Capitulo Diesnuebe
Sigui Papia e Palabra di Dios cu Tur Frankesa
1. (a) Ki bon noticia e disipelnan di Hesus a proclama, pero con algun Hudiu a reacciona? (b) Kico nos lo por puntra?
CASI 2.000 aña pasa, e Yiu di Dios, Hesucristo, a ser ungi como e futuro Rei di henter mundo. Hesus a haya castigo di morto bou di instigacion di enemigonan religioso, pero Yehova a lant’e for di morto. Awor bida eterno a bira posibel via Hesus. Sinembargo, ora Hesus su disipelnan a proclama e bon noticia aki publicamente, hende a cuminsa persigui nan. Nan a cera algun disipel den prizon, y asta a suta nan y taha nan di papia tocante Hesus. (Echonan 4:1-3, 17; 5:17, 18, 40) Kico e disipelnan lo a haci? Kico abo lo a haci? Lo bo a sigui duna testimonio cu tur frankesa?
2. (a) Ki noticia maravioso mester wordo proclama den nos tempo? (b) Ken tin e responsabilidad di predica e bon noticia?
2 Na aña 1914 Hesucristo, e Rei di e Reino di Dios, a ser entronisa den shelo pa goberna ‘meimei di su enemigonan.’ (Salmo 110:2) Despues di esei, a tira Satanas y su demoñonan abou riba tera. (Revelacion 12:1-5, 7-12) Asina e ultimo dianan di e sistema malbado aki a cuminsa. Ora e periodo aki termina, Dios lo destrui henter e sistema di cosnan domina pa Satanas. (Daniel 2:44; Mateo 24:21) Esnan cu sobrevivi lo tin nan dilanti e speransa di bida eterno riba un tera cu lo bira un paradijs. Si bo a acepta e bon noticia aki, lo bo kier compartie cu otro hende. (Mateo 24:14) Pero ki reaccion bo por verwacht?
3. (a) Con hende ta reacciona riba e mensahe di Reino? (b) Ki pregunta nos tin cu contesta pa nos mes?
3 Ora bo ta proclama e bon nobo di Reino, algun hende lo ricibie cu gusto, pero mayoria lo no ta interesa. (Mateo 24:37-39) Tin hende tal bes ta haci bofon di bo of ta bai contra bo. Hesus a spierta cu kisas bo propio famia lo por bai contra bo. (Lucas 21:16-19) Kisas e oposicion ta bini tambe di hende na bo trabou of na scol. Den algun parti di mundo, gobierno a prohibi e actividad di Testigonan di Yehova. Si bo haya bo den un situacion asina, lo bo sigui papia e palabra di Dios cu curashi y “para firme den fe”?—1 Corintionan 16:13.
No Confia den Nos Mes Forsa
4. (a) Kico ta un rekisito esencial si nos kier ta fiel sirbido di Dios? (b) Dicon reunionnan Cristian ta asina importante?
4 Pa nos ta fiel sirbido di Yehova ta esencial pa nos confia den loke El a percura pa nos bienestar spiritual. Un di esakinan ta reunionnan di congregacion. E Scritura ta urgi nos pa no neglisha nan. (Hebreonan 10:23-25) Hende cu a sigui como fiel Testigo di Yehova a haci esfuerso vigoroso pa asisti regularmente na reunion hunto cu compañeronan di adoracion. Na e reunionnan aki nos ta aumenta nos conocemento di e Scritura. Tambe nos ta haya comprendemento mas profundo di berdadnan bon conoci, y ta bira mas conciente di maneranan cu nos por aplica nan. Nos ta bira mas pega cu nos rumannan Cristian den adoracion uni y ta haya mas fortalesa pa haci Dios su boluntad. Yehova su spirito ta percura guia via e congregacion, y mediante e spirito ei, Hesus ta meimei di nos.—Mateo 18:20; Revelacion 3:6.
5. Ora e actividad di Testigonan di Yehova ta prohibi, kico ta pasa cu e reunionnan?
5 Bo ta asisti regularmente na tur reunion, y bo ta aplica personalmente loke ta ser trata na reunion? Tin biaha, ora e actividad di Testigonan di Yehova ta prohibi, ta necesario pa tene e reunionnan den grupo chikito na casnan priva. E luga y ora por varia y kisas no ta semper cumbiniente, ya cu tin reunion ta ser teni anochi laat. Pero apesar di incumbiniencia personal of peliger, rumannan fiel ta haci esfuerso sincero pa ta presente na tur reunion.
6. Con nos ta demostra cu nos ta confia den Yehova, y con esaki por yuda nos sigui papia cu tur frankesa?
6 Nos ta desaroya confiansa den Yehova door di acudi regularmente na Dje den oracion sincero, realisando cu nos tin mester di Dios su yudansa. Abo ta haci esei? Hesus a haci oracion cu frecuencia durante su ministerio riba tera. (Lucas 3:21; 6:12, 13; 22:39-44) Y e anochi prome cu nan a clab’e na staca, el a urgi su disipelnan: “Keda vigila y haci oracion, pa boso no cai den tentacion.” (Marco 14:38) Si nos ta haya hopi hende cu no ta interesa den e mensahe di Reino, nos lo por sinti gana di baha man na nos sirbishi. Si hende ta haci bofon di nos of ta persigui nos, kisas nos ta sinti gana di stop di predica pa evita problema. Pero si sinceramente nos ta pidi Dios den oracion pa su spirito yuda nos sigui papia cu tur frankesa, nos lo haya fortalesa pa no entrega na e deseonan ei.—Lucas 11:13; Efesionan 6:18-20.
Un Registro di Duna Testimonio cu Tur Frankesa
7. (a) Dicon e registro den Echonan ta specialmente interesante pa nos? (b) Contesta e preguntanan cu tin na fin di e paragraf aki, enfatisando con e informacion por beneficia nos.
7 E registro cu tin den e buki di Echonan ta specialmente interesante pa nos tur. E ta conta nos con e apostelnan y otro disipelnan di prome siglo—hende cu tawatin sintimento mescos cu nos—a vence obstaculo y a duna prueba di ta testigonan fiel di Yehova cu curashi. Laga nos examina un parti di e registro ei cu yudansa di e siguiente preguntanan y textonan biblico. Segun cu nos ta haci esei, considera con bo por beneficia personalmente di loke bo ta lesa.
E apostelnan tawata hombernan bon educa? Nan tawata hende cu di naturalesa tawatin curashi, sin importa kico pasa? (Huan 18:17, 25-27; 20:19; Echonan 4:13)
Kico a duna Pedro curashi pa papia dilanti e corte Hudiu cu a condena e propio Yiu di Dios? (Mateo 10:19, 20; Echonan 4:8)
Kico e apostelnan tawata haci durante e simannan prome cu nan a wordo hiba dilanti di Sanedrin? (Echonan 1:14; 2:1, 42)
Ora e gobernantenan a taha e apostelnan di predica den nomber di Hesus, kico Pedro cu Huan a contesta? (Echonan 4:19, 20)
Despues cu e apostelnan a haya nan libertad, na ken nan a bolbe acudi pa yudansa? Nan a pidi pa e persecucion stop, of kico nan a pidi? (Echonan 4:24-31)
Kico Yehova a uza pa yuda nan ora opositor a purba stop e trabou di predica? (Echonan 5:17-20)
Con e apostelnan a demostra cu nan a comprende e motibo pakico nan a haya nan libertad? (Echonan 5:21, 41, 42)
Asta ora hopi di e disipelnan a plama bai otro caminda debi na persecucion, kico nan a sigui haci? (Echonan 8:3, 4; 11:19-21)
8. Ki resultadonan emocionante e predicacion di e prome disipelnan tawatin, y con bini nos tin un participacion den e mesun sirbishi?
8 E trabou di predica e bon nobo no tawata en vano. Rond di 3.000 disipel a batisa na Pentecoste di aña 33 Era Comun. “Constantemente tawata bin mas y mas hende acerca cu tawata kere den Señor, multitudnan di homber y mohe.” (Echonan 2:41; 4:4; 5:14) Cu tempo, asta un persiguido feros di Dios su pueblo, Saulo di Tarso, a bira un Cristian y a cuminsa duna testimonio di e berdad cu curashi. El a bira miho conoci como apostel Pablo. (Galationan 1:22-24) E trabou cu a cuminsa den prome siglo no a stop. E actividad ei a aumenta den e ultimo dianan aki y a yega den tur skina di mundo. Nos tin e privilegio di participa den dje, y segun cu nos ta haci esei, nos por siña di e ehempel di testigonan fiel cu a sirbi prome cu nos.
9. (a) Pablo a probecha di ki oportunidadnan pa e duna testimonio? (b) Den ki maneranan abo ta plama e mensahe di Reino na otro hende?
9 Kico Pablo a haci ora el a siña e berdad tocante Hesucristo? “Mesora el a cuminsa proclama Hesus . . . , bisando: ‘E ta e Yiu di Dios.’” (Echonan 9:20) El a aprecia e bondad inmereci cu Dios a mustra na dje, y el a realisa cu tur hende tin cu tende e bon noticia cu el a ricibi. Pablo tawata un Hudiu, y segun e custumber di e tempo ei, el a bai na e sinagoganan pa duna testimonio. Tambe el a predica di cas pa cas y a rasona cu hende na plasa. E tawata dispuesto pa muda bai teritorionan nobo pa predica e bon noticia.—Echonan 17:17; 20:20; Romanonan 15:23, 24.
10. (a) Con Pablo, maske e tawatin tur frankesa, a mustra comprendemento den e manera cu el a duna testimonio? (b) Con nos por refleha e cualidadnan di Pablo ora nos ta duna testimonio na famia, colega y compañero di scol?
10 Pablo a papia cu tur frankesa pero tambe a mustra comprendemento, y esei ta loke nos tambe mester haci. Cu Hudiu el a basa su combersacion riba e promesanan cu Dios a haci na nan antepasadonan. Cu Griego el a basa su combersacion riba e cosnan cu nan tawata familiarisa cu ne. Tawatin biaha cu el a uza su mes experencia tempo el a conoce e berdad como un medio pa duna testimonio. El a bisa: “Mi ta haci tur cos pa causa di e bon nobo, pa mi por bira un participante di dje cu otronan.”—1 Corintionan 9:20-23, NW; Echonan 22:3-21.
11. (a) Kico Pablo a haci pa evita cu cada bes tawatin confrontacion cu hende cu tawata contra? (b) Ki ora ta sabi pa nos imita Pablo su ehempel, y den ki manera? (c) Di unda e poder pa sigui papia cu curashi ta bini?
11 Ora cu debi na oposicion a parce cu tawata miho pa Pablo bai predica den un otro area pa un tempo, el a haci esei en bes di sigui busca confrontacion cu esnan cu tawata contra dje. (Echonan 14:5-7; 18:5-7; Romanonan 12:18) Pero nunca e tawatin berguensa di e bon nobo. (Romanonan 1:16) Aunke Pablo no a gusta e trato insolente—asta violento—cu el a haya na man di hende cu tawata contra, toch “den nos Dios [e] tawatin e curashi” pa sigui predica. El a bisa: “Señor a para na mi lado y a fortalece mi, pa door di mi e predicamento wordo cumpli totalmente.” (1 Tesalonicencenan 2:2; 2 Timoteo 4:17) Hesus, Cabes di e congregacion Cristian, ta sigui duna nos e poder cu nos mester pa haci e trabou cu el a profetisa pa nos tempo.—Marco 13:10.
12. Kico ta duna prueba di curashi Cristian, y kico ta e base pa esei?
12 Nos tin tur motibo pa sigui papia e palabra di Dios cu tur frankesa y curashi, manera Hesus y e otro fiel sirbidonan di Dios a haci den prome siglo. Esaki no ta nifica cu nos ta demostra falta di consideracion of ta forsa hende pa nan tende nos mensahe toch. Pero nos no ta entrega pasobra hende no ta interesa; ni nos no ta keda keto pasobra tin hende cu ta contra. Mescos cu Hesus, nos ta hala atencion na e Reino di Dios como e gobierno legitimo pa henter mundo. Nos ta papia cu confiansa pasobra nos ta representa Yehova, e Soberano di universo, y pasobra e mensahe cu nos ta proclama no ta bini di nos sino for di Dje. Y ta nos amor pa Yehova mester ta e motibo mas fuerte cu ta pone nos alab’e.—Filipencenan 1:27, 28; 1 Tesalonicencenan 2:13.
Como Repaso
• Dicon ta importante pa nos comparti e mensahe di Reino cu tur hende posibel, pero ki reaccion nos por verwacht?
• Con nos por demostra cu nos no ta confia den nos mes forsa pa sirbi Yehova?
• Ki lesnan balioso nos ta siña for di e buki di Echonan?
[Plachi na pagina 173]
Mescos cu den pasado, Yehova su sirbidonan djawe ta papia e palabra di Dios cu curashi