Capitulo Binti
Tene e Dia di Yehova Bon na Mente
1. Con bo a sinti ora bo a siña cu pronto Yehova lo libra nos di e dolonan di e sistema bieu aki?
UN DI e prome cosnan cu bo a siña for di Bijbel ta Yehova su proposito pa haci henter e tera un paradijs. Den e mundo nobo ei lo no tin guera, crimen, pobresa, malesa, sufrimento ni morto mas. Asta e mortonan lo haya bida bek. Ki un futuro maravioso! Loke ta comproba cu tur e cosnan ei ta cerca di cumpli ta e echo cu Cristo su presencia invisibel como Rei na mando a cuminsa na aña 1914 y cu for di e tempo ei padilanti nos ta den e ultimo dianan di e mundo malbado aki. Ora fin di e ultimo dianan aki yega, Yehova lo destrui e sistema di cosnan aki y introduci e mundo nobo priminti!
2. Kico ta “e dia di Yehova”?
2 Bijbel ta yama e benidero dia di destruccion aki “e dia di Yehova.” (2 Pedro 3:10, NW) E ta “e dia di e rabia di SEÑOR” contra henter e mundo di Satanas. (Sofonias 2:3) E ta culmina den “e guera di e gran dia di Dios Todopoderoso . . . , cu na lenga Hebreo yama Armagedon.” Den e guera ei “e reinan di henter mundo” lo ser destrui. (Revelacion 16:14, 16) Bo bida ta demostra cu bo ta combenci cu e “dia di Yehova” aki ta cerca?—Sofonias 1:14-18; Yeremias 25:33.
3. (a) Ki tempo e dia di Yehova lo yega? (b) Pakico ta bon cu Yehova no a revela “e dia y e ora ei”?
3 Bijbel no ta duna nos e fecha exacto cu Hesucristo lo bini como Esun cu Yehova ta uza pa ehecuta huicio contra e sistema di cosnan di Satanas. Hesus a bisa: “Di e dia y e ora ei ni un hende no sa, ni e angelnan den shelo tampoco, ni e Yiu, sino e Tata so.” (Marco 13:32) Esnan cu no ta echt stima Yehova lo tin e inclinacion di pospone su dia den nan mente y bai ocupa nan mes cu actividadnan di mundo. Pero esnan cu di berdad ta stima Yehova lo sirbie di henter alma, sin worry ki dia e fin di e mal sistema di cosnan aki ta yega.—Salmo 37:4; 1 Huan 5:3.
4. Ki advertencia Hesus a duna?
4 Den un palabra di advertencia na tur hende cu stima Yehova, Hesus ta bisa: “Tene cuidou, keda alerta, pasobra boso no sa ki ora e tempo ta yega.” (Marco 13:33-37) El a urgi nos pa no laga comemento y bebemento ni “precupacionnan di bida” absorba nos atencion asina tanto cu nos ta perde for di bista e seriedad di nos tempo.—Lucas 21:34-36; Mateo 24:37-42.
5. Manera Pedro a splica, kico e dia di Yehova lo trece?
5 Pedro tambe a conseha nos pa tene bon na mente “e dia di Dios, pa cual motibo e shelonan lo wordo destrui door di kimamento, y e elementonan lo dirti di calor intenso.” Tur gobierno humano—“e shelonan” lo ser destrui. Destruccion lo bini tambe riba e sociedad humano malbado en general—“e tera”—y su “elementonan”, e ideanan y actividadnan di e mundo malbado aki, manera por ehempel mundo su actitud independiente di Dios y su estilo di bida inmoral y materialista. Lo remplasa esaki cu “shelonan nobo [Dios su Reino celestial] y un tera nobo [un sociedad nobo riba tera], den cual ta biba husticia.” (2 Pedro 3:10-13) E sucesonan devastador aki lo tuma luga diripiente y riba un dia y ora inespera.—Mateo 24:44.
Keda Alerta pa e Señal
6. (a) Te na ki grado Hesus su contesta riba e pregunta di su disipelnan a aplica na e fin di e sistema Hudiu? (b) Ki porcion di Hesus su contesta ta enfoca atencion riba suceso- y actitudnan di aña 1914 padilanti?
6 En bista di e tempo cu nos ta biba aden, nos mester ta bon na haltura di e detayenan di e señal combina cu ta identifica e ultimo dianan, “e conclusion di e sistema di cosnan.” Corda cu ora Hesus a contesta e pregunta di su disipelnan, cu ta para skirbi na Mateo 24:3 [NW], algun di e cosnan cu el a describi den versiculo 4 te cu 22 a cumpli na un escala chikito riba e nacion Hudiu y nan sistema di bida entre aña 33 pa 70 Era Comun. Pero e profecia tawatin su cumplimento principal for di aña 1914 padilanti, e tempo di Cristo su “presencia y di e conclusion di e sistema di cosnan.” Mateo 24:23-28 ta conta kico lo a tuma luga for di aña 70 Era Comun te na e tempo di Cristo su presencia. E desaroyonan describi na Mateo 24:29–25:46 ta tuma luga durante e tempo di fin.
7. (a) Dicon cada un di nos mester ta alerta pa e manera cu condicionnan actual ta cumpli cu e señal? (b) Contesta e preguntanan na fin di e paragraf aki pa mustra con e señal a cuminsa cumpli for di 1914.
7 Cada un di nos mester ta alerta pa sucesonan y actitudnan cu ta cumpli cu e señal. Conectando esakinan cu profecia biblico lo yuda nos tene e dia di Yehova bon na mente. Tambe nos lo por ta mas combencente ora nos ta spierta otro hende cu e dia ei ta hopi cerca. (Isaias 61:1, 2) Cu e metanan ei na mente, laga nos repasa e siguiente preguntanan cu ta destaca cierto parti di e señal, cu ta para skirbi na Mateo 24:7 y Lucas 21:10 y 11.
Den ki manera extraordinario e profecia cu “nacion lo lanta contra nacion, y reino contra reino” a cumpli cuminsando na 1914? Pa loke ta guera, kico a pasa for di e tempo ei padilanti?
Na 1918, cua pest a mata mas hende cu Prome Guera Mundial? Apesar di hende su conocemento medico, cua malesanan ainda ta mata miyones di persona?
Te na ki grado scarsedad di cuminda a afecta mundo apesar di e adelantonan cientifico di siglo pasa?
Kico ta combence bo cu 2 Timoteo 3:1-5 y 13 ta describi, no con bida semper tawata, sino con e situacion actual ta empeorando segun cu nos ta yegando fin di e ultimo dianan?
Separacion di Hende
8. (a) Kico mas, describi na Mateo 13:24-30 y 36-43, Hesus a asocia cu fin di e tempo aki? (b) Kico e ilustracion di Hesus ta nifica?
8 Tin mas desaroyonan importante cu Hesus a asocia cu fin di e tempo aki. Un di nan ta e separacion di “e yiunan di e reino” for di “e yiunan di e malbado.” Hesus a papia di esaki den su parabola of comparacion tocante un cunucu sembra cu trigo. Un enemigo a bini y sembra yerba shimaron meimei di e trigo. “E trigo” den su ilustracion ta representa e berdadero Cristiannan ungi. “E yerba shimaron” ta hende cu ta bisa cu nan ta Cristian pero cu ta duna prueba di ta “yiunan di e malbado” pasobra nan ta pega na e mundo cu Diabel ta manda riba dje. E personanan aki ta ser separa for di “e yiunan di [Dios su] reino” y marca pa destruccion. (Mateo 13:24-30, 36-43) Di berdad e separacion aki a tuma luga?
9. (a) Despues di Prome Guera Mundial, ki gran separacion di tur hende cu tawata bisa cu nan ta Cristian a tuma luga? (b) Con Cristiannan ungi a duna prueba cu nan ta e berdadero sirbidonan di e Reino?
9 Despues di Prome Guera Mundial, tur hende cu tawata bisa cu nan ta Cristian a keda separa den dos grupo: (1) E pastornan di Cristiandad y nan siguidonan, cu publicamente a declara nan apoyo fuerte na e Liga di Nacionnan (awor Nacionnan Uni) y na mesun tempo a keda tene duro na nacionalismo, y (2) Cristiannan berdadero di e temporada despues di guera, cu a duna nan pleno sosten na Dios su Reino Mesianico y no na e nacionnan di e mundo aki. (Huan 17:16) E di dos grupo aki a duna prueba di ta e berdadero sirbidonan di e Reino di Dios door di acepta e tarea di predica “e evangelio aki di e reino” rond mundo. (Mateo 24:14) Cu ki resultado?
10. Kico tawata e prome resultado di e actividad di predica e Reino?
10 E resto di esnan ungi cu Dios su spirito, kendenan tin e speransa di ta hunto cu Cristo como parti di e Reino celestial, tawata e promenan pa ser recohe. Aunke e personanan ei tawata plama den e nacionnan, a trece nan den un solo organisacion. E seyamento final di e unginan aki ta cerca.—Revelacion 7:3, 4.
11. (a) Ki trabou di recohemento ta sigui te awe, y na harmonia cu cua profecia? (b) Kico cumplimento di e profecia aki ta nifica?
11 Despues, bou di guia di Cristo, a cuminsa reuni “un multitud grandi . . . di tur nacion y tur tribu y pueblo y lenga.” Esakinan ta forma e “otro carnenan” cu lo sobrevivi “e gran tribulacion” y drenta den Dios su mundo nobo. (Revelacion 7:9, 14; Huan 10:16) E trabou aki di predica e Reino di Dios prome cu e fin bini, ta sigui te awe. Fielmente e multitud grandi di otro carne, cu awor ta consisti di miyones di hende, ta yuda e resto ungi duna publicidad na e mensahe vital di e Reino. Den tur nacion hende ta tende e mensahe aki.
Kico Ta Bai Sosode den Futuro?
12. Cuanto tempo mas nos tin cu predica prome cu e dia di Yehova yega?
12 Tur e evidencia menciona ariba ta nifica cu nos ta cerca di e fin di e ultimo dianan y cu Yehova su dia ta dilanti porta. Pero tin mas profecia cu tin cu cumpli prome cu e dia inspirador di temor ei cuminsa? Si. Pa cuminsa, ainda no a caba di separa hende en conexion cu e cuestion di Reino. Den algun area caminda pa añanan tawatin oposicion intenso, awor tin un aumento di disipel nobo. Asta caminda hende ta rechasa e bon nobo, Yehova su misericordia ta keda demostra ora nos ta duna testimonio. Pues, sigui cu e trabou! Hesus ta sigura nos cu ora e trabou ta cla, e fin lo bini.
13. Manera ta para skirbi na 1 Tesalonicencenan 5:2 y 3, ki suceso remarcabel tin cu tuma luga ainda, y kico esei lo nifica pa nos?
13 Segun un otro profecia biblico sumamente importante: “Mientras cu nan ta bisa: ‘Pas y siguridad!’ perdicion lo bin riba nan diripiente, manera dolo di parto riba un mohe na estado; y nan lo no scapa.” (1 Tesalonicencenan 5:2, 3) Tempo lo mustra con e proclamacion ei di “pas y siguridad” lo tuma luga. Pero un cos ta sigur, lo e no nifica cu lidernan di mundo realmente a soluciona e problemanan di humanidad. E proclamacion ei lo no gaña hende cu ta tene Yehova su dia bon na mente. Nan sa cu mesora despues di esei, destruccion repentino lo bini.
14. Ki sucesonan lo tuma luga durante e gran tribulacion, y den ki secuencia?
14 Na comienso di e gran tribulacion, e gobernantenan lo bira contra Babilonia e Grandi, e imperio mundial di religion falso, y lo destru’e. (Mateo 24:21; Revelacion 17:15, 16) Despues di esei, e nacionnan lo bira contra esnan cu ta sostene Yehova su gobernacion supremo. Esaki lo proboca Yehova su furia contra gobiernonan politico y nan apoyadonan, y lo resulta den nan destruccion completo. Esei lo ta Armagedon, e culminacion di e gran tribulacion. Anto Satanas y su demoñonan lo ser tira den abismo, y lo no por influencia humanidad mas. Esaki lo conclui e dia di Yehova, ora cu su nomber lo ser santifica.—Ezekiel 38:18, 22, 23; Revelacion 19:11–20:3.
15. Dicon lo no ta sabi pa rasona cu e dia di Yehova ta hopi leu ainda?
15 Fin di e sistema aki lo bini precis na ora, segun Dios su orario. Lo e no ta laat. (Habacuk 2:3) Corda cu e destruccion di Herusalem na aña 70 Era Comun a bini rapidamente, ora cu e Hudiunan no a sper’e, ora cu nan a pensa cu e peliger a pasa. Y kico di antiguo Babilonia? E tawata poderoso, sigur di su mes y fortifica cu murayanan inmenso. Pero el a cai den un solo anochi. Asina tambe, destruccion repentino lo bini riba e mal sistema di cosnan aki. Ora e sosode, lag’e haya nos uni den adoracion berdadero, teniendo e dia di Yehova bon na mente.
Como Repaso
• Dicon ta vital pa tene e dia di Yehova bon na mente? Con nos por haci esei?
• E separacion di hende cu ta tumando luga tin ki influencia riba nos personalmente?
• Kico tin cu sosode den futuro ainda prome cu e dia di Yehova cuminsa? Pues, kico cada un di nos mester ta haciendo?
[Plachi na pagina 180]
Pronto e ultimo dianan lo termina ora destrui e sistema di Satanas