Hoben—Kico Lo Bo Haci cu Bo Bida?

“MI KIER saca lo mihor for di bida.” Asina un mucha muher teenager a bisa. Sin duda abo tambe kier esey. Pero, con bo ta saca “lo mihor” for di bida? Medionan di comunicacion y bo pareunan, kisas hasta bo maestronan, talbes ta bisa cu bo por logra esey door di gana hopi placa y gosa di un carera prestigioso, cu otro palabra, ser un persona exitoso!

Sinembargo, Bijbel ta spierta hobennan cu buscamento di exito material ta mescos cu “coremento tras di biento.” (Eclesiastes 4:4) Un motibo ta cu masha poco hoben ta logra yega na rikesa y fama. Esnan cu logra mes sa keda hopi desilusiona. Un hoben Britanico cu a sigui un carera academico prestigioso a bisa: “Exito material ta manera un caha bashi. Ora bo habrie, no tin nada den dje.” Ta berdad cu tin bes un trabou por trece rikesa y reconocemento. Pero e no por satisface bo “necesidad spiritual.” (Mateo 5:3) Ademas, 1 Juan 2:17 ta spierta nos cu “mundo ta pasa bay.” Hasta si bo logra alcansa exito den e mundo aki, esaki lo no dura hopi.

Eclesiastes 12:1 ta anima hobennan: “Corda ... riba bo Creador den e dianan di bo hubentud.” Si, e mihor manera pa uza bo bida ta den e sirbishi di Jehova Dios. Pero pa bo ta den e sirbishi di Dios, bo mester cualifica prome. Kico bo mester haci pa cualifica? Y kico kiermen sirbi Dios?

Con pa Cualifica pa Bira un Testigo di Jehova

Pa cuminsa, bo mester cultiva un deseo pa sirbi Dios. E deseo ey no ta bin automaticamente, ni si bo mayornan ta cristian. Bo mester forma bo propio relacion cu Jehova. Un mucha muher teenager a bisa: “Oracion ta yuda bo haya bo propio relacion cu Jehova.”—Salmo 62:8; Santiago 4:8.

Romanonan 12:2 ta hala atencion na un otro cos cu bo mester haci. E ta bisa: “Comproba pa boso mes kico ta e boluntad di Dios, cu ta bon, agradabel y perfecto.” Abo tin duda tocante algun cos cu bo a siña? Si ta asina, sigui e spiertamento di Bijbel y ‘comproba pa bo mes’ si e cosnan aki ta berdad! Investiga pa bo mes. Lesa Bijbel y publicacionnan basa riba Bijbel. Pero, pa bo siña tocante Dios no ta bo mente so bo tin cu uza. Tuma tempo pa medita riba loke bo ta lesa di manera cu e informacion, na moda di papia, ta baha den bo curason. Esaki lo pone bo amor pa Dios crece.—Salmo 1:2, 3.

Despues, purba comparti loke bo ta siña na un manera informal; kisas cu bo compañeronan di scol. E siguiente paso ta predica di cas pa cas. De bes en cuando lo bo por topa un compañero di scol ora bo ta predica. Na cuminsamento esaki por haci bo nervioso. Pero Bijbel ta conseha nos pa no tene “berguensa di declara e bon noticia.” (Romanonan 1:16) Bo ta hibando un mensahe di bida y speransa! Pakico tene berguensa di dje?

Si bo mayornan ta cristian, kisas ya caba bo ta compaña nan den e trabou di predica. Pero, bo por haci mas cu djis para na porta sin bisa nada of simplemente laga revista cu tratado? Bo mes por papia na porta, uzando bo Bijbel pa siña e doño di cas algo? Si no ta asina, busca yudansa cerca bo mayornan of cerca un miembro maduro di e congregacion. Pone meta pa bo cualifica como un publicador no batisa di e bon noticia!

Cu tempo, lo bo sinti bo motiva pa haci un dedicacion, es decir, un promesa solem na Dios cu lo bo sirbie pa e resto di bo bida. (Romanonan 12:1) Sinembargo, dedicacion no ta simplemente un asunto personal. Dios ta rekeri pa nos tur “haci declaracion publico ... pa haya salbacion.” (Romanonan 10:10) Na momento cu bo ta bay batisa, bo ta haci un declaracion verbal di bo fe prome. Anto despues bo ta batisa den awa. (Mateo 28:19, 20) En berdad bautismo ta un paso serio. Pero no keda sin hacie pasobra bo ta sinti cu lo bo por faya di un manera of otro. Si bo depende riba Dios pa haya fortaleza, e lo duna bo “e poder cu ta surpasa esun di hende” pa yuda bo para firme.—2 Corintionan 4:7; 1 Pedro 5:10.

Ora bo batisa, bo ta bira un Testigo di Jehova. (Isaias 43:10) Esaki mester tin un impacto grandi riba e manera cu bo ta bay uza bo bida. Dedicacion ta encera ‘nenga bo mes.’ (Mateo 16:24) Kisas lo bo por legomay algun meta y ambicion personal cu bo tabatin y “busca prome e reino di Dios.” (Mateo 6:33) Pues, dedicacion y bautismo ta duna bo hopi oportunidad pa haci esey. Laga nos considera algun di nan.

Oportunidadnan pa Sirbi Dios Full-Time

● Sirbishi di pionero ta un oportunidad asina. Un publicador pionero ta un cristian ehemplar y batisa cu a haci areglo pa dedica un minimo di 70 ora pa luna predicando e bon noticia. Pa bo desaroya bo habilidad di predica y di siña hende, bo tin cu aumenta e cantidad di ora cu bo ta traha den sirbishi di veld. Hopi pionero a experencia e goso di yuda nan studiantenan di Bijbel bira Testigo batisa. Cua otro trabou lo por ta mes excitante y duna bo e mesun satisfaccion?

Pa cubri nan gastonan, mayoria pionero ta traha part-time. Hopi di e pioneronan aki ta plania delanta pa e responsabilidad aki door di siña un ofishi na scol of for di nan mayornan. Si abo cu bo mayornan ta haya cu lo ta mihor pa bo obtene mas entrenamento despues di scol secundario, haci sigur cu bo motivacion ta pa sostene bo mes den bo sirbishi y kisas sirbi full-time como pionero y no pa gana hopi placa.

Sinembargo, e cos principal den bida di un pionero no ta su trabou, sino su sirbishi—yuda otro hende haya bida! Pakico no pone e sirbishi di pionero como bo meta personal? E sirbishi di pionero hopi bes ta hiba na otro privilegionan. Por ehempel, algun pionero ta muda bay caminda tin mas necesidad di publicador di Reino. Tin di nan ta siña otro idioma y ta sirbi sea den un congregacion local di otro idioma of hasta na otro tera. Si, e sirbishi di pionero ta un estilo di bida cu ta duna hopi satisfaccion!

● Scol Biblico pa Pareha Cristian ta un otro oportunidad. E scol aki ta duna parehanan casa un entrenamento special pa Jehova y su organisacion por uza nan mas plenamente. Hopi di e graduadonan ta haya asignacion pa sirbi caminda tin necesidad den nan mes pais. Otronan, si nan circunstancia ta permiti, ta haya asignacion pa sirbi den un otro pais. Esnan cu caba e scol ey ta ser asigna temporalmente como pionero special pa cuminsa y expande e trabou di predica den areanan isola.

● Scol Biblico pa Ruman Homber Soltero ta pa entrena anciano y sirbidor ministerial cualifica cu ta soltero. E curso intensivo di ocho siman ta trata temanan manera e responsabilidad di anciano y sirbidor ministerial, organisacion y dunamento di discurso. Algun di nan ta haya asignacion pa sirbi den nan propio pais. Y otronan ta haya invitacion pa sirbi na un otro pais.

● Sirbishi di Betel ta encera sirbi como boluntario na un di e sucursalnan di Testigonan di Jehova. Algun miembro di e famia di Betel ta sirbi directamente den e produccion di literatura biblico. Otronan ta asigna cu trabou cu ta yuda pa e produccion di literatura biblico por sigui, por ehempel mantenemento di e edificionan y ekipo of percura fisicamente pa e famia di Betel. Cada asignacion ta un privilegio sagrado di sirbishi na Jehova. Y esnan cu ta traha na Betel tin e goso di sa cu sea loke sea nan ta haci eynan, e ta beneficia un cantidad grandi di ruman rond mundo.

Sucursal sa invita rumannan cu tin cierto ofishi of specialisacion pa sirbi na Betel. Sinembargo, mayoria ruman ta ricibi nan entrenamento despues cu nan drenta Betel. Esnan cu ta na Betel no ta traha eynan pa gana placa, sino mas bien nan ta satisfecho cu e cuminda y alohamento cu nan ta haya, y tambe cu e zakgeld cu nan ta haya pa cubri gastonan personal. Un miembro hoben di e famia di Betel a describi su sirbishi asin’aki: “E ta tremendo! E rutina no ta facil, pero mi a ricibi hopi bendicion sirbiendo akinan.”

● Sirbishi internacional ta permiti bo participa den construccion di edificionan di sucursal y Salonnan di Reino. Sirbidornan internacional, manera nan yama, ta biaha bay otro tera pa yuda den tal trabou di construccion. Esaki ta un forma di sirbishi sagrado, mescos cu e trabou di esnan cu a construi e tempel di Salomon. (1 Reynan 8:13-18) Pa e sirbidornan internacional tin mesun areglo di cuido cu pa e famia di Betel. E rumannan aki tin un privilegio masha grandi di sirbi den e campo di actividad aki pa e alabanza di Jehova!

Sirbi Jehova cu Henter Bo Alma

E mihor manera pa uza bo bida ta di sirbi Jehova. Pakico no pone un meta personal pa sirbi Dios full-time? Papia cu bo mayornan, e ancianonan di bo congregacion y cu bo superintendente di circuito tocante sirbishi full-time. Si bo ta interesa den Betel, e Scol Biblico pa Ruman Homber Soltero of e Scol Biblico pa Pareha Cristian, asisti na e reunionnan cu nan ta tene pa esnan interesa durante asambleanan di circuito y congresonan di districto.

Ta berdad cu no ta tur hende por sirbi den e trabou full-time of ta cualifica pa esey. Tin bes problema di salud, situacion financiero y obligacionnan di famia ta limita loke bo por haci. Sinembargo, tur Cristian dedica mester haci caso di e mandamento biblico: “Stima Jehova bo Dios cu henter bo curason, cu henter bo alma y cu henter bo mente.” (Mateo 22:37) Jehova ta rekeri pa bo haci bo best te caminda bo circunstancia ta permiti. Pues, den ki situacion cu bo por ta, haci sirbishi na Jehova e enfoke di bo bida. Pone metanan realistico den bo sirbishi na Dios. Si, ‘corda riba bo Creador den e dianan di bo hubentud’ y lo bo ser bendiciona eternamente pa esey!