CAPITULO UN

Kico Adoracion Uni den Nos Tempo Ta Nifica?

1, 2. (a) Ki movemento emocionante ta tumando luga den nos tempo? (b) Ki speransa maravioso hende di curason honrado tin?

ROND mundo tin un movemento emocionante den direccion di adoracion uni. E movemento aki ta uniendo miyones di hende di tur nacion, tribu y lenga. Tur aña mas ta bini acerca. Bijbel ta identifica e miyones di hendenan aki como “testigonan” di Yehova y ta yama nan “un multitud grandi.” Nan ta ‘sirbi Dios di dia y anochi.’ (Isaias 43:10-12; Revelacion 7:9-15) Dicon nan ta haci esaki? Pasobra nan a siña conoce Yehova como e unico Dios berdadero. Esaki ta motiva nan pa pone nan bida na harmonia cu su normanan husto. Tambe nan a siña cu nos ta bibando den “e ultimo dianan” di e mundo malbado aki, cu pronto Dios lo caba cu ne, y cu lo E remplas’e cu su mundo nobo transforma den un paradijs.—2 Timoteo 3:1-5, 13; 2 Pedro 3:10-13.

² E Palabra di Dios ta priminti: “Aki poco tempo e malbado lo no t’ei mas . . . Ma e humildenan lo hereda e tera, y lo deleita nan mes den pas abundante.” (Salmo 37:10, 11) “E hustonan lo hereda e tera, y lo biba den dje pa semper.” (Salmo 37:29) “[Dios] lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolo; e prome cosnan a pasa.”—Revelacion 21:4.

3. Kico ta uni hende den adoracion berdadero?

³ E hendenan cu ta ser uni awor den adoracion berdadero lo ta e prome residentenan di e mundo nobo ei. Nan a siña kico ta e boluntad di Dios y ta hacie lo miho cu nan por. Hesus a mustra con importante ta pa conoce e boluntad di Dios y hacie, ora el a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) Apostel Huan a skirbi: “Mundo ta pasa bai y su deseonan tambe, ma esun cu haci e boluntad di Dios ta permanece pa semper.”—1 Huan 2:17.

Loke Adoracion Uni Realmente Ta Nifica

4. (a) Kico e reunimento di asina hopi hende den adoracion uni den nos tempo realmente ta nifica? (b) Con Bijbel ta describi e reunimento aki?

⁴ Den nos tempo tin masha hopi hende ta ser treci hunto den adoracion uni. Kico esaki ta nifica realmente? Esei ta indica claramente cu nos ta hopi cerca di e fin di e mundo malbado aki, y cu Dios su mundo nobo lo cuminsa djis despues di esei. Cu nos propio wowo nos ta mira con profecianan biblico cu a predeci e reunimento importante aki, ta cumpli. Un di e profecianan ei ta bisa: “Lo sosode den e ultimo dianan [aki] cu e sero di e cas di SEÑOR [su adoracion eleva] lo wordo estableci como hefe di e seronan [riba tur otro tipo di adoracion]. . . . Y e pueblonan lo basha bai na dje. Y hopi nacion lo bin bisa: ‘Ban laga nos subi bai na e sero di SEÑOR y na e cas di e Dios di Yacob, pa E siña nos di su camindanan y pa nos cana den su bereanan.’”—Mikeas 4:1, 2; Salmo 37:34.

5, 6. (a) Den ki sentido e nacionnan ta acudi na Yehova? (b) Ki preguntanan nos mester haci nos mes?

⁵ No ta nacionnan completo ta presenta nan mes na Yehova su cas spiritual pa ador’e, pero si tin miyones di hende for di tur nacion cu ta haci esei. Segun cu nan ta siña tocante e proposito amoroso di Yehova Dios y di su personalidad atractivo, nan curason ta keda profundamente conmovi. Humildemente nan ta busca pa sa kico Dios kier pa nan haci. Nan oracion ta mescos cu esun di e salmista cu a bisa: “Siña mi haci bo boluntad, pasobra abo ta mi Dios.”—Salmo 143:10.

⁶ Bo ta mira bo mes entre e multitud grandi di hende cu Yehova ta treciendo hunto awor den adoracion uni? Bo reaccion riba e instruccion cu bo a ricibi for di su Palabra ta mustra cu realmente bo ta comprende cu ta for di Yehova el a bini? Te na ki grado lo bo “cana den su bereanan”?

Loke Ta Uni Hende den Adoracion

7. (a) Te na ki grado lo alcansa adoracion uni finalmente? (b) Dicon ta urgente pa bira un adorado di Yehova awor, y con nos por yuda otro hende haci esei?

⁷ E proposito di Yehova ta pa tur criatura inteligente ta uni den adoracion berdadero. Nos ta anhela e dia ora cu tur persona na bida lo adora e unico Dios berdadero! (Salmo 103:19-22) Pero prome cu esei por sosode, Yehova tin cu elimina tur persona cu ta nenga di haci su boluntad husto. Den su gran misericordia E ta duna spiertamento di loke E ta bai haci. Pues na tur parti di mundo hende tin e oportunidad di cambia nan comportacion. (Isaias 55:6, 7) Pesei den nos tempo e siguiente yamada urgente ta resona “na tur nacion y tribu y lenga y pueblo”: “Teme Dios y dun’e gloria, pasobra e ora di su huicio a yega; y adora Esun cu a traha shelo y tera y lama y fuentenan di awa.” (Revelacion 14:6, 7) Abo a acepta e invitacion ei? Si ta asina, bo tin e privilegio di invita otro hende pa siña conoce e Dios berdadero y ador’e.

8. Una bes nos conoce e siñansanan basico di Bijbel, nos mester haci esfuerso sincero pa haci ki progreso mas?

⁸ No ta Yehova su proposito pa E ser adora door di hende cu ta bisa cu nan ta kere den Dje pero cu toch ta sigui tras di nan propio interes. Dios kier pa hende haya un “conocemento exacto di su boluntad” y demostra esaki den nan bida. (Colosencenan 1:9, 10, NW) Pues anto, hende gradicido cu haya sa e siñansanan basico di Bijbel, kier sigui padilanti pa yega na madures Cristian. Nan kier siña conoce Yehova mas intimamente. Tambe nan kier amplia y profundisa nan comprendemento di su Palabra, y aplic’e mas cabalmente den nan bida. Nan ta trata di refleha e cualidadnan di nos Tata celestial y mira asuntonan manera E ta mira nan. Esaki ta impulsa nan pa busca maneranan pa participa den e trabou di salba bida cu E ta laga su adoradonan haci riba tera den nos tempo. Esei ta loke abo tambe kier haci?—Marco 13:10; Hebreonan 5:12–6:3.

9. Di ki manera berdadero union ta posibel awe?

⁹ Bijbel ta mustra cu e hendenan cu ta sirbi Yehova mester ta un pueblo uni. (Efesionan 4:1-3) E union aki mester ta existi awor, maske nos ta biba den un mundo dividi y ta lucha cu nos propio imperfeccionnan. Cu fervor Hesus a pidi den oracion pa tur su disipelnan ta uno, pa nan tin berdadero union. Kico esaki lo a nifica? Di prome, nan lo tin un bon relacion cu Yehova y su Yiu. Di dos, nan lo ta uni cu otro. (Huan 17:20, 21) Pa logra esei, e congregacion Cristian ta sirbi como e organisacion cu Yehova ta uza pa instrui su pueblo.

Ki Factor Ta Contribui na Union?

10. (a) Kico nos ta desaroya ora nos uza Bijbel personalmente pa rasona y yega na e contesta riba preguntanan cu ta envolve nos? (b) Analisa e factornan cu ta contribui na union Cristian door di contesta e preguntanan cu tin den e paragraf aki.

¹⁰ Aki bou ta sigui shete factor clave cu ta contribui na adoracion uni. Segun cu bo ta contesta e siguiente preguntanan, pensa con cada punto ta influencia bo relacion cu Yehova y cu compañeronan Cristian. Door di rasona riba e puntonan aki y busca e textonan biblico menciona, bo por desaroya sabiduria dibino, tambe e habilidad di pensa y distingui, cualidadnan cu nos tur tin mester. (Proverbionan 5:1, 2, NW; Filipencenan 1:9-11) Considera e factornan aki un pa un.

(1) Nos ta reconoce cu Yehova tin derecho di establece e norma di loke ta bon y loke ta malo. “Confia den SEÑOR cu henter bo curason, y no depende riba bo mes comprendemento. Den tur bo camindanan reconoc’e, y E lo dirigi bo bereanan.”—Proverbionan 3:5, 6.

Dicon nos tin cu busca Yehova su conseho y guia ora di tuma decision? (Salmo 146:3-5; Isaias 48:17)

(2) Nos tin e Palabra di Dios pa guia nos. “Ora boso a ricibi for di nos e palabra di Dios su mensahe, boso a acept’e no como palabra di hende, ma pa loke e ta berdaderamente, e palabra di Dios cu ta obra tambe den boso cu ta kere.”—1 Tesalonicencenan 2:13.

Ki peliger tin den djis haci loke nos ta “kere” ta corecto? (Proverbionan 14:12; Yeremias 10:23, 24; 17:9)

Si nos no sa ki conseho Bijbel ta duna riba un cierto asunto, kico nos mester haci? (Proverbionan 2:3-5; 2 Timoteo 3:16, 17)

(3) Nos tur ta beneficia di e mesun programa di alimentacion spiritual. “SEÑOR lo siña tur bo yiu hombernan.” (Isaias 54:13) “Laga nos considera con pa stimula otro pa stima y haci bon obra, y no laga di asisti na nos mes reunionnan, manera ta custumber di algun, ma curasha otro; y mucho mas ainda, ora boso ta mira cu e dia [di destruccion] ta yegando cerca.”—Hebreonan 10:24, 25.

Ki beneficio hende cu ta probecha plenamente di Yehova su areglo pa alimentacion spiritual ta ricibi? (Isaias 65:13, 14)

(4) Hesucristo ta nos Lider, no hende. “Ma boso no mester wordo yama rabi, pasobra ta un ta boso maestro, y boso tur ta ruman. Y no yama ningun hende riba tera boso tata, pasobra ta un ta boso Tata, Esun cu ta den shelo. Y boso no mester wordo yama [lider, NW] pasobra ta un ta boso [Lider, NW], esta, Cristo.”—Mateo 23:8-10.

Ta corecto pa kere cu un di nos ta superior cu otro hende? (Romanonan 3:23, 24; 12:3)

(5) Pa nos e gobernacion di e Reino di Dios ta e unico speransa pa humanidad. “Pues, haci oracion anto asin’aki: ‘Nos Tata cu ta den shelo, bo nomber sea santifica. Cu bo reino bin. Cu bo boluntad sosode na tera mescos cu den shelo.’ Ma busca prome e reino di Dios y su husticia.”—Mateo 6:9, 10, 33.

Di ki manera “busca prome e reino” ta yuda proteha nos union? (Mikeas 4:3; 1 Huan 3:10-12)

(6) Spirito santo ta produci den adorado di Yehova cualidadnan cu ta vital pa union Cristian. “Ma fruta di e spirito ta amor, goso, pas, pasenshi, cariño, bondad, fieldad, mansedumbre, dominio propio.”—Galationan 5:22, 23.

Kico nos tin cu haci pa Dios su spirito produci fruta den nos? (Echonan 5:32)

Con e echo cu nos tin Dios su spirito ta influencia nos relacion cu otro Cristian? (Huan 13:35; 1 Huan 4:8, 20, 21)

(7) Tur berdadero adorado di Dios ta predica e bon nobo di su Reino. “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.”—Mateo 24:14.

Kico mester motiva nos pa participa cabalmente den e actividad di predica aki? (Mateo 22:37-39; Romanonan 10:10)

11. Kico lo ta e efecto ora nos ta aplica berdadnan biblico den nos bida?

¹¹ Adora Yehova unidamente ta hala nos mas cerca Dje y ta haci posibel cu nos por gosa di un asociacion refrescante cu otro creyentenan. Salmo 133:1 ta bisa: “Mira, ki bon y ki dushi ta pa rumannan biba hunto den harmonia!” Ta masha refrescante pa separa for di mundo cu tur su egoismo, inmoralidad y violencia, y reuni hunto cu hende cu di berdad ta stima Yehova y obedece su leinan!

Evita Influencianan Cu Ta Causa Desunion

12. Dicon nos tin cu evita un actitud independiente?

¹² Pa nos no daña nos precioso union mundial, nos tin cu evita influencianan cu ta causa desunion. Un di e influencianan aki ta e actitud di kier ta independiente di Dios y di su leinan. Yehova ta yuda nos evita e actitud aki door di revela ta ken ta esun cu a origin’e: Satanas e Diabel. (2 Corintionan 4:4; Revelacion 12:9) Satanas ta esun cu a influencia Adam cu Eva pa ignora loke Dios a bisa y tuma decision contrario na e boluntad di Dios. E resultado tawata calamidad pa nan y pa nos. (Genesis 3:1-6, 17-19) E actitud dominante di mundo ta di kier ta independiente di Dios y di su leinan. Pesei nos tin cu frena e actitud ei den nos mes.

13. Kico lo demostra cu nos ta preparando sinceramente pa biba den Dios su husto mundo nobo?

¹³ Tuma por ehempel Yehova su promesa emocionante di remplasa e mundo malbado actual cu shelonan nobo y un tera nobo “den cual ta biba husticia.” (2 Pedro 3:13) Esei no mester impulsa nos pa cuminsa prepara pa biba ora cu husticia lo predomina? Esaki ta nifica cu nos tin cu haci caso di e conseho bon cla di Bijbel: “No stima mundo, ni e cosnan cu tin den mundo. Si un hende ta stima mundo, e amor di e Tata no ta den dje.” (1 Huan 2:15) Pues, nos ta evita e spirito, esta, e inclinacion mental dominante di e mundo aki: su actitud independiente, su interes exagera den su mes, su inmoralidad y violencia. Nos ta hacie un custumber pa scucha Yehova y obedece di curason, apesar cu nos naturalesa imperfecto kisas ta inclina na lo contrario. Henter nos bida ta duna prueba cu nos manera di pensa y nos motivacionnan ta basa riba haci e boluntad di Dios.—Salmo 40:8.

14. (a) Dicon ta importante pa probecha di e oportunidad cu tin awor pa siña di e camindanan di Yehova y sigui nan den nos bida? (b) Kico e textonan biblico cu tin den e paragraf ta nifica pa nos personalmente?

¹⁴ Ora Yehova su tempo fiha yega pa destrui e sistema di cosnan malbado aki hunto cu tur esnan cu ta prefera su estilo di bida, lo E no tarda. E no ta bai pospone e tempo ei of cambia su normanan djis pa tene consideracion cu hende cu ainda ta purba pega na mundo y cu no tin masha gana di siña y haci su boluntad. Awor ta tempo pa tuma accion! (Lucas 13:23, 24; 17:32; 21:34-36) Pesei ta un gran animacion pa mira e multitud grandi probecha di e oportunidad precioso aki y busca ansiosamente e instruccion cu Yehova ta percura mediante su Palabra y organisacion. Uni nan ta cana den e camindanan di Yehova rumbo pa e mundo nobo! Y mas nos siña tocante Yehova, mas nos lo stim’e y desea di sirbie.

[Komentario di e plachi na página 13]

Como Repaso

• Kico ta Yehova su proposito pa loke ta adoracion?

• Una bes nos conoce e siñansanan basico di Bijbel, nos mester haci esfuerso sincero pa logra ki progreso mas?

• Kico nos por haci individualmente pa ta uni cu otro adorado di Yehova?

[Plachi na pagina 4]

“E humildenan lo hereda e tera, y lo deleita nan mes den pas abundante”