E Reino Ta Ser Dividi

BO SA pakico e homber ta kibra su mantel na pida pida? Jehova a bis’e hacie. E homber aki ta Ahias, profeta di Dios. Bo sa kico ta un profeta? E ta un hende cu Dios ta bisa for di antemano kico ta bai sosode.

Ahias ta papiando cu Jeroboam. Jeroboam ta un homber cu Salomon a encarga cu algun trabou di construccion. Ora Ahias a topa cu Jeroboam riba caminda, Ahias a haci un cos straño. El a kita e mantel nobo cu e tabatin bisti y a kibr’e na 12 pida. El a bisa Jeroboam: ‘Tuma 10 pida pa bo mes.’ Bo sa pakico Ahias a duna Jeroboam 10 pida?

Ahias a splica cu Jehova lo kita e reino for di Salomon. El a bisa cu Jehova ta bai duna 10 tribu na Jeroboam. Esei kiermen cu dos tribu so lo keda pa Roboam yiu homber di Salomon goberna.

Ora cu Salomon a tende loke Ahias a bisa Jeroboam, el a bira masha rabia. El a purba mata Jeroboam. Pero Jeroboam a hui bai Egipto. Despues di poco tempo Salomon a muri. E tabata Rei pa 40 aña, pero awor su yiu homber Roboam a bira Rei. Aya den Egipto, Jeroboam a tende cu Salomon a muri, y p’esei el a bolbe na Israel.

Roboam no tabata un bon Rei. El a trata e pueblo asta mas cruel cu su tata Salomon. Jeroboam y algun otro homber importante a bai cerca Rei Roboam y a pidie pa trata e pueblo mihor. Pero Roboam no a scucha. De echo, el a bira asta mas cruel cu prome. P’esei e pueblo a haci Jeroboam Rei riba 10 tribu, pero dos tribu, esnan di Benjamin y Juda, a keda cu Roboam como nan Rei.

Jeroboam no tabata kier pa su pueblo bai Jerusalem pa adora den e tempel di Jehova. P’esei el a traha dos bishe di oro y a pone e pueblo di e reino di 10 tribu adora nan. Pronto e tera a yena cu crimen y violencia.

Den e reino di dos tribu tambe tabatin dificultad. Menos cu cinco aña despues cu Roboam a bira Rei, e rei di Egipto a bini pa bringa contra Jerusalem. El a cohe hopi tesoro for di e tempel di Jehova bai cu ne. Pues, ta pa un tempo masha cortico e tempel a keda manera Salomon a trah’e.