Dios Ta Haya Tur Fiesta Bon?

ABO gusta fiesta?— Fiesta por ta hopi dushi. Bo ta kere cu e Gran Maestro kier pa nos bai fiesta?— Wel, e mes a yega di bai un fiesta riba un dia cu dos hende a casa, y un par di su disipelnan a bai cu ne. Yehova ta e Dios felis, y e gusta pa nos pasa dushi na fiesta, basta cu e fiesta ta bon.—1 Timoteo 1:11; Huan 2:1-11.

Na pagina 29 di e buki aki nos a mira con Yehova a habri Lama Cora pa laga e Israelitanan pasa door di dje. Bo ta corda cu nos a les’e?— Despues e pueblo a canta, balia y gradici Yehova. Tawata manera un fiesta. E pueblo tawata hopi contento, y nos por tin sigur cu Dios tambe tawata contento.—Exodo 15:1, 20, 21.

Casi 40 aña despues, e Israelitanan a bai un otro fiesta grandi. Pero e biaha aki e hendenan cu a invita nan no tawata adora Yehova mes. E hendenan cu a invita nan tawata asta buig pa adora otro dios, y nan tawata tene relacion sexual cu hende cu no ta nan casa. Bo ta kere cu e Israelitanan a haci bon di bai un fiesta asina?— Wel, Yehova no a keda contento, anto el a castiga e Israelitanan.—Numbernan 25:1-9; 1 Corintionan 10:8.

Bijbel ta conta nos di dos fiesta di hacimento di aña tambe. Bo ta kere cu un di nan tawata pa celebra e dia cu e Gran Maestro a haci aña?— No. Tur dos fiesta di hacimento di aña tawata pa hombernan cu no ta sirbi Yehova. Un di nan tawata fiesta di hacimento di aña di Rei Herodes Antipas. E tawata goberna e districto di Galilea tempo cu Hesus tawata biba einan.

Rei Herodes a haci hopi cos malo. El a cuminsa biba cu e casa di su ruman homber. E casa tawata yama Herodias. Huan Bautista, un sirbido di Dios, a bisa Herodes cu loke el a haci ta malo. Herodes no a gusta cu Huan a bis’e e cos ei, anto pesei el a laga nan sera Huan den prizon.—Lucas 3:19, 20.

Ora Huan tawata den prizon, a yega dia pa celebra hacimento di aña di Herodes. Herodes a pone un fiesta grandi. El a invita hopi hende importante. Nan tur a come, bebe y pasa bon. E ora ei e yiu mohe di Herodias a bin balia pa nan. Tur hende a gusta su baliamento asina tanto cu Rei Herodes kier a dun’e un regalo special. El a bis’e: “Kico cu bo pidi mi lo mi duna bo, asta mita di mi reino.”

Kico bo ta kere cu el a pidi? Placa, paña bunita of un palacio pa su mes? E mucha mohe no tawata sa kico pa bisa. Pesei el a bai serca su mama Herodias y a bis’e: “Kico lo mi pidi?”

Awor, door cu Herodias tawatin hopi rabia riba Huan Bautista, el a bisa su yiu mohe pa e pidi cabes di Huan. E mucha mohe a bai bek serca e rei, anto a bis’e: “Mi kier pa aworaki mes bo duna mi cabes di Huan Bautista riba un teblachi.”

Rei Herodes no kier a mata Huan, pasobra e tawata sa cu Huan ta bon hende. Pero ya Herodes a priminti e mucha mohe cu e ta dun’e kico cu e pidie, y e tawatin miedo di loke e otro hendenan lo pensa si e cambia di idea. Pesei, el a manda un homber bai den prizon y kap Huan su cabes afo. E homber a bolbe den un rato di ora. E tawatin Huan su cabes riba un teblachi. El a duna e mucha mohe e teblachi, anto e mucha mohe a duna su mama.—Marco 6:17-29.

E otro hacimento di aña cu Bijbel ta papia di dje no tawata mas miho tampoco. E fiesta aki tawata pa un rei di Egipto. Durante e fiesta aki tambe e rei a laga kap cabes di un hende afo. Anto despues el a colga e homber na un palo pa parhanan com’e! (Genesis 40:19-22) Bo ta kere cu Dios a keda contento cu e dos fiestanan ei?— Abo lo tawatin gana di bai e fiestanan ei?—

Nos sa cu tur cos cu tin skirbi den Bijbel ta skirbi cu un motibo. Bijbel ta conta di dos hacimento di aña so. Anto tur dos biaha, cos malo a sosode como parti di e celebracion. Pesei, kico bo ta kere cu Dios ta bisando nos tocante fiesta di hacimento di aña? Dios kier pa nos celebra hacimento di aña?—

Ta berdad cu awendia nan no ta kap cabes di hende afo na fiestanan asina. Pero ta hende cu no ta adora e Dios berdadero a bin cu e idea di celebra hacimento di aña. Wak kico un enciclopedia tocante religion ta bisa di e celebracionnan di hacimento di aña cu Bijbel ta papia di dje: “Ta pecadonan so . . . ta haci fiesta grandi pa celebra e dia cu nan a nace.” (The Catholic Encyclopedia) Nos kier ta manera nan?—

Kico di e Gran Maestro? E tawata celebra su hacimento di aña?— No, Bijbel no ta papia di ningun fiesta di hacimento di aña pa Hesus. Y e prome siguidonan di Hesus tampoco no tawata celebra su hacimento di aña. Bo sa dicon despues hende a dicidi di celebra Hesus su nacemento riba dia 25 di december?—

Un enciclopedia ta bisa cu nan a scohe e fecha ei door cu ‘e hendenan na Roma tawata celebra e dia ei caba como fiesta di Saturno. Nan tawata celebra nacemento di solo.’ (The World Book Encyclopedia) Kiermen, e hendenan a dicidi di celebra nacemento di Hesus riba un fecha cu e paganonan tawatin un fiesta caba!

Bo sa pakico no por ta cu Hesus a nace den december?— Pasobra Bijbel ta bisa cu ora Hesus a nace, ainda e cuidadonan di carne tawata pafo, maske a bira anochi. (Lucas 2:8-12) Y nan lo no a keda pafo den december, pasobra caminda Hesus a nace ta haci friu y awa ta cai hopi den e luna ei.

Hopi hende sa cu Hesus no a nace riba dia di Pasco. Asta nan sa cu riba e dia ei, paganonan tawata celebra un fiesta cu Dios no ta gusta. Pero hopi hende ta celebra Pasco toch. Nan tin mas gana di haci fiesta cu di haya sa si Dios gusta e fiesta ei of no. Pero nos si kier haci Yehova contento, no?—

Pesei, ora nos haci un fiesta, nos mester haci sigur cu Yehova ta haya cu e ta bon. Nos por haci fiesta riba cualkier dia. Nos no tin nodi warda te ora un dia special yega. Nos por come cuminda special, hunga wega y pasa pret. Bo tin gana di haci esei?— Kisas bo por papia cu bo mama y bo tata, pa hunto boso plania un fiesta. Lo ta dushi, no?— Pero prome cu boso cuminsa plania e fiesta, ta bon pa boso haci sigur cu Dios ta haya cu e ta bon.