Morocho Cu Tabata Distinto

E DOS mucha hombernan aki ta masha diferente, no ta berdad? Bo sa nan nomber? E yagdo ta Esau, y e mucha homber cu ta cuida carne ta Jacob.

Esau cu Jacob tabata e yiu hombernan morocho di Isaak cu Rebeca. Nan tata Isaak a gusta Esau hopi, pasobra e tabata un bon yagdo y tabata trece cuminda cas pa e famia come. Pero Rebeca a stima Jacob mas, pasobra e tabata un mucha keto y trankil.

Nan welo Abraham tabata na bida ainda, y nos por imagina nos mes con Jacob tabata gusta scucha Abraham papia tocante Jehova. Finalmente Abraham a muri na edad di 175 aña, ora e morochonan tabatin 15 aña di edad.

Ora Esau tabatin 40 aña di edad el a casa cu dos muher di e tera di Canaan. Esei a haci Isaak cu Rebeca masha tristo, pasobra e dos muhernan ei no tabata adora Jehova.

Anto un dia algo a sosode cu a haci Esau rabia masha cu su ruman Jacob. E tempo a yega pa Isaak duna su bendicion na su yiu homber mayo. Siendo cu Esau tabata mas grandi cu Jacob, Esau a spera di ricibi e bendicion. Pero mas prome Esau a bende Jacob su derecho di ricibi e bendicion. Tambe, ora e dos muchanan a nace, Dios a bisa cu Jacob lo ricibi e bendicion. Y esei ta loke a sosode. Isaak a duna e bendicion na su yiu Jacob.

Despues, ora Esau a tende esei, el a bira masha rabia cu Jacob. El a rabia asina tanto cu e kier a mata Jacob. Ora Rebeca a tende di esei, el a keda masha precupa. P’esei el a bisa su esposo Isaak: ‘Lo ta teribel si Jacob tambe casa cu un di e muhernan di Canaan.’

E ora ei Isaak a yama su yiu Jacob y a bis’e: ‘No casa cu un muher di Canaan. Mas bien, bai na e cas di bo welo Betuel na Haran, y casa cu un yiu muher di Laban, yiu di Betuel.’

Jacob a scucha di su tata, y di biaha el a cuminsa su biahe largo pa bai caminda su famia tabata biba na Haran.