Tin Persona Cu Ta Mas Halto cu Nos

MI SA sigur cu bo tambe ta haya cu tin persona cu ta mas halto cu ami y abo, esta, mas importante y mas poderoso cu nos. Segun bo, ken ta un di nan?— Yehova Dios ta un di nan. Kico di su Yiu e Gran Maestro? E ta mas halto cu nos?— Claro cu si.

Hesus a biba den shelo serca Dios. E tawata un angel, un spirito. Dios a traha mas yiu asina?— Si, el a traha miyones di angel. E angelnan ei tambe ta mas halto y mas poderoso cu nos.—Hebreonan 1:7; Daniel 7:10.

Bo ta corda nomber di e angel cu a papia cu Maria?— E yama Gabriel. El a bisa Maria cu su baby lo ta Yiu di Dios. Dios a pone e bida di su Yiu, cu tawata un angel, den Maria su bariga pa Hesus por a bira un baby anto nace na tera.—Lucas 1:26, 27.

Abo ta kere cu e milager ei a sosode? Bo ta kere cu Hesus a biba serca Dios den shelo prome?— Hesus a bisa cu si. Con Hesus por tawata sa e cosnan ei? Wel, tempo Hesus tawata mucha, casi sigur Maria a cont’e loke Gabriel a bisa. Y casi sigur Hose tambe a bisa Hesus cu ta Dios ta su berdadero Tata.

Ora Hesus a batisa, Dios a asta papia for di shelo y bisa: “Esaki ta mi Yiu.” (Mateo 3:17) Y e anochi prome cu Hesus a muri, el a resa: “Glorifica mi serca bo mes, Tata, cu e gloria cu mi tawatin serca bo prome cu mundo tawata.” (Huan 17:5) Si, Hesus a pidi Dios hib’e shelo bek, pa e bolbe biba serca Dios. Con e por a bai biba den shelo?— E unico manera cu esei por a sosode ta si Yehova Dios a hacie bira un angel bek, un spirito invisibel.

Awor mi kier puntra bo un cos importante. Tur angel ta bon angel? Kico bo ta kere?— Wel, prome nan tur tawata bon angel, pasobra ta Yehova a crea nan, y tur cos cu Yehova traha ta bon. Pero un dia un di e angelnan a bira malbado. Bo sa con e cos ei a sosode?

Pa nos haya sa nos tin cu bai bek te na e tempo cu Dios a traha e prome hende homber y e prome hende mohe, Adam cu Eva. Tin hende ta bisa cu e historia di Adam cu Eva ta djis un cuenta. Pero e Gran Maestro tawata sa cu e ta berdad.

Ora Dios a traha Adam cu Eva, el a pone nan den un hofi masha bunita, na un luga cu yama Eden. E tawata un parke, un paradijs. Nan por a haya hopi yiu, un famia grandi, anto keda biba den Paradijs pa semper. Pero tawatin un les importante cu nan mester a siña. Nos a papia di e les ei caba. Ban wak si nos ta cord’e.

Yehova a bisa Adam cu Eva cu nan por a come cuanto fruta cu nan kier for di e palonan den e hofi. Pero tawatin un palo cu nan no mester a come di dje. Dios a bisa nan kico lo pasa si nan hacie toch. El a bisa: “Lo bo muri sigur.” (Genesis 2:17) Ki les Adam cu Eva mester a siña anto?—

E les tawata tocante obediencia. Si, pa nos keda biba nos tin cu obedece Yehova Dios! No tawata basta pa Adam cu Eva djis bisa cu nan ta bai obedece Dios. Nan tawatin cu mustra cu nan ta obedec’e door di haci loke e ta bisa. Door di obedece Dios nan lo a mustra cu nan ta stim’e, y cu nan kier pa e ta nan Gobernante. E ora ei nan lo por a biba pa semper den Paradijs. Pero si nan a come for di e palo, kico esei lo a mustra?—

Esei lo a mustra cu nan no tawata gradicido di berdad pa e cosnan cu Dios a duna nan. Abo lo a obedece Yehova si bo tawata na Eden?— Na cuminsamento Adam cu Eva a obedece. Pero despues un persona mas halto cu nan a gaña Eva. El a pone Eva desobedece Yehova. Ta ken e tawata?—

Bijbel ta bisa cu un colebra a papia cu Eva. Pero bo mes sa cu colebra no por papia. Con e por a papia cu Eva anto?— Un angel a haci manera cos cu ta e colebra a papia. Pero ta e angel mes tawata papia. Loke a pasa ta cu e angel ei a cuminsa pensa cos malo. E tawata kier pa Adam cu Eva adora e. E tawata kier pa nan haci loke e bisa. E kier a tuma e luga di Dios pa su mes.

Pesei, e mal angel ei a hinca mal pensamento den Eva su cabes. Via e colebra el a bisa Eva: ‘Loke Dios a bisa boso no ta berdad. Boso no ta muri si boso come for di e palo. Boso ta bai bira sabi manera Dios.’ Abo lo a kere e cos cu e stem a bisa?—

Eva a cuminsa desea un cos cu Dios no a dun’e. El a come fruta for di e palo cu nan no tawatin mag di come di dje. Despues el a duna Adam tambe fruta di e palo. Adam no a kere e cos cu e colebra a bisa. Pero e tawatin mas gana di keda cu Eva, cu e tawatin amor pa Dios. Pesei, e tambe a come fruta di e palo.—Genesis 3:1-6; 1 Timoteo 2:14.

Anto kico a sosode?— Adam cu Eva a bira imperfecto, nan a bira bieu y nan a muri. Y door cu nan tawata imperfecto, tur nan yiunan tambe a nace imperfecto, y cu tempo nan tambe a bira bieu y muri. Dios no a gaña! Ta berdad cu nos tin cu obedece Dios pa nos keda biba. (Romanonan 5:12) Bijbel ta conta nos cu e angel cu a gaña Eva yama Satanas e Diabel, y e otro angelnan cu a bira malbado yama demoño.—Santiago 2:19; Revelacion 12:9.

Bo a compronde awor ta dicon e bon angel cu Dios a traha a bira malbado?— Door cu el a cuminsa pensa cos malo. E kier a bira Number Un. E tawata sa cu Dios a bisa Adam cu Eva pa nan haya yiu, y e tawata kier pa nan y tur nan yiunan adora e. Diabel kier pone tur hende desobedece Yehova. Pesei e ta purba hinca mal pensamento den nos cabes.—Santiago 1:13-15.

Diabel ta bisa cu ningun hende no ta stima Yehova di berdad. E ta bisa cu ni abo ni ami no ta stima Dios, y cu no ta di berdad nos kier haci loke Dios bisa. E ta bisa cu ta ora tur cos ta bai manera nos kier so nos ta obedece Yehova. Diabel tin rason? Ta asina nos ta?

E Gran Maestro a bisa cu Diabel ta un gañado! Hesus a mustra cu e ta stima Dios di berdad, pasobra el a obedece Yehova. Y no ta ora cos a bai facil so Hesus a obedece Dios. Tur ora el a obedece Dios, asta ora hende a purba strob’e di haci Dios su boluntad. El a keda fiel na Yehova te na su morto. Ta pesei Dios a lant’e bek pa e biba pa semper.

Wel, ken bo ta kere cu ta nos enemigo di mas grandi anto?— Si, Satanas e Diabel. Bo por mir’e?— Claro cu no! Pero nos sa cu e ta existi, y cu e ta mas halto y mas poderoso cu nos. Pero ken ta mas halto cu Diabel?— Si, Yehova Dios. Pesei nos sa cu Dios por proteha nos.