Obediencia Ta Scapa Bo

LO BO gusta si bo por a haci tur loke bo kier? Tin biaha, bo no sa pensa: ‘Mare nunca ningun hende no tin cu bisa mi kico pa haci’? Bisa mi di berdad berdad kico bo ta pensa.—

Pero kico ta miho pa bo? Di berdad ta sabi pa bo haci tur loke bo kier? Of cos ta bai bo miho ora bo haci loke bo tata cu bo mama bisa bo?— Dios ta bisa cu bo mester obedece bo mayornan, esta, haci loke nan bisa bo. Y si Dios bisa bo cu bo mester obedece, mester tin un bon motibo. Laga nos wak si nos por saca afo kico ta e motibo.

Cuanto aña bo tin?— Bo sa cuanto aña bo tata tin?— Cuanto aña bo mama, bo wela of bo welo tin?— Nan a biba hopi mas tanto tempo cu bo. Y mas un hende biba, mas tanto tempo e tin pa siña cos. E ta tende mas tanto cos, mira mas tanto cos y haci mas tanto cos cada aña cu pasa. Pesei hende jong por siña for di hende mas grandi.

Bo conoce un mucha cu ta mas chikito cu bo?— Ken sa mas tanto cos, abo of e?— Dicon abo sa mas cos cu ne?— Door cu abo a biba mas hopi tempo. Bo tawatin mas tempo cu ne pa siña cos.

Anto ta ken a biba mas hopi tempo cu abo, ami y tur otro hende?— Si, Yehova Dios. E sa mas cu abo, y e sa mas cu ami. Ora e bisa nos pa haci un cos, nos por tin sigur cu e cos ei ta bon, asta ora ta un cos dificil. Bo tawata sa cu un biaha asta e Gran Maestro a haya cu ta dificil pa e haci loke Dios a bis’e?—

Un biaha Dios a pidi Hesus haci un cos hopi dificil. Hesus a resa na Dios tocante e cos ei, manera nos ta mira aki. El a bisa Dios: “Si ta bo boluntad, kita e copa aki for di mi.” Door di pidi e cos aki, Hesus a mustra cu no semper ta facil pa haci loke Dios kier. Pero con Hesus a caba su oracion? Abo sa?—

Hesus a cab’e bisando: ‘No laga mi boluntad, ma di bo sosode.’ (Lucas 22:41, 42) Si, e tawata kier pa Dios su boluntad sosode, no su mes boluntad. E ora ei el a dal bai y haci loke Dios tawata kier, no loke e a pensa cu lo ta miho.

Kico e cos aki ta siña nos?— Nos ta siña cu semper ta corecto pa haci loke Dios ta bisa, asta ora no ta facil. Pero nos ta siña un cos mas tambe. Bo sa ta kico?— Nos ta siña cu Dios y Hesus no ta e mesun persona, manera tin hende ta bisa. Yehova Dios ta mas bieu cu su Yiu Hesus, y e sa mas tanto cos cu Hesus.

Ora nos obedece Dios nos ta mustra cu nos ta stim’e. Bijbel ta bisa: ‘Esaki ta loke e amor di Dios ta nifica, cu nos ta cumpli cu su mandamentonan.’ (1 Huan 5:3) Manera bo mes por mira, nos tur tin cu obedece Dios. Abo tambe kier obedec’e. Of no?—

Laga nos coi nos Bijbel y wak kico Dios ta manda mucha haci. Nos ta bai lesa loke Bijbel ta bisa na Efesionan capitulo 6, versiculo 1, 2 y 3. E ta bisa: “Yiunan, obedece boso mayornan den Señor, pasobra esaki ta husto. Honra bo tata y bo mama (cu ta e prome mandamento cu un promesa) pa bai bo bon y pa bo tin bida largo riba tera.”

B’a mira? Ta Yehova Dios mes ta bisa bo pa bo obedece bo tata cu bo mama. Kico kiermen “honra” nan? E kiermen cu bo mester respeta nan. Anto Dios ta priminti cu si bo obedece bo mayornan, lo “bai bo bon.”

Laga mi conta bo un historia di un par di hende cu a scapa nan bida pasobra nan a obedece. Nan a biba hopi tempo pasa na un stad grandi cu yama Herusalem. Mayoria di e hendenan den e stad ei no tawata haci loke Dios bisa. Pesei Hesus a spierta nan cu Dios tawata bai laga destrui nan stad. Tambe Hesus a bisa nan con nan por a scapa si nan a stima loke ta bon. El a bisa nan: ‘Ora boso mira Herusalem rondona door di ehersitonan, boso lo sa cu su destruccion ta yegando serca. E ora ei lo ta tempo pa boso sali bai laga Herusalem, anto hui bai na e seronan.’—Lucas 21:20-22.

Anto net manera Hesus a bisa, asina a sosode. Un ehersito di solda a bin ataca Herusalem. E ehersito di Roma a pone nan tentnan tur rond di e stad. E ora ei, pa un motibo of otro, e soldanan a bai. Mayoria di e hendenan a kere cu e peliger a pasa caba, anto nan a keda den e stad. Pero kico Hesus a bisa cu nan mester a haci?— Kico abo lo a haci si bo tawata biba na Herusalem?— E hendenan cu di berdad a kere Hesus a bai laga nan cas y a hui bai den sero, leu for di Herusalem.

Henter un aña a pasa, y nada no a sosode cu Herusalem. Dos aña a pasa, y nada no a sosode. Y e di tres aña, tampoco nada no a pasa. Kisas hende lo a pensa cu esnan cu a bai laga e stad tawata bobo. Pero e di cuater aña, e soldanan di Roma a bin bek. Nan a bolbe pone nan tentnan tur rond di Herusalem. Awor tawata mucho laat pa e hendenan hui bai. E biaha aki e soldanan a destrui e stad. Casi tur hende den e stad a muri, anto e soldanan a hiba esnan cu a keda bibo como catibo.

Pero kico a pasa cu e hendenan cu a obedece Hesus?— Nan si a scapa. Nan tawata leu for di Herusalem. Pesei nada no a pasa nan. Obediencia a scapa nan.

Si bo obedece, esei lo scapa abo tambe?— Kisas bo mayornan ta bisa bo pa nunca no hunga riba caminda. Pakico nan ta bisa bo e cos ei?— Pasobra auto por dal bo. Awor, un dia bo por bisa: ‘Pero aworaki no tin ningun auto riba caya. Nada no ta bai pasa mi. Otro mucha si ta hunga riba caminda, y nunca mi no a mira nada pasa cu nan.’

Ta asina casi tur hende na Herusalem a pensa. Ora e soldanan Romano a bai, a parce cu no tawatin peliger mas. Tawatin otro hende cu tambe a keda den e stad. Pesei, nan tambe a dicidi di keda. Hesus a spierta nan, pero nan no a scucha. Door di esei nan a perde nan bida.

Laga nos wak un otro ehempel. Bo a yega di hunga cu suafel?— Por parce pret pa sende un suafel anto wak e candela. Pero hunga cu suafel por ta peligroso. Henter e cas por kima, anto bo por muri tambe!

Corda cu obedece de bes en cuando so no ta basta. Pero si bo obedece tur ora, esei lo scapa bo sigur. Anto ta ken atrobe ta bisa nos: “Yiunan, obedece boso mayornan”?— Si, Dios. Y corda cu ta pasobra e ta stima bo e ta bisa bo e cos ei.