E Hoben Hesus den Tempel

MIRA e hoben papia cu e ancianonan ei. Nan ta maestro den e tempel di Dios na Jerusalem. Y e hoben ta Hesus. El a crece basta caba. Awor e tin 12 aña di edad.

Ta un sorpresa pa e maestronan cu Hesus sa asina tanto cos di Dios y di cosnan skirbi den Bijbel. Pero pakico Jose cu Maria no t’ei tambe? Unda nan ta? Ban mira.

Tur aña Jose tabata hiba su famia Jerusalem pa e celebracion special yama Pasco Hudiu. E caminda di Nazaret pa Jerusalem ta largo. No tabatin auto ni no tabatin bus. E cosnan ei no a existi e tempo ei. Casi tur hende tabata cana na pia, y a dura rond di tres dia pa nan yega Jerusalem.

E tempo ei e famia di Jose tabata grandi. Nan tabatin yiu mas jong cu Hesus pa cuida. Wel, e aña ei ya Jose cu Maria hunto cu nan yiunan a cuminsa cana e caminda largo pa bai bek nan cas na Nazaret. Nan a pensa cu Hesus tabata cana cu otro hende. Pero ora nan a para na fin di dia, nan no por a haya Hesus. Nan a busc’e cerca pariente- y amigonan, pero e no tabata cu nan! P’esei nan a bolbe na Jerusalem pa busc’e ei.

Porfin nan a haya Hesus cerca e maestronan. E tabata scucha nan y haci pregunta. Y tur hende a keda asombra di e sabiduria di Hesus. Pero Maria a puntra: ‘Mi yiu, pakico bo a haci e cos aki cu nos? Ami cu bo tata a keda masha precupa buscando bo.’

Hesus a contesta: ‘Pakico boso ta busca mi? Boso no sa cu mi mester ta den cas di mi Tata?’

Si, Hesus tabata gusta ta caminda e por a siña tocante Dios. Nos tambe no tin cu sinti asina? Na su pueblo Nazaret, Hesus tabata bai reunion pa adoracion tur siman. Dor cu semper el a presta atencion, el a siña hopi cos for di Bijbel. Laga nos ta mescos cu Hesus, y sigui su ehempel.