Hesus Ta Haci e Tempel Limpi

HESUS ta parce hopi rabia, no ta berdad? Bo sa pakico? Pasobra e hendenan ei den e tempel di Dios na Jerusalem ta masha golos pa placa. Nan ta purba gana hopi placa di hende cu ta bai einan pa adora Dios.

Bo ta mira tur e baca jongnan y carne y paloma? Wel, e hombernan ta bende e bestianan ei den e tempel mes. Bo sa pakico? Dor cu e Israelitanan tin mester di bestia pa ofrece como sacrificio na Dios.

E lei di Dios a bisa cu ora un Israelita haci malo, e mester a haci un sacrificio na Dios. Y na algun otro ocasion tambe e Israelitanan mester a haci sacrificio. Pero unda e Israelitanan por a haya bestia pa ofrece na Dios?

Algun Israelita tabata cria bestia, cu nan por a ofrece. Pero hopi Israelita no tabata cria bestia. Y otronan tabata biba asina leu for di Jerusalem cu nan no por a bini cu nan mes animal na e tempel. P’esei, nan tabata bini einan y cumpra parha of otro bestia pa sacrifica. Pero e hombernan golos aki tabata cobra e hendenan mucho hopi placa. Nan tabata horta e hendenan. Ademas, nan no tabatin mag di bende cos mes ei den e tempel di Dios.

Esei a haci Hesus rabia. P’esei el a bolter mesa di e hendenan cu e placa y a plama nan cen. Tambe el a traha un zwiep di cabuya y a core cu tur e bestianan for di den e tempel. El a bisa e bendedonan di paloma: ‘Saca nan for di aki! Stop di haci e cas di mi Tata un luga di negoshi.’

Algun siguido di Hesus tabata hunto cu ne den e tempel na Jerusalem. Nan a keda sorprendi di loke nan a mira Hesus haci. Anto nan a corda e palabranan den Bijbel cu ta bisa di e Yiu di Dios: ‘Amor pa e cas di Dios lo kima den dje manera candela.’

Mientras Hesus tabata ei na Jerusalem asistiendo na e Pasco Hudiu, el a haci hopi milager. Despues, Hesus a sali for di Judea y a cuminsa su biahe di regreso pa Galilea. Pero, riba caminda el a pasa dor di e districto di Samaria. Laga nos mira kico a sosode ei.