Jose Su Rumannan A Odi’e

MIRA ki tristo y sin speransa e mucha homber ta. Esei ta Jose. Su rumannan a caba di bend’e cu e hombernan cu ta riba caminda pa Egipto. Aya nan lo haci Jose esclabo. Pakico su mitar rumannan a haci tal cos malo? Pa motibo cu nan tabata jaloers riba Jose.

Nan tata Jacob a gusta Jose masha hopi mes. El a demostra esei dor di regala Jose un bunita mantel largo. Ora su dies rumannan mas grandi a mira cuanto Jacob a stima Jose, nan a cuminsa bira jaloers riba Jose y odi’e. Pero, tabatin un otro motibo mas pakico nan a odi’e.

Jose tabatin dos soño. Den e dos soñonan di Jose, su rumannan a buig p’e. Ora Jose a conta e dos soñonan na su rumannan, nan odio a aumenta asta mas.

Riba un dia ora e rumannan di Jose tabata cuida carne di nan tata, Jacob a pidi Jose pa e bai mira con ta bai cu nan. Ora e rumannan di Jose a mir’e ta bini, algun di nan a bisa: ‘Ban mat’e!’ Pero Ruben, e ruman mayo, a bisa: ‘No, no haci esei!’ En bes di mat’e, nan a cohe Jose y a tir’e den un pos seco sin awa. Anto nan a sinta pa dicidi kico pa haci cu ne.

Na dado momento algun homber di Ismael a pasa. Juda a bisa su mitar rumannan: ‘Ban bend’e cu e Ismaelitanan.’ Y esei ta loke nan a haci. Nan a bende Jose pa binti pida plata. Ki un cos malicioso y sin bondad nan a haci!

Kico e rumannan lo a bisa nan tata? Nan a mata un cabrito y bes tras bes nan a hinca e mantel bunita di Jose den sanger di e cabrito. Anto nan a hiba e mantel cas pa nan tata Jacob y a bis’e: ‘Nos a haya esaki. Wak e y mira si no ta e mantel di Jose.’

Jacob a mira cu ta Jose su mantel. El a sclama: ‘Un bestia salbahe mester a mata Jose.’ Y esei ta net loke e rumannan di Jose tabata kier pa nan tata kere. Jacob a keda masha tristo mes. El a yora pa hopi dia. Pero Jose no tabata morto. Laga nos mira kico a sosode cu ne caminda nan a hib’e.