Yudansa pa Vence Miedo

ABO ta haya cu ta facil pa sirbi Yehova?— E Gran Maestro no a bisa cu ta facil. E anochi prome cu nan a mata Hesus, el a bisa su apostelnan: “Si mundo odia boso, sa anto cu el a odia ami prome cu boso.”—Huan 15:18.

Pedro a gaba cu nunca e lo no bai laga Hesus, pero Hesus a bisa cu riba e mesun anochi ei Pedro tawata bai nenga tres biaha cu e conoc’e. Y esei ta precis loke Pedro a haci! (Mateo 26:31-35, 69-75) Con un cos asina por a pasa?— El a pasa door cu Pedro a haya miedo, y e mesun cos a pasa cu e otro apostelnan tambe.

Bo sa dicon e apostelnan a haya miedo?— Door cu nan a keda sin haci un cos hopi importante. Ora nos siña tocante e cos ei, esei lo yuda nos keda sirbi Yehova maske kico hende bisa nos of haci cu nos. Pero pa cuminsa nos mester wak atrobe ta kico a sosode riba e ultimo anochi cu Hesus a pasa hunto cu su apostelnan.

Prome nan a celebra Pasco Hudiu hunto. Pasco Hudiu ta un comemento special cu nan tawata pone tur aña pa e pueblo di Dios corda e dia cu Dios a libra nan for di sclabitud na Egipto. Ora nan a caba, Hesus a siña nan tene un otro comemento special. Den un otro capitulo nos ta bai papia mas tocante e comemento aki, y nos lo mira con e ta yuda nos keda corda Hesus. Despues di e comemento ei Hesus a bisa su apostelnan un par di palabra di animacion, anto ora nan a caba el a hiba nan e hofi di Getsemani. Nan tawata bai e hofi ei cada bes.

Den e hofi Hesus a kita bai for di nan pa haci oracion. El a bisa Pedro, Santiago cu Huan pa nan tambe haci oracion. Pero nan a pega soño. Tres biaha Hesus a bai su so pa resa, y tur tres biaha ora el a bin bek el a haya Pedro cu e otronan na soño! (Mateo 26:36-47) Bo sa pakico nan mester a keda lanta pa haci oracion?— Laga nos papia riba e cos aki.

Mas tempran riba e anochi ei, Hudas Iscariot tawata hunto cu Hesus y e otro apostelnan na e comemento di Pasco Hudiu. Hudas a bira ladron, bo ta corda? Anto awor el a bira un traido tambe. Door cu Hudas tawata sa cu Hesus tawata reuni cada bes cu su apostelnan den e hofi di Getsemani, el a hiba e soldanan einan pa nan coi Hesus preso. Ora nan a yega, Hesus a puntra nan: “Ta ken boso ta busca?”

E soldanan a responde: “Hesus.” Hesus no tawatin miedo. El a contesta nan: “Ta ami.” E soldanan a spanta asina tanto di mira cuanto curashi Hesus tawatin, cu nan a hala atras y cai abou na suela. E ora ei Hesus a bisa nan: ‘Si ta ami boso ta busca, laga mi apostelnan bai.’—Huan 18:1-9.

Ora e soldanan a coi Hesus tene y a mara su man, e apostelnan a haya miedo y nan a core bai. Pero Pedro cu Huan a keda cana un poco mas leu nan tras, pasobra nan kier a sa kico ta bai pasa. Mas laat e anochi ei nan a hiba Hesus cas di Caifas, e sumo sacerdote. Door cu Huan tawata conoce e sumo sacerdote, e mucha mohe cu tawata cuida porta a laga e cu Pedro drenta riba e plenchi den cura.

E sacerdotenan a reuni caba na cas di Caifas pa tene un huicio. Nan a trece testigo pa gaña riba Hesus, pasobra nan kier a laga mat’e. Anto e hendenan a dal Hesus mokete y pas’e bofta. Pedro tawata eibanda mes ora cu tur e cosnan ei tawata sosode.

Un mucha mohe esclabo, esun cu a laga Pedro cu Huan drenta, a reconoce Pedro. El a bis’e: “Abo tambe tawata hunto cu Hesus!” Pero Pedro a bis’e cu e no conoce Hesus mes. Un rato despues un otro mucha mohe tambe a reconoce Pedro. El a bisa e hendenan cu tawatin eibanda: “E homber aki tawata hunto cu Hesus.” Pedro a bolbe nenga cu e conoce Hesus. Un rato despues, un grupo di hende a mira Pedro y a bis’e: “Siguramente abo tambe ta un di nan.” Pa di tres bes, Pedro a nenga cu e conoc’e Hesus. El a bisa nan: “Mi no conoce e homber!” Pedro a asta hura cu e no ta gaña. E ora ei Hesus a bira wak e.—Mateo 26:57-75; Lucas 22:54-62; Huan 18:15-27.

Bo sa dicon Pedro a gaña?— Si, ta pasobra e tawatin miedo. Pero pakico el a haya miedo? Tawatin un cos cu Pedro por a haci p’e haya mas curashi, pero e no a hacie. Ta kico e cos ei ta? Pensa un rato. Kico Hesus mes a haci pa e haya mas curashi?— Si, el a resa na Dios, anto Dios a yud’e haya curashi. Y corda cu Hesus a bisa Pedro tres biaha pa e tambe resa, y pa e keda lanta y keda vigila. Pero kico a sosode?—

Tur tres biaha Pedro a pega soño. E si no a resa, ni e no a keda vigila. Pesei, ora nan a bin coi Hesus preso, Pedro no tawata prepara. Pesei mas laat, durante e huicio, ora nan tawata dal Hesus y traha plan pa laga mat’e, Pedro a haya miedo. Ma djis un par di ora prome, ta kico Hesus a bisa su apostelnan cu nan por a spera?— Hesus a bisa nan cu mescos cu mundo a odia e, mundo lo odia nan tambe.

Awor, pensa un rato. Abo por haya bo den un cos manera loke Pedro a pasa aden? Imagina bo cu bo ta den klas, anto e otro muchanan ta cuminsa papia cos malo tocante hende cu no ta saluda bandera of cu no ta celebra Pasco. Awor, kico bo ta haci si un hende bin riba bo y puntra bo: “Ta berdad cu boso no ta saluda bandera?” Of kisas otro muchanan ta bisa: “Nos a tende cu boso no ta ni celebra Pasco!” Lo bo tin miedo di bisa nan e berdad?— Lo bo haya gana di gaña, mescos cu Pedro?—

Despues Pedro a sinti masha duele mes cu el a nenga cu e conoce Hesus. Ora el a realisa kico el a haci, el a sali pafo y cuminsa yora. Si, el a bolbe na Hesus. (Lucas 22:32) Awor, pensa riba e cos aki. Kico por yuda nos pa nos no haya asina hopi miedo y haci mescos cu Pedro?— Corda cu Pedro no a haci oracion, ni e no a keda vigila. Pesei, segun bo, kico nos mester haci pa nos ta un siguido di e Gran Maestro?—

Nos tin cu resa pidi Yehova yuda nos. Ora Hesus a resa, bo sa kico Dios a haci p’e?— El a manda un angel pa dun’e curashi. (Lucas 22:43) Dios su angelnan por yuda nos tambe?— Bijbel ta bisa: “E angel di Señor ta campa rond di esnan cu ta tem’e, y ta rescata nan.” (Salmo 34:7) Pero pa Dios yuda nos, nos no mester resa pidi yudansa so. Nos mester haci un cos mas. Bo sa kico mas?— Hesus a bisa su siguidonan pa nan keda lanta y keda vigila. Con bo ta kere cu nos por haci e cos ei?—

Nos mester scucha bon kico nan ta bisa na nos reunionnan cristian, y paga tino na loke nos ta lesa den Bijbel. Pero nos tin cu resa na Yehova regularmente tambe, y pidie pa e yuda nos sirbie. Si nos haci asina, nos lo haya yudansa pa vence miedo. E ora ei nos lo sinti nos contento ora nos haya un chens pa papia cu hende tocante e Gran Maestro y su Tata.