Pedro Ta Bishita Cornelio

EI NOS ta mira apostel Pedro para, y su tras algun amigo di dje. Pero pakico e homber ta na rudia dilanti Pedro? E mag haci esei? Bo sa ken e ta?

E homber ta Cornelio, un oficial di ehersito Romano. Cornelio no conoce Pedro, pero el a ser manda pa invita Pedro na su cas. Laga nos mira con esei a sosode.

E prome siguidonan di Hesus tabata Hudiu, pero Cornelio no tabata Hudiu. Toch el a stima Dios, a haci oracion na dje y a trata hende cu bondad. Wel, un atardi un angel a aparece na dje y a bis’e: ‘Dios ta contento cu bo, y e lo contesta bo oracionnan. Manda algun hende cerca un cierto homber yama Pedro. E ta kedando na Jope den cas di Simon, kende ta biba cant’i lama.’

Wel, mesora Cornelio a manda algun homber bai busca Pedro. Su siguiente dia, ora e hombernan tabata yegando Jope, Pedro tabata riba e dak plat di cas di Simon. Ei Dios a duna Pedro un vision di un laken grandi bahando for di shelo. Tabatin tur sorto di bestia den e laken. Segun e lei di Dios, e bestianan aki tabata impuro pa come pero toch un stem a bisa: ‘Pedro, lanta. Mata y come.’

Pedro a contesta: ‘No! Nunca mi a come cos impuro.’ Pero e bos a bisa Pedro: ‘No yama impuro loke Dios ta yama puro awor.’ Esei a sosode tres bes. Mientras cu Pedro tabata pensando kico esei kiermen, e hombernan cu Cornelio a manda a yega na e cas y a puntra pa Pedro.

Pedro a baha bai abou y a bisa: ‘Ami ta esun cu boso ta busca. Pakico boso a bin?’ Despues cu e hombernan a splica cu un angel a bisa Cornelio pa invita Pedro na su cas, Pedro a cumbini pa bai cu nan. E dia siguiente Pedro y algun amigo a sali pa bai bishita Cornelio na Cesarea.

Cornelio a reuni su famia- y amigonan intimo. Ora Pedro a yega, Cornelio a ricibie y a cai na rudia dilanti di Pedro, manera bo ta mira ei. Pero Pedro a bisa: ‘Lanta para, ta djis un hende mi tambe ta.’ Si, Bijbel ta bisa cu no ta bon pa buig y adora hende. Nos tin cu adora Jehova so.

Awor Pedro a predica na e hendenan reuni. El a bisa: ‘Mi ta mira cu Dios ta acepta tur hende cu kier sirbie.’ Y mientras e tabata papia, Dios a manda su spirito santo y e hendenan a cuminsa papia diferente idioma. E discipelnan Hudiu cu a bin cu Pedro a keda asombra, pasobra nan a kere cu Dios ta faborece Hudiu so. Pues, esei a siña nan cu Dios no ta considera hende di un rasa mihor of mas importante cu hende di otro rasa. Esei no ta un bon cos pa nos tur corda?