Abigail y David

BO CONOCE e dama bunita cu ta bini pa contra cu David? Su nomber ta Abigail. E ta un hende cu ta uza su cabes, y el a kita David di haci algo malo. Pero, prome cu nos siña tocante esei, ban mira kico a sosode cu David.

Despues cu David a hui pa Saul, el a sconde den cueba. Su rumannan y su demas famianan a bini cerca dje einan. Rond di 400 homber en total a bini cerca dje, y David a bira nan hefe. Anto David a bai cerca e rei di Moab y a pidie: ‘Por fabor, laga mi tata y mama keda cerca bo te ora mi mira kico lo sosode cu mi.’ Despues, David y su trupa a bai sconde den sero.

Despues di esei David a topa cu Abigail. Su esposo Nabal tabata un cunukero rico. E tabatin 3.000 carne y 1.000 cabrito. Nabal tabata un mal hende. Pero su esposa Abigail tabata masha bunita. Tambe, e tabata sa di haci loke ta bon. Un biaha asta el a salba su famia. Laga nos mira con el a hacie.

David y su trupa a trata Nabal cu bondad. Nan a yuda proteha su carnenan. P’esei, un dia David a manda algun di su hombernan pa pidi Nabal un fabor. E hombernan di David a yega cerca Nabal ora e trahadonan tabata pela carne. Tabata un dia di fiesta, y Nabal tabatin hopi bon cos pa come. Pues, esaki ta loke e hombernan di David a bisa: ‘Nos a trata bo cu bondad. Nos no a horta ningun carne di bo, sino a yuda bo cuida nan. Awor, sea asina bon di duna nos cuminda.’

‘Mi no ta duna mi cuminda na hende manera boso’, Nabal a bisa. El a papia malo cu nan, y a bisa cos malo tocante David. Ora cu e hombernan a bolbe y a bisa David di esei, David a bira masha rabia. El a bisa su trupa: ‘Bisti boso spada!’ Y nan a sali pa bai mata Nabal y su hombernan.

Un di e hombernan di Nabal cu a tende e mal cosnan cu Nabal a papia, a bisa Abigail kico a sosode. Abigail a prepara cuminda di biaha. El a pon’e riba algun burico y a sali. Ora el a topa cu David, el a baha for di su burico, a buig y a bisa: ‘Por fabor, señor, no haci caso di mi casa Nabal. E ta un bobo y ta haci cos di bobo. Ata un regalo aki. Acept’e, por fabor, y pordona nos pa loke a sosode.’

David a contesta: ‘Bo ta un hende sabi. Bo a kita mi di mata Nabal como pago pa su maldad. Bai cas awor na pas.’ Despues di morto di Nabal, Abigail a bira un di e esposanan di David.