Capitulo Dos

Halsa Yehova Como e Unico Dios Berdadero

1. Ken ta e unico Dios berdadero?

BIJBEL ta bisa cu aunke hopi persona ta ser mira como dios, “toch pa nos tin un Dios so, e Tata.” (1 Corintionan 8:5, 6) E ‘solo Dios’ ei ta Yehova, Creador di tur cos. (Deuteronomio 6:4; Revelacion 4:11) Hesus a referi na Dje como “mi Dios y boso Dios.” (Huan 20:17) E tawata di acuerdo cu Moises, kende mas prome a bisa: “Yehova ta e Dios berdadero; no tin ningun otro fuera di Dje.” (Deuteronomio 4:35, NW) Yehova ta hopi mas superior cu cualkier obheto di adoracion, manera por ehempel idolo, hende cu nan ta considera como dios of su enemigo Satanas e Diabel, “e dios di e mundo aki.” (2 Corintionan 4:3, 4) Na contraste cu tur esakinan, Yehova ta, manera Hesus a yam’e, “e unico Dios berdadero.”—Huan 17:3.

2. Segun cu nos ta siña tocante Dios, ki efecto esei mester tin den nos bida?

² Hende gradicido cu siña tocante e cualidadnan conmovedor di Dios y tambe tocante loke El a haci y lo haci ainda pa nos, ta sinti nan atrai na Dje. Segun cu nan amor pa Yehova ta crece, nan ta sinti nan mes impulsa pa hals’e. Con? Un manera ta door di conta otro hende tocante Dje. Romanonan 10:10 ta declara: “Cu boca e ta confesa [haci declaracion publico, NW] pa haya salbacion.” Un otro manera ta door di imita Dios cu palabra y echo. Efesionan 5:1 ta bisa: “Sea imitadonan di Dios, manera yiunan stima.” Pa por haci esei mas cabalmente, nos tin cu conoce Yehova su berdadero cualidadnan.

3. Cua ta e cualidadnan principal di Dios?

³ Den Bijbel tin hopi declaracion cu ta identifica Dios su cualidadnan sobresaliente. Su cuater cualidadnan principal ta sabiduria, husticia, poder y amor. “Cerca Dios tin sabiduria.” (Job 12:13) “Tur su camindanan ta husto.” (Deuteronomio 32:4) E ta “vigoroso den poder.” (Isaias 40:26, NW) “Dios ta amor.” (1 Huan 4:8) Sinembargo, di e cuater cualidadnan principal di Dios, cua ta esun mas sobresaliente, esun cu mas ta indica ki clase di Dios e ta?

“Dios Ta Amor”

4. Cua di e cualidadnan di Dios a motiv’e pa crea universo y tur cos bibo?

⁴ Pensa kico lo a motiva Yehova pa crea universo y criaturanan inteligente, tanto spiritual como humano. Tawata su sabiduria of poder? No, maske Dios a uza eseinan, nan no tawata loke a motiv’e. Y Dios no tawatin nodi comparti e don di bida pa E ta husto. Mas bien, ta Dios su gran amor a impuls’e pa comparti cu otronan e goso di existi como un persona inteligente. Amor a pone cu E tawata kier pa humanidad obediente biba pa semper den Paradijs. (Genesis 1:28; 2:15) Amor a pon’e haci areglo pa kita e condenacion cu Adam su pica a trece riba humanidad.

5. Segun Bijbel, ki cualidad ta identifica Yehova, y dicon?

⁵ Pues, di tur e cualidadnan di Dios, esun mas sobresaliente ta su amor. Esei ta su esencia, of loke ta identific’e. Pa importante cu su sabiduria, husticia y poder ta, Bijbel nunca ta bisa cu Yehova ta ningun di esakinan. Pero si e ta bisa cu Dios ta amor. Si, Yehova ta amor en persona. Esaki ta amor guia pa principio, no pa emocion. E principionan di berdad y husticia ta dirigi Dios su amor. Esei ta e forma mas eleva di amor, y Yehova Dios mes ta e ehempel tipico di esei. E tipo di amor ei ta un expresion di inegoismo total y semper e ta bai compaña cu accionnan cu ta duna evidencia palpabel di dje.

6. Kico ta haci posibel cu nos por imita Dios, maske e ta superior cu nos?

⁶ Ta e maravioso cualidad aki di amor ta haci posibel cu nos por imita un Dios asina. Como hende di condicion humilde, imperfecto y cu ta inclina na comete eror, kisas nos ta pensa cu nunca nos lo por logra imita Dios. Pero ata un otro ehempel di Yehova su gran amor: E sa y ta comprende nos limitacionnan y no ta exigi perfeccion for di nos. E sa cu aworaki nos ta leu di ta perfecto. (Salmo 51:5) Pesei Salmo 130:3 y 4 ta bisa: “Si abo, SEÑOR, tuma inikidadnan na cuenta, o Señor, ken lo por a keda para? Ma cerca bo tin pordon.” Si, Yehova ta un “Dios, yen di compasion y gracia, kende no ta rabia lihe y kende ta abunda den misericordia.” (Exodo 34:6) “Abo, Señor, ta bon, y cla pa pordona.” (Salmo 86:5) Esta un consuelo! Esta refrescante pa sirbi e Dios maravioso aki y sinti su cuido amoroso y misericordioso!

7. Con nos por mira Yehova su amor den su obranan di creacion?

⁷ Tambe nos por mira Yehova su amor den su obranan di creacion. Pensa riba e cantidad di cos bon cu Yehova a percura pa nos gosa di dje, por ehempel sero-, mondi-, lago- y oceanonan bunita. El a duna nos un asombroso variedad di cuminda pa deleita nos paladar y pa sisti nos. Ademas, Yehova a percura un inmenso variedad di flor bunita y cu ta hole dushi, y tambe e fasinante mundo di animal. El a traha cosnan cu lo a duna hende placer, maske esei no tawata necesario. Ta berdad cu nos bida den e mundo malbado aki y cu e condicion imperfecto cu nos ta aden awor, no ta permiti nos disfruta plenamente di su creacion. (Romanonan 8:22) Pero djis imagina loke Yehova lo haci pa nos den Paradijs! E salmista ta sigura nos: “Bo ta habri bo man, y ta satisface e [bon] deseo di tur ser bibo.”—Salmo 145:16.

8. Cua ta e ehempel mas sobresaliente di Yehova su amor pa nos?

⁸ Cua ta e ehempel mas sobresaliente di Yehova su amor pa humanidad? Bijbel ta splica: “Dios a stima mundo asina tanto, cu El a duna su Yiu unigenito, pa ken cu kere den dje no bai perdi, ma tin bida eterno.” (Huan 3:16) Tawata debi na hende su bondad cu Yehova a haci esaki? Romanonan 5:8 ta contesta: “Dios ta demostra su mes amor pa cu nos den esaki, cu tempo nos tawata pecador ainda, Cristo a muri pa nos.” Si, Dios a manda su Yiu perfecto na tera pa duna su bida como un sacrificio di rescate pa salba nos for di e condenacion di pica y morto. (Mateo 20:28) Esaki a habri caminda pa hende cu stima Dios por gana bida eterno. Afortunadamente, Dios su amor ta extende na ken cu kier haci su boluntad, pasobra Bijbel ta bisa nos: “Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.”—Echonan 10:34, 35.

9. E echo cu Yehova a duna su Yiu como un rescate pa nos, mester tin ki efecto riba nos?

⁹ Siendo cu Yehova a duna su Yiu como un rescate pa nos—habriendo asina e caminda pa haya bida eterno—ki efecto esei mester tin riba e manera cu nos ta uza nos bida awor? Esei mester profundisa nos amor pa e Dios berdadero, Yehova. Na mesun tempo, esei mester motiva nos pa scucha Hesus, kende ta representa Dios. “[Hesus] a muri pa tur, pa esnan cu ta biba no biba mas pa nan mes, ma pa esun cu a muri” pa nan. (2 Corintionan 5:15) Ta un placer pa por sigui e pasonan di Hesus, pasobra e tawata ehemplar den imita Yehova su amor y compasion. Esaki a keda demostra den loke Hesus a bisa hende humilde: “Bin cerca mi tur cu ta cansa y carga, y lo mi duna boso sosiego. Tuma mi yugo riba boso, y siña di mi, pasobra mi ta manso y humilde di curason; y boso lo haya sosiego pa boso alma. Pasobra mi yugo ta suave y mi carga ta lihe.”—Mateo 11:28-30.

Mustrando Amor na Otro Hende

10. Cua ta algun manera cu nos por mustra amor na nos compañeronan Cristian?

¹⁰ Con nos por mustra cu nos ta stima nos compañeronan Cristian manera Yehova y Hesus ta stima nos? Tuma nota di e cantidad di manera cu nos por mustra esaki: “Amor tin pasenshi, amor ta cariñoso y no ta yalurs; amor no ta gaba, y no ta arogante, e no ta comporta su mes indecente; e no ta busca su propio interes, e no ta wordo proboca, e no ta warda rencor, e no ta regociha den inhusticia, ma ta regociha den e berdad; tur cos e ta tapa, tur cos e ta kere, tur cos e ta spera, tur cos e ta soporta. Amor nunca no ta faya.”—1 Corintionan 13:4-8; 1 Huan 3:14-18; 4:7-12.

11. Na ken mas nos tin cu mustra amor, y con?

¹¹ Na ken mas nos tin cu mustra amor, y con? Hesus a bisa: “Pesei, bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso.” (Mateo 28:19, 20) Esaki ta encera comparti e bon noticia di Dios su benidero mundo nobo transforma den un paradijs cu esnan cu ainda no ta nos compañeronan Cristian. Hesus a mustra bon cla cu nos amor no mester ta limita na esnan cu ta comparti nos creencia, pasobra e di: “Si boso stima [solamente] esnan cu ta stima boso, ki recompensa boso tin? E publicanonan tambe no ta haci mescos? Y si boso cuminda boso rumannan so, kico boso ta haci mas cu otronan? E paganonan tambe no ta haci mescos?”—Mateo 5:46, 47; 24:14; Galationan 6:10.

“Cana den e Nomber di Yehova”

12. Dicon e nomber di Dios por aplica na E so?

¹² Un otro aspecto importante di halsa e Dios berdadero ta conoce su nomber unico, Yehova, uz’e y siñ’e na otro hende. E salmista a expresa su deseo sincero: “Pa nan por sa cu abo so, kende su nomber ta Yehova, ta e Haltisimo riba henter tera.” (Salmo 83:18, NW; Exodo 3:14, Beibel na papiamentu koriente [SAB], nota na pia di pagina) E nomber Yehova ta nifica “E Ta Causa pa Bira.” E ta Esun Magnifico cu ta establece su propositonan y semper ta cumpli cu nan. Y ta solamente e Dios berdadero tin derecho di carga e nomber ei, pasobra hende nunca por ta sigur cu nan esfuersonan lo tin exito. (Santiago 4:13, 14) Ta Yehova so por bisa cu su palabra ‘lo no bolbe bashi, sin alcansa e proposito cu cual mi a mand’e.’ (Isaias 55:11) Hopi hende ta keda emociona ora nan mira Dios su nomber pa prome bes den nan Bijbel y haya sa kico e ta nifica. (Exodo 6:3, NW) Pero nan lo beneficia di e conocemento aki solamente si nan “cana den e nomber di [Yehova, NW] . . . pa semper.”—Mikeas 4:5.

13. Kico ta encera conoce e nomber di Yehova y cana den su nomber?

¹³ Salmo 9:10 ta bisa di e nomber di Dios: “Esnan cu conoce bo nomber lo pone nan confiansa den bo.” Esaki ta encera mas cu djis sa tocante e nomber Yehova, pasobra esei no kiermen cu automaticamente un hende ta confia den Dje. Conoce e nomber di Dios kiermen comprende y aprecia e clase di Dios cu Yehova ta, respeta su autoridad, obedece su mandamentonan, confi’e den tur cos. (Proverbionan 3:5, 6) Di igual manera, cana den e nomber di Yehova ta implica dedica nos mes na Dje y represent’e como un di su adoradonan, y echt uza nos bida na harmonia cu e boluntad di Dios. (Lucas 10:27) Bo ta haciendo esei?

14. Si nos kier sirbi Yehova pa semper, kico nos mester tin fuera di un sentido di obligacion?

¹⁴ Si nos kier sirbi Yehova pa eternidad, no ta simplemente un sentido di obligacion mester impulsa nos. Apostel Pablo a anima Timoteo, kende tawatin hopi aña ta sirbi Yehova: “Entrena bo mes cu debocion na Dios como bo meta.” (1 Timoteo 4:7, NW) Debocion ta sali di un curason yen di gratitud pa e persona na ken bo ta dirigi bo debocion. “Debocion na Dios” ta expresa un honor y respet profundo pa Yehova personalmente. E ta manifesta un laso tierno cu Yehova debi na e enorme aprecio cu nos tin p’e y pa su normanan. Esei ta pone cu nos kier pa tur hende respeta su nomber. Nos tin cu cultiva debocion pa Dios den nos bida si nos kier cana pa semper den e nomber di Yehova, e unico Dios berdadero.—Salmo 37:4; 2 Pedro 3:11.

15. Con nos por duna Dios nos debocion exclusivo?

¹⁵ Pa sirbi Dios aceptablemente, nos tin cu dun’e adoracion exclusivo, ya cu E ta “un Dios cu ta exigi debocion exclusivo.” (Exodo 20:5, NW) Nos no por stima Dios y na mesun tempo stima e mundo malbado aki, cu tin Satanas como su dios. (Santiago 4:4; 1 Huan 2:15-17) Yehova sa precis ki clase di persona cada un di nos ta purba di ta. (Yeremias 17:10) Si di berdad nos stima husticia, E ta mira esei y lo E yuda nos soporta nos pruebanan diario. Lo E respalda nos cu su poderoso spirito santo y asina haci posibel pa nos triunfa riba e maldad cu ta reina den e mundo aki. (2 Corintionan 4:7) Tambe lo E yuda nos keda cu nos speransa firme di bida eterno riba un tera comberti den un paradijs. Ki un speransa glorioso esei ta! Nos mester ta profundamente gradicido pa esei y sirbi Yehova—e Dios berdadero cu a hacie posibel—di buena gana.

16. Kico lo bo mester tin gana di haci hunto cu miyones di otro hende?

¹⁶ Miyones di hende rond mundo gustosamente a acepta e invitacion di e salmista cu a skirbi: “O engrandece SEÑOR cu mi, y laga nos halsa su nomber hunto.” (Salmo 34:3) Yehova ta invita bo pa ta entre e creciente multitud den tur nacion cu ta engrandec’e y hals’e.

Como Repaso

• Ki clase di persona Yehova ta? Con un comprendemento cla di su cualidadnan ta beneficia nos?

• Con nos por yuda otro hende haya sa e berdad tocante Dios?

• Kico ta encera conoce Yehova su nomber y cana den su nomber?

[Plachi na pagina 14]

Yehova, den su gran amor, ‘lo habri su man y satisface e deseo di tur ser bibo’