David A Bira Rei

SAUL a purba atrobe pa captura David. El a bai cu 3.000 di su mihor soldanan pa busca David. Ora David a tende di esei, el a manda spion pa sa na unda Saul y su trupa a pasa anochi. Anto David a puntra dos homber di dje: ‘Cua di boso kier bai na e campamento cu mi?’

Abisai a responde: ‘Ami ta bai.’ Abisai ta yiu di Sarvia (of Seruya) ruman muher di David. Mientras cu Saul y su trupa tabata drumi, David y Abisai a gatia drenta den e campamento. Nan a cohe e lansa y e purun di awa di Saul, locual tabata net banda di cabes di Saul. Ningun hende no a mira ni no a tende nan pasobra nan tur tabata den un soño profundo.

Wak David y Abisai awor. Nan a logra sluip sali y ta safe riba punta di un sero. David a grita e hefe di ehersito di Israel: ‘Abner, pakico bo no ta proteha bo señor e Rei? Mira! Unda su lansa y su purun di awa ta?’

Saul a lanta. El a reconoce e bos di David y a puntra: ‘Esei ta abo, David?’ Bo ta mira Saul y Abner ei bou?

David a contesta Saul: ‘Si, mi señor Rei.’ Y David a puntra: ‘Pakico Saul ta purba captura mi? Ki malo mi a haci? Ata bo lansa aki, o Rei. Laga un di bo hombernan bin coh’e.’

Saul a admiti: ‘Mi a haci malo. Mi a haci cos di bobo.’ E ora ei David a sigui su caminda, y Saul a bai cas. Pero David a bisa den su mes: ‘Un dia Saul lo mata mi. Mi tin cu hui bai na tera di e Filisteonan.’ Y esei ta loke el a haci. David a logra nek e Filisteonan y haci nan kere cu e ta apoya nan awor.

Poco tempo despues e Filisteonan a subi pa bringa contra Israel. Tanto Saul como Jonatan a muri den e bataya. Esei a haci David masha tristo, y el a compone un cantica bunita den cual el a canta: ‘Mi ta sinti mi tristo pa bo, mi ruman Jonatan. Cuanto mi a stima bo!’

Despues di esei David a bolbe na Israel na e stad Hebron. Tabatin guera entre e hombernan cu a scohe Is-boset yiu di Saul como rei, y e otro hombernan cu tabata kier David como rei. Pero finalmente e hombernan di David a gana. David tabatin 30 aña di edad ora el a bira Rei. El a reina na Hebron pa shete aña y mei. Algun yiu di dje cu a nace ei tabata Amnon, Absalon y Adonias.

Cu tempo David y su trupa a bai captura e stad bunita cu yama Jerusalem. Joab, un otro yiu di Sarvia ruman muher di David, a hiba delantera den e pelea. P’esei David a duna Joab e puesto di hefe di su ehersito como recompensa. Awor David a cuminsa reina den e stad Jerusalem.