Capitulo Nuebe
E Poder di e Speransa di Resureccion
1. Sin e speransa di resureccion, kico lo a para di e mortonan?
BO TIN sernan keri cu a muri? Si no tawatin resureccion, lo bo no tin ningun speransa di mira nan atrobe. Nan lo a keda den e condicion cu Bijbel ta describi ora e ta bisa: “Ma e mortonan no sa nada, . . . pasobra no tin ni actividad ni planificacion ni sabiduria den Seol [e graf], caminda bo ta bai.”—Eclesiastes 9:5, 10.
2. Kico e speransa maravioso di resureccion ta haci posibel?
2 Yehova den su gran misericordia a habri e oportunidad preciosisimo pa miyones di hende cu a muri bini bek for di graf y gosa di bida eterno mediante e resureccion. Esaki ta nifica cu bo por tin e speransa alentador cu un dia, den Dios su mundo nobo, lo bo ta atrobe hunto cu sernan keri cu a bai drumi den morto.—Marco 5:35, 41, 42; Echonan 9:36-41.
3. (a) Den ki maneranan e resureccion a demostra di ta importante pa Yehova cumpli cu su proposito? (b) Ki ora specialmente e speransa di resureccion ta duna nos fortalesa?
3 Como cu tin un resureccion, nos no tin nodi di tin un miedo exagera di muri. Sin causa daño permanente na su sirbidonan fiel, Yehova por permiti Satanas bai te na extremo pa comproba su acusacion malicioso cu “tur loke un hende tin e lo duna pa su bida.” (Job 2:4) Hesus a keda fiel na Dios te na morto, y pesei Dios a resucit’e pa bida den shelo. Asina Hesus por a presenta e balor di su sacrificio humano perfecto dilanti e trono celestial di su Tata, y esei a resulta den beneficio cu por salba nos bida. Via e resureccion, esnan di e “tou chikito”, como coheredero cu Cristo, tin e speransa di uni cu ne den e Reino celestial. (Lucas 12:32) Otro hende tin e speransa di un resureccion pa haya bida eterno riba tera den Paradijs. (Salmo 37:11, 29) Tur Cristian ta haya cu e speransa di resureccion ta duna nan fortalesa “mas aya di loke ta normal” ora nan ta pasa door di pruebanan dificil cu ta pone nan cara cara cu morto.—2 Corintionan 4:7, NW.
Pakico Resureccion Ta Fundamental pa Fe Cristian
4. (a) Den ki sentido e resureccion ta un “siñansa elemental”? (b) Kico e resureccion ta nifica pa mundo en general?
4 Manera ta para skirbi na Hebreonan 6:1 y 2, resureccion ta un “siñansa elemental.” E ta parti di e fundeshi di fe; y sin dje nos nunca por a bira Cristian maduro. (1 Corintionan 15:16-19) Sinembargo, pa mundo en general e siñansa biblico di resureccion ta algo straño. Como cu mas y mas hende no tin spiritualidad, nan ta kere cu ta e bida aki ta tur loke tin. Pesei nan ta biba pa placer. Tambe tin e hendenan cu ta pega na religionnan tradicional—tanto paden como pafo di Cristiandad—y nan ta pensa cu nan tin un alma inmortal, un alma cu no por muri. Pero e creencia ei no ta cuadra cu loke Bijbel ta siña tocante resureccion, pasobra resureccion lo no tawata necesario si hende tin un alma inmortal. Ora hende purba combina e dos ideanan aki, esei ta confundi nan mas cu e ta duna nan speransa. Con nos por yuda hende di curason honrado cu kier sa e berdad?
5. (a) Prome cu un persona por comprende e resureccion, kico e mester sa? (b) Cua textonan biblico lo bo uza pa splica kico ta alma? e condicion cu e mortonan ta aden? (c) Kico bo por haci si un persona ta uza un traduccion di Bijbel cu ta parce di sconde e berdad?
5 Prome cu hende asina por comprende ki un areglo maravioso e resureccion ta, nan mester tin e comprendemento corecto di kico ta alma y den ki condicion e mortonan ta. Hopi bes, un par di texto biblico so ta basta pa clarifica e asuntonan aki na un persona cu tin hamber pa e berdad biblico. (Genesis 2:7, NW; Salmo 146:3, 4; Ezekiel 18:4) Sinembargo, algun traduccion moderno di Bijbel y edicionnan traduci cu hopi libertad, ta sconde e berdad tocante alma. Pesei kisas ta necesario pa considera e expresionnan uza den e idiomanan original di Bijbel.
6. Con lo bo por yuda un persona comprende kico ta alma?
6 E Traduccion di Mundo Nobo ta specialmente balioso pa haci esaki pasobra consistentemente e ta traduci e palabra Hebreo né·fesh y e palabra Griego corespondiente psy·khé como “alma.” Den e apendix di e traduccion aki tin un lista di texto caminda bo ta haya e palabranan aki. Hopi otro version di Bijbel no ta consistente, y kisas ta traduci e mesun palabranan original aki no solamente cu “alma” sino tambe cu “criatura”, “ser”, “persona” y “bida”; “mi né·fesh” nan ta traduci “ami”, y “bo né·fesh”, como “abo.” Un comparacion entre Traduccion di Mundo Nobo y otro traduccionnan di Bijbel lo yuda un studiante sincero ripara cu e palabranan di e idioma original traduci como “alma” ta referi tanto na hende como bestia. Pero nunca e palabranan aki ta transmiti e idea cu alma ta algo invisibel, cu bo no por mishi cu ne, y cu ta sali for di e curpa ora esaki muri y sigui biba concientemente un otro caminda.
7. Usando Bijbel, con lo bo splica e condicion di esnan den Seol? den Hades? den Gehena?
7 Tambe e Traduccion di Mundo Nobo ta consistente den uza e palabra “Seol” pa skirbi e palabra Hebreo sheʼóhl y tambe den uza “Hades” pa e palabra Griego haí·des y “Gehena” pa e palabra Griego gé·en·na. “Seol” ta e ekivalente di e palabra “Hades.” (Salmo 16:10; Echonan 2:27) Bijbel ta mustra bon cla cu tanto Seol como Hades ta referi na e graf comun di humanidad y ta conecta nan cu morto, no bida. (Salmo 89:48; Revelacion 20:13) Tambe e Scritura ta presenta e speransa di por bolbe for di e graf comun mediante un resureccion. (Job 14:13; Echonan 2:31) Di otro banda, Bijbel no ta duna ningun speransa na esnan cu bai Gehena, y nunca e ta menciona cu e alma tin un existencia conciente eiden.—Mateo 10:28, NW.
8. Con un comprendemento corecto di e resureccion por influencia un persona su actitud y accionnan?
8 Despues di a splica e asuntonan ei di tal manera cu e persona ta comprende, e ora ei bo por yud’e capta kico e resureccion lo por nifica p’e. E por cuminsa aprecia e amor cu Yehova a demostra door di haci un areglo asina maravioso. E tristesa di hende cu a perde un ser keri por wordo alivia door di e anticipacion gososo di bolbe topa cu nan ser keri den Dios su mundo nobo. Pa un hende por comprende e nificacion di Cristo su morto ta crucial pa e comprende e asuntonan aki. Cristiannan di prome siglo a realisa cu e resureccion di Hesucristo ta fundamental pa e fe Cristian, pasobra el a habri caminda pa e resureccion di otro hende. Cu celo nan a predica tocante Hesus su resureccion y e speransa cu esei ta duna. Asina tambe hende djawe cu ta comprende y aprecia e resureccion ta ansioso pa comparti e berdad precioso aki cu otro hende.—Echonan 5:30-32; 10:42, 43.
Uzando ‘e Yabi di Hades’
9. Con Hesus ta uza “e yabinan di morto y di Hades”, y pa ken e ta uza nan prome?
9 Cu tempo, tur hende cu un dia lo ta hunto cu Cristo den su Reino celestial tin cu muri. Pero nan sa bon di e garantia cu el a duna ora el a bisa: “Mi tawata morto, y mira, mi ta bibo pa semper, y mi tin e yabinan di morto y di Hades.” (Revelacion 1:18) Kico e tawata kiermen? El a hala atencion na su mes experencia. E tambe a muri. Pero Dios no a lag’e den Hades. Riba e di tres dia, Yehova personalmente a lant’e pa haya bida spiritual y a dun’e inmortalidad. (Echonan 2:32, 33; 10:40) Ademas, Dios a dun’e “e yabinan di morto y di Hades” pa e uza pa libra otro hende for di e graf comun di humanidad y for di e efectonan di e pica di Adam. Como cu Hesus tin e yabinan ei, e por lanta su siguidonan fiel for di morto. Prome, e ta resucita e miembronan ungi cu spirito di su congregacion, dunando nan e precioso don di bida inmortal den shelo, mescos cu su Tata a dun’e.—Romanonan 6:5; Filipencenan 3:20, 21.
10. Na ki tempo e resureccion di e fiel Cristiannan ungi ta tuma luga?
10 Na ki tempo e fiel Cristiannan ungi lo haya e resureccion celestial ei? Bijbel ta indica cu esei a cuminsa caba. Apostel Pablo a splica cu nan lo ser lanta ‘durante Cristo su presencia’, y esei a cuminsa na 1914. (1 Corintionan 15:23, NW) Awor durante su presencia, ora e unginan fiel muri nan no tin cu keda morto te ora nan Señor bolbe. Asina cu nan muri, nan lo ser lanta den spirito, nan lo ser “transforma, den un momento, den un frega di wowo.” Esta felis nan lo ta, ya cu e bon obranan cu nan a haci “ta sigui hunto cu nan”!—1 Corintionan 15:51, 52; Revelacion 14:13.
11. Ki resureccion lo tin pa hende en general, y na ki tempo lo e cuminsa?
11 Pero e resureccion di herederonan di e Reino pa haya bida celestial no ta e unico resureccion. E echo cu Revelacion 20:6 ta yam’e “e prome resureccion” ta indica cu mester sigui un otro resureccion. Esnan cu beneficia di e otro resureccion aki lo tin e speransa felis di bida eterno den Paradijs riba tera. Na ki tempo esei lo tuma luga? E buki di Revelacion ta mustra cu esei lo ta despues cu kita “tera y shelo”, es decir, e actual sistema di cosnan malbado hunto cu su gobernantenan. Fin di e sistema bieu aki ta hopi cerca. Despues di esei, na Dios su tempo señala, e resureccion riba tera lo cuminsa.—Revelacion 20:11, 12.
12. Ken lo ta inclui entre e fielnan cu lo lanta pa bida riba tera, y dicon esaki ta un expectativa emocionante?
12 Ken lo ta inclui den e resureccion ei pa bida riba tera? Entre nan lo tin fiel sirbidonan di Yehova cu a biba hopi tempo pasa, homber y mohe cu debi na nan fe firme den e resureccion ‘no a acepta nan liberacion.’ Es decir, nan no a compromete nan integridad na Dios pa asina evita un morto violento y prematuro. Lo ta un placer pa conoce nan en persona y tende for di nan boca e detayenan di sucesonan cu Bijbel ta relata aribariba! Entre esnan cu lo resucita pa bida riba tera lo tin Abel, e prome testigo fiel di Yehova; Enoc y Noe, cu sin miedo a proclama Dios su mensahe di advertencia prome cu Dilubio; Abraham cu Sara, kendenan a mustra hospitalidad na angel; Moises, via ken Dios a duna e Lei na Sero Sinai; profetanan yen di curashi, manera Yeremias, kende a mira e destruccion di Herusalem na aña 607 prome cu Era Comun; y Huan Bautista, kende a tende Dios mes identifica Hesus como Su Yiu. Ademas, lo bai tin hopi homber y mohe fiel cu a muri durante e ultimo dianan di e sistema di cosnan malbado aki.—Hebreonan 11:4-38; Mateo 11:11.
13, 14. (a) Kico lo sosode cu Hades y e mortonan den dje? (b) Ken lo ta entre esnan resucita, y dicon?
13 Cu tempo otro hende, fuera di fiel sirbidonan di Dios, tambe lo lanta for di morto, lagando e graf comun di humanidad bashi. E manera cu Hesus lo uza e ‘yabi di Hades’ na fabor di humanidad ta duna nos un idea con bashi e graf ei lo keda. Un vision duna na apostel Huan ta mustra esei. Den e vision, Huan a mira con Hades ta “wordo tira den e lago di candela.” (Revelacion 20:14) Kico esei ta nifica? Cu Hades, e graf comun di humanidad, ta ser destrui completamente. E ta stop di existi, pasobra lo saca tur morto cu tin den dje. Si, fuera di resucita tur fiel adorado di Yehova, Hesus misericordiosamente lo lanta asta hende inhusto. E Palabra di Dios ta sigura nos: “Lo tin un resureccion di tanto e hustonan como e malbadonan.”—Echonan 24:15.
14 Lo no resucita ningun di e malbadonan aki djis pa bolbe condena nan na morto. Den e ambiente husto cu lo existi mundialmente bou di e Reino di Dios, lo yuda nan pone nan bida na harmonia cu e normanan di Yehova. E vision a mustra cu lo habri “e buki di bida.” Pues, nan lo tin e chens di laga skirbi nan nomber den esei. Nan lo ser “husga, cada un di nan segun nan obranan” cu nan haci despues di nan resureccion. (Revelacion 20:12, 13) Pues, a base di e resultado final, nan resureccion por ta “un resureccion di bida” y lo no ta inevitablemente ‘un resureccion pa ricibi huicio’ di condenacion.—Huan 5:28, 29.
15. (a) Ken lo no resucita? (b) Con conocemento di e berdad tocante resureccion mester influencia nos?
15 Sinembargo, no ta tur hende cu a yega di biba y despues a muri lo resucita. Tin hende a comete pica pa cua no ta posibel haya pordon. Hende asina no ta den Hades, sino den Gehena, caminda nan ta haya destruccion eterno. Entre esakinan lo tin tambe hende ehecuta durante e “gran tribulacion”, cu ta asina cerca awor. (Mateo 12:31, 32; 23:33; 24:21, 22; 25:41, 46; 2 Tesalonicencenan 1:6-9) Pues, maske Yehova ta mustra un misericordia extraordinario door di saca e mortonan for di Hades, e speransa di resureccion no kiermen cu nos no tin cu precupa con nos ta biba awor. No tin resureccion pa esnan cu deliberadamente ta bai contra Yehova su gobernacion supremo. E conocemento aki mester motiva nos pa hiba nos bida di acuerdo cu Dios su boluntad y asina demostra nos profundo aprecio pa su bondad inmereci.
Fortaleci door di e Speransa di Resureccion
16. Con e speransa di resureccion por duna nos gran fortalesa?
16 Nos cu di berdad ta kere den e speransa di resureccion, por haya gran fortalesa for di dje. Actualmente, ora nos bira bieu, nos sa cu nos no por pospone morto indefinidamente, maske ki procedura medico ser uza. (Eclesiastes 8:8) Si nos a sirbi Yehova fielmente hunto cu su organisacion, nos por mira futuro cu pleno confiansa. Nos sa cu via e resureccion, nos lo gosa di bida atrobe na Dios su debido tempo. Y ki un bida esei lo ta! “Bida berdadero”, manera apostel Pablo a yam’e.—1 Timoteo 6:19; Hebreonan 6:10-12.
17. Kico por yuda nos keda fiel na Yehova?
17 E echo cu tin un resureccion y cu nos sa Ken ta e fuente di esei ta yuda nos para firme den fe. Esaki ta fortifica nos pa ta fiel na Dios asta ora persiguidonan violento ta menasa nos cu morto. Pa hopi tempo Satanas a uza miedo di un morto prematuro como un manera pa tene hende den su gara. Pero Hesus no tawatin miedo di muri. El a keda fiel na Yehova te na morto. Mediante su sacrificio di rescate, Hesus a percura e medio pa libra otro hende di e miedo ei.—Hebreonan 2:14, 15.
18. Kico a yuda sirbidonan di Yehova haya un bon reputacion di integridad?
18 Como resultado di nan fe den tanto e areglo di e sacrificio di Cristo como den e resureccion, sirbidonan di Yehova a haya e bon reputacion di ta hende cu ta warda integridad, es decir, cu ta keda fiel na nan balornan. Ora a pone nan bou di presion, nan a mustra cu “nan no a stima nan bida” mas cu Yehova. (Revelacion 12:11) Sabiamente, nan no ta bandona principionan Cristian pa por salba nan bida actual. (Lucas 9:24, 25) Nan sa cu asta si nan perde nan bida actual pa motibo cu nan ta apoya fielmente Yehova su gobernacion supremo, lo E recompensa nan mediante e resureccion. Abo tin e clase di fe ei? Lo bo tine si di berdad bo stima Yehova y ta aprecia loke e speransa di resureccion realmente ta nifica.
Como Repaso
• Dicon un persona mester comprende kico ta alma y den ki condicion e mortonan ta, prome cu e por comprende y aprecia e resureccion?
• Ken lo bolbe for di morto, y con e conocemento aki mester influencia nos?
• Con e speransa di resureccion ta fortalece nos?
[Plachi na pagina 85]
Yehova ta priminti cu lo bai tin un resureccion di tanto hende husto como malbado