E Mata na Candela

MOISES a yega te na e Sero di Horeb buscando yerba pa su carnenan. Ei Moises a mira un mata na candela, pero e candela no tabata kim’e!

‘Esei ta straño’, Moises a pensa. ‘Mi ta bai mas cerca pa mir’e mas mihor.’ Ora el a haci esei, un bos a bini for di e mata, bisando: ‘No bini mas cerca. Kita bo sandalia, pasobra bo ta para riba tera santo.’ Dios tabata esun cu a papia, uzando un angel, y p’esei Moises a tapa su cara.

Anto Dios a bisa: ‘Mi a mira e sufrimento di mi pueblo na Egipto. P’esei mi ta bai libera nan, y mi ta manda abo pa saca nan for di Egipto.’ Jehova kier a hiba su pueblo na e tera bunita di Canaan.

Pero Moises a bisa: ‘Mi no ta nada. Con mi por haci esei? Pero si mi bai, e Israelitanan lo puntra mi, “Ken a manda bo?” Anto kico mi mester contesta?’

Dios a contesta, ‘Bo tin cu bisa esaki: “JEHOVA e Dios di Abraham, e Dios di Isaak y e Dios di Jacob a manda mi cerca boso.”’ Y Jehova a agrega: ‘Esei ta mi nomber pa semper.’

‘Pero supone cu nan no kere mi ora mi bisa cu bo a manda mi’, Moises a responde.

Dios a puntr’e: ‘Kico tin den bo man?’

Moises a contesta: ‘Un bara.’

Dios a bis’e: ‘Tir’e na suela.’ Y ora Moises a tir’e abou, e bara a bira un colebra. Anto Jehova a mustra Moises un otro milager. El a bisa: ‘Hinca bo man den bo mantel.’ Moises a hacie, y ora el a saca su man, e tabata blanco manera sneu! Su man a parce manera cu e tabatin e malesa teribel yama lepra. Siguientemente Jehova a duna Moises e poder pa haci un di tres milager. Finalmente el a bisa: ‘Ora bo haci e milagernan aki, e Israelitanan lo kere cu mi a manda bo.’

Despues, Moises a bai cas y a pidi Jetro: ‘Por fabor, laga mi bai bek cerca mi pueblo na Egipto pa mira con ta cu nan.’ P’esei Jetro a bisa Moises ayo, y Moises a cuminsa su biahe pa bai Egipto bek.