Ken Ta Bai Resusita? Na Unda Nan Ta Bai Biba?

DEN e ultimo dos capitulonan cu nos a lesa nos a tende di algun hende cu a resusita. Bo ta corda cuanto nan tawata?— Tawatin cinco. Cuanto di nan tawata mucha?— Tres. Y Bijbel ta bisa cu un di e otro dosnan tambe tawata un hoben. Kico bo ta kere cu esei ta mustra nos?—

Wel, e ta mustra nos cu Dios ta stima mucha y hoben. Pero e ta bai resusita hopi otro hende mas tambe. Ta hende cu a haci bon so Dios ta bai resusita?— Esei ta loke nos lo por pensa. Pero tin hopi hende cu nunca no a haya sa e berdad tocante Yehova Dios y su Yiu. Nan a haci cos malo si, pero esei ta door cu hende a siña nan cos robes. Bo ta kere cu Yehova ta bai resusita hende asina?—

Bijbel ta bisa: “Lo tin un resureccion di tanto e hustonan como e malbadonan.” (Echonan 24:15) Pakico Dios ta bai resusita hende malbado, esta, hende cu no a haci bon?— Door cu nunca nan no a haya un chens pa siña tocante Yehova y tocante kico e kier pa hende haci.

Ki dia bo ta kere cu hende ta bai resusita?— Corda dia Lazaro a muri. Hesus a priminti su ruman Marta: “Bo ruman homber lo lanta.” Marta a respond’e: “Mi sa cu e lo lanta den e resureccion riba e ultimo dia.” (Huan 11:23, 24) Kico Marta tawata kiermen ora el a bisa cu Lazaro lo lanta riba “e ultimo dia”?—

Wel, Marta a yega di tende cu Hesus a priminti cu ‘tur hende den graf lo sali.’ (Huan 5:28, 29) Kiermen, “e ultimo dia” ta dia cu tur hende den Dios su memoria lo bolbe na bida. E ultimo dia ei no ta un dia di 24 ora. E ta bai dura mil aña. Bijbel ta bisa cu riba e dia ei ‘Dios ta bai husga e hendenan riba mundo;’ hende cu resusita tambe.—Echonan 17:31; 2 Pedro 3:8.

Pensa con dushi e dia ei lo ta! Durante e dia di mil aña largo ei, miyones y miyones di hende cu a muri lo biba bek. Hesus a yama e luga caminda e hendenan ei ta bai biba, Paradijs. Ban wak na unda Paradijs lo ta, anto con e ta bai ta.

Mas o menos tres ora prome cu Hesus a muri riba e staca di tormento, el a papia di Paradijs cu un homber claba na e staca banda di dje. Nan a claba e homber na e staca pa e muri, pa motibo di e crimennan cu el a comete. Pero segun cu e criminal a mira Hesus y a tende kico e hendenan tawata bisa di Hesus, el a cuminsa kere den dje. Pesei e criminal a bisa: “Corda di mi ora bo yega den bo reino.” Hesus a contest’e: ‘Di berdad mi ta bisa bo awe, lo bo ta serca mi den Paradijs.’—Lucas 23:42, 43.

Kico Hesus tawata kiermen cu esei? Na unda Paradijs lo ta?—Pensa un rato. Na unda Paradijs tawata na cuminsamento?— Corda cu Dios a duna Adam, e prome homber, y su casa, un paradijs aki riba tera mes pa nan biba aden. E luga ei tawata yama hofi di Eden. Tawatin bestia den e hofi, pero nan no tawata haci ningun hende nada. Y tawatin palo yen di fruta dushi y un riu grandi tambe. E tawata un luga masha dushi mes pa biba!—Genesis 2:8-10.

Pesei, ora nos lesa cu e criminal ta bai biba den Paradijs, nos mester imagin’e riba e tera aki mes, ora e bira un luga bunita pa biba. Hesus ta bai biba aki bou na tera den Paradijs hunto cu e homber cu tawata criminal?— No. Bo sa dicon no?—

Esei ta door cu Hesus lo ta den shelo gobernando como Rei riba e Paradijs cu lo tin na tera. Kiermen, Hesus ta bai ta cu e homber si, pero den e sentido cu Hesus ta bai lant’e for di morto anto percura pa loke e tin mester. Pero pakico Hesus ta bai laga un homber cu tawata criminal biba den Paradijs?— Laga nos wak si nos por haya sa.

E criminal tawata sa di Dios su proposito prome cu el a papia cu Hesus?— No, e no tawata sa. El a haci cos malo door cu e no tawata sa e berdad tocante Dios. Den Paradijs e ta bai siña tocante Dios su proposito. E ora ei e ta bai haya chens di mustra cu e ta stima Dios di berdad, door di haci Dios su boluntad.

Tur hende cu resusita ta bai biba den Paradijs na tera?— No, no ta tur. Bo sa dicon no?— Door cu un par di nan ta bai resusita pa biba hunto cu Hesus den shelo. Hunto cu ne den shelo nan ta bai goberna tera, ora tera bira un paradijs. Ban wak con nos por sa e cos aki.

E anochi prome cu Hesus a muri, el a bisa su apostelnan: ‘Na cas di mi Tata den shelo tin hopi luga di biba, y mi ta bai pa mi prepara un luga pa boso.’ E ora ei Hesus a priminti nan: “Lo mi bin atrobe y ricibi boso serca mi, pa caminda ami ta, boso tambe por ta.”—Huan 14:2, 3.

Unda Hesus a bai despues cu el a resusita?— Si, el a bai shelo bek serca su Tata. (Huan 17:4, 5) Kiermen, loke Hesus a priminti su apostelnan y algun otro siguido di dje ta cu e ta bai resusita nan pa nan por ta serca dje den shelo. Kico nan ta bai haci den shelo serca dje?— Bijbel ta bisa cu e disipelnan cu resusita den “e prome resureccion” ta bai biba den shelo y “reina riba tera” hunto cu ne pa mil aña.—Revelacion 5:10; 20:6; 2 Timoteo 2:12.

Cuanto hende ta bai resusita den “e prome resureccion” pa reina hunto cu Hesus?— Hesus a bisa su disipelnan: “No tene miedo, tou chikito, pasobra a agrada boso Tata pa duna boso e reino.” (Lucas 12:32) Bijbel ta bisa precis cuanto hende tin den e “tou chikito” aki cu ta bai resusita pa biba serca Hesus den su Reino di shelo. E ta bisa cu ta ‘shenticuarenticuater mil’ hende ta resusita for di riba tera.—Revelacion 14:1, 3.

Anto cuanto hende ta bai biba den Paradijs na tera?— Bijbel no ta bisa cuanto. Pero tempo Adam cu Eva tawata den hofi di Eden, Dios a bisa nan pa nan haya yiu anto yena tera. Ta berdad cu nan no a logra. Pero Dios ta bai percura pa su proposito cumpli si, esta, pa tera yena cu bon hende.—Genesis 1:28; Isaias 45:18; 55:11.

Imagina bo con dushi lo ta pa biba den Paradijs! Henter mundo lo bira manera un parke. Tur caminda lo tin parha, bestia y mata bunita, y tur sorto di flor. Ningun hende lo no sinti dolor pasobra e ta malo, ni ningun hende lo no tin nodi muri. Tur hende lo ta amigo di otro. Si nos kier biba pa semper den Paradijs, ta awor nos tin cu prepara p’e.