Juan A Batisa Hesus

MIRA e paloma baha riba cabes di e homber. E homber ta Hesus. Awor e tin rond di 30 aña di edad. Y e homber hunto cu ne ta Juan. Nos sa algo di dje caba. Bo ta corda cu ora Maria a bai bishita su prima Elisabet, e baby den su bariga a salta di goso? E baby ei cu no a nace ainda tabata Juan. Pero kico Juan y Hesus ta haciendo einan?

Juan a caba di hinca Hesus bou di awa den Riu Jordan. Asina ta batisa hende. Un hende ta hinc’e bou di awa anto despues sac’e. Dor cu Juan tabata batisa hende, nan a yam’e Juan Bautista. Pero pakico Juan a batisa Hesus?

Wel, Juan a hacie pasobra Hesus a bini y a pidi Juan batis’e. Juan tabata batisa hende cu kier a mustra cu nan a sinti duele cu nan a haci cosnan malo. Pero Hesus a haci cosnan malo pa cual e mester a sinti duele? Nunca, pasobra e tabata e Yiu di Dios mes for di shelo. P’esei, el a pidi Juan batis’e pa un otro motibo. Laga nos mira ki motibo e tabatin.

Prome cu Hesus a acudi na Juan, e tabata un carpinte. Carpinte ta un hende cu ta traha cos di palo, tal como mesa, stul y banki. Jose, casa di Maria, tabata un carpinte, y el a siña Hesus tambe e trabou di carpinte. Pero Jehova no a manda su Yiu na mundo pa ta un carpinte. E tabatin un trabou special pa Hesus haci, y e tempo a yega pa Hesus cuminsa hacie. Pues, pa e mustra awor cu el a bini pa haci e boluntad di su Tata, Hesus a pidi Juan batis’e. Dios a gusta esei?

Si, pasobra despues cu Hesus a sali for di awa, un bos di shelo a bisa: ‘Esaki ta mi Yiu, esun cu mi ta aproba.’ Tambe, a parce cu shelo a habri y un paloma a baha riba Hesus. Pero esei no tabata un paloma di berdad. E tabatin forma di paloma so. En realidad esei tabata e spirito santo di Dios.

Awor Hesus tabatin cu pensa riba hopi cos, y p’esei el a bai na un luga solitario pa 40 dia. Satanas a bini cerca dje ei. Satanas a purba tres bes pa haci Hesus viola e leinan di Dios. Pero Hesus no a hacie.

Despues di esei, Hesus a bolbe y a contra cu algun homber cu a bira su prome siguidonan, of discipel. Algun di nan tabata yama Andres, Pedro (yama Simon tambe), Felipe y Natanael (yama Bartolomeo tambe). Hesus y su discipelnan nobo a bai na e districto di Galilea. Na Galilea nan a keda na Cana, e pueblo di Natanael. Hesus a bai un fiesta di casamento ei y a haci su prome milager. Bo sa kico esei tabata? El a haci awa bira biña.