami aki!’ Anto Dios a bisa: ‘Tuma bo yiu, bo unico yiu, Isaak, y bai na e sero cu lo mi mustra bo. Mata bo yiu ei y ofrec’e como sacrificio.’

Ki tristo e palabranan ei a haci Abraham, pasobra Abraham a stima su yiu masha hopi. Y no lubida, Dios a priminti cu e yiunan di Abraham lo biba na e tera di Canaan. Pero, con esei por sosode si Isaak muri? Abraham no a compronde, pero toch el a obedece Dios.

Ora el a yega na e sero, Abraham a mara Isaak y a pon’e riba e altar cu el a traha. Anto el a saca e cuchiu pa mata su yiu. Pero net na e momento ei e angel di Dios a yama: ‘Abraham, Abraham!’ Y Abraham a contesta: ‘At’ami aki!’

‘No haci daño na e mucha ni no hacie nada’, Dios a bisa. ‘Awor mi sa cu bo tin fe den mi, pasobra bo no a nenga mi bo yiu, bo unico yiu.’

Ki un fe grandi Abraham tabatin den Dios! El a kere cu nada no ta imposibel pa Jehova, y cu Jehova asta por a lanta Isaak bek for di morto. Pero realmente no tabata e boluntad di Dios pa Abraham mata Isaak. P’esei Dios a haci un carne pega den mata eibanda mes, y el a bisa Abraham sacrifica e carne en bes di su yiu.