“Mi Ta . . . Humilde di Curason”

1-3. Den ki manera Hesus a haci su entrada den Jerusalem, y dicon algun hende den e multitud di mirones lo a keda sorprendi?

DEN Jerusalem tabata reina un ambiente di entusiasmo. Un gran homber tabata biniendo! Pafo di e stad, hendenan a bai para cant’i caminda. Nan tabata ansioso pa duna e homber aki bonbini, pasobra tabatin hende ta bisa cu e homber aki ta un heredero di Rei David y e Gobernante legitimo di Israel. Basta hende a bin cu rama di palma pa waya como saludo, otronan a habri paña y rama di mata abou pa haci e caminda mas suave p’e. (Mateo 21:7, 8; Juan 12:12, 13) Hopi hende lo tabata puntra nan mes con lo el a haci su entrada den e stad.

² Tin hende kisas a spera un entrada masha luhoso y magnifico. Casi sigur nan tabata sa di hombernan importante cu a haci un entrada mahestuoso. Por ehempel, David su yiu homber Absalon a proclama su mes como rei y a laga 50 homber core dilanti di su garoshi. (2 Samuel 15:1, 10) E gobernante Romano Julio Cesar tabata kier mas buya ainda; un biaha el a encabesa un procesion triunfal te na e capitolio Romano, compaña pa 40 olifanti cu lampi carga! Sinembargo, e hendenan di Jerusalem tabata spera un homber hopi mas prominente. Sea cu e multitud di hende tabata plenamente conciente di esei of no, esaki tabata e Mesias, e homber mas importante cu hamas a biba. Pero ora cu e futuro Rei aki a drenta e stad, algun hende lo a keda sorprendi.

³ Nan no a mira ningun garoshi di guera, ningun coredo, ningun cabai, y sigur ningun olifanti. No, Hesus a bin riba un simpel bestia di carga, un burico.a Ni e ni e bestia riba cua e tabata core no tabata dorna cu pañanan luhoso. En bes di un siya costoso, tabatin algun paña cu e siguidonan intimo di Hesus a pone riba lomba di e burico. Dicon Hesus a scohe pa drenta Jerusalem na un manera asina humilde, mientras cu hombernan mucho menos prominente a insisti pa haci un entrada cu mucho mas splendor y ceremonia?

4. Kico Bijbel a profetisa tocante e manera cu e Rei Mesianico lo a drenta Jerusalem?

⁴ Hesus tabata cumpli cu un profesia: “Regociha grandemente . . . Grita cu hubilo, o yiu muher di Jerusalem! Ata bo rei ta bin cerca bo; e ta husto y ta trece salbacion, humilde y sinta riba un burico.” (Zacarias 9:9) E profesia aki a mustra cu e Ungi di Dios, e Mesias, lo a revela su mes un dia na e pueblo di Jerusalem como e Rei apunta pa Dios. Ademas, e manera cu e lo a hacie—incluso e bestia cu e lo a scohe pa core ariba—lo a revela un bunita cualidad di su curason, esta, humildad.

5. Kico ta haci e humildad di Hesus asina conmovedor, y dicon ta importante pa nos siña imita Hesus den esaki?

⁵ Hesus su humildad ta un di su cualidadnan di mas atractivo, uno cu ta conmove nos profundamente ora nos pensa riba dje. Manera nos a trata den e capitulo anterior, ta Hesus so ta “e caminda, y e berdad, y e bida.” (Juan 14:6) Ta bisto cu ningun di e miles di miyones di hendenan cu a yega di biba riba e mundo aki a yega di ta dje importante ei manera e Yiu di Dios. Sinembargo, nos no ta haya den Hesus ni sikiera un rastro di e orguyo of arogancia cu tin den masha hopi hende imperfecto. Pa nos por ta siguido di Cristo, nos tin cu lucha contra e tendencia di ta orguyoso. (Santiago 4:6) No lubida cu Jehova ta odia arogancia. Pues anto, ta masha importante pa nos siña imita Hesus su humildad.

Un Registro Largo di Mustra Humildad

6. Kico ta humildad, y con Jehova por tabata sa cu e Mesias lo ta humilde?

⁶ Humildad ta un virtud cu ta net lo contrario di orguyo of arogancia. E ta un cualidad cu ta origina den un persona su curason y ta ser manifesta na su manera di papia, di comporta su mes y di trata cu otro hende. Con Jehova por tabata sa cu e Mesias lo ta humilde? E tabata sa cu su Yiu a refleha su propio ehempel perfecto di humildad. (Juan 10:15) Ademas, Jehova a mira e humildad di su Yiu den accion. Con asina?

7-9. (a) Con Miguel a demostra humildad den su confrontacion cu Satanas? (b) Con cristiannan lo por imita Miguel den mustra humildad?

⁷ E buki di Judas ta revela un ehempel fascinante: “E arcangel Miguel, ora cu e tabata pleita cu Diabel y tabata discuti tocante di e curpa di Moises, no a tribi pronuncia un huicio di maldicion contra dje, ma a bisa: ‘SEÑOR reprende bo.’” (Judas 9) Miguel ta un nomber cu ta ser aplica na Hesus—tanto prome como despues di su bida riba Tera—den su papel como arcangel, of hefe di Jehova su ehersito celestial di angel.b (1 Tesalonicensenan 4:16) Pero tuma nota con Miguel a atende e confrontacion aki cu Satanas.

⁸ E relato di Judas no ta bisa nos kico Satanas kier a haci cu e curpa di Moises. Pero nos por tin sigur cu Diabel tabatin cualkier proposito malicioso na mente. Podise e kier a uza e restonan mortal di e homber fiel ei pa fomenta adoracion falso. Aunke Miguel a resisti Satanas su plan malicioso, el a demostra a la bes un dominio propio remarcabel. Satanas siguramente a merece un reprendemento. Pero Miguel, kende na momento di e discusion cu Satanas ainda no a ricibi “tur huicio” of autoridad pa husga, a sinti cu ta for di Jehova Dios so tal huicio lo mester a bin. (Juan 5:22) Como arcangel, Miguel tabatin hopi autoridad. Pero toch humildemente el a laga e asunto den man di Jehova en bes di purba podera di mas autoridad. Fuera di humildad, el a demostra tambe di ta modesto, es decir, conciente di su limitacionnan.

⁹ Judas a ser inspira pa skirbi tocante e incidente aki pa un motibo. Tabatin algun cristian den tempo di Judas cu lamentablemente no tabata humilde. Cu arogancia nan tabata “papia malo di tur loke nan no [a] compronde.” (Judas 10) Como hende imperfecto, ta masha facil pa laga nos orguyo domina nos! Con nos ta reacciona ora nos no ta compronde algo cu ta ser haci den e congregacion cristian, kisas algo cu tin di aber cu un decision cu e cuerpo di anciano a tuma? Si nos cuminsa papia cosnan negativo y critico, sin cu nos por ta na haltura di tur e factornan tras di tal decisionnan, nos lo no ta demostrando falta di humildad? Na luga di haci esei, laga nos imita Miguel, esta Hesus, y abstene di husga asuntonan pa cua Dios no a duna nos e autoridad.

10, 11. (a) Kico ta remarcabel di e echo cu Dios su Yiu tabata dispuesto pa acepta e asignacion pa bin na Tera? (b) Con nos por imita Hesus su humildad?

¹⁰ Dios su Yiu a demostra humildad tambe dor di acepta e asignacion pa bin na Tera. Pensa riba loke e tabatin cu laga atras. E tabata e arcangel. E tabata tambe “e Palabra”, es decir, e Vocero di Jehova. (Juan 1:1-3) E tabata biba den shelo, den Jehova su “habitacion santo y glorioso.” (Isaias 63:15) A pesar di tur esei, e Yiu “a bandona su mes gloria, tumando forma di un sirbidor, siendo traha den e semehansa di hende.” (Filipensenan 2:7) Anto pensa riba loke su asignacion riba Tera a ensera! Su bida a ser transferi na e matris di un birgen Hudiu, caminda el a desaroya durante nuebe luna pa bira un baby humano. El a nace como un criatura indefenso den cas di un carpinte pober. E mester a siña cana como baby y pocopoco crece bira un mucha chikito, despues un teenager. Aunke e mes tabata perfecto, durante henter su hubentud e mester a keda sumiso na mayornan humano imperfecto. (Lucas 2:40, 51, 52) Ki un humildad extraordinario!

¹¹ Nos por imita Hesus su humildad y acepta di buena gana asignacionnan di sirbishi cu tin biaha por parce inferior? Por ehempel, nos asignacion di predica e bon nobo di e Reino di Dios por parce inferior ora cu hende ta reacciona na un manera indiferente, cu bofon of agresivo. (Mateo 28:19, 20) Pero si nos persevera den e trabou aki, nos por yuda salba bida. Asta si no yega asina leu, nos lo siña manifesta mas humildad, y nos lo ta siguiendo e pasonan di nos Shon, Hesucristo.

Hesus Su Humildad Como Hende

12-14. (a) Con Hesus a demostra humildad ora cu hende a elogi’e? (b) Den ki maneranan Hesus a trata humildemente cu otro hende? (c) Kico ta mustra cu Hesus su humildad no tabata djis un formalidad of cortesia?

¹² Hesus su ministerio riba Tera, for di cuminsamento te final, tabata caracterisa pa humildad. El a demostra su humildad den e manera cu el a dirigi tur alabansa y gloria na su Tata. Tabatin biaha cu hende a elogia Hesus pa e sabiduria di su palabranan, pa e poder di su milagernan, asta pa su caracter bondadoso. Pero bes tras bes, na luga di acepta e gloria ei, Hesus a dirigie na Jehova.—Marco 10:17, 18; Juan 7:15, 16.

¹³ Hesus a demostra humildad den e manera cu el a trata hende. De echo, el a splica bon cla cu el a bin na Tera, no pa wordo sirbi, ma pa sirbi otronan. (Mateo 20:28) El a mustra humildad den su manera suave y rasonabel di trata cu hende. Ora cu su siguidonan a desapunt’e, e no a zundra nan; el a sigui purba di yega na nan curason. (Mateo 26:39-41) Ora cu e multitudnan a strob’e den su intento di busca un tiki trankilidad, sosiego y privasidad, e no a manda nan bai; el a sigui duna di su mes, y a siña nan “hopi cos.” (Marco 6:30-34) Ora cu un señora no Israelita tabata blo rog’e pa cura su yiu muher, el a indica na prome instante cu e no kier a haci esei. Sinembargo, e no a nenga na un manera rabia; al final el a hacie toch en bista di e muher su fe extraordinario, manera nos lo bai trata den Capitulo 14.—Mateo 15:22-28.

¹⁴ Den masha hopi manera mes, Hesus a cumpli cu loke el a bisa tocante su mes: “Mi ta manso y humilde di curason.” (Mateo 11:29) Su humildad no tabata superficial, un simpel formalidad of cortesia. El a sali for di fondo di su curason. P’esei ta di compronde cu Hesus a duna un prioridad halto na siña su siguidonan pa nan ta humilde!

Hesus Ta Siña Su Siguidonan pa Ta Humilde

15, 16. Ki contraste Hesus a menciona entre e actitud di gobernantenan di mundo y e actitud cu su siguidonan mester cultiva?

¹⁵ Hesus su apostelnan tabata slow den cultiva humildad. Hesus a hay’e obliga ta purba bes tras bes pa siña nan humildad. Por ehempel, na un ocasion Santiago cu Juan a laga nan mama pidi Hesus pa priminti cu lo e duna nan un puesto halto den e Reino di Dios. Modestamente, Hesus a contesta: “Pa sinta na mi man drechi y na mi man robes, esaki no ta keda na mi pa duna, ma ta pa esnan pa kendenan mi Tata a prepara esei.” E dies otro apostelnan a tuma Santiago cu Juan “masha na malo.” (Mateo 20:20-24) Con Hesus a atende e problema aki?

¹⁶ El a reprende nan na un manera bondadoso, bisando: “Boso sa cu e gobernantenan di e paganonan tin dominio riba nan, y nan shon grandinan ta eherce autoridad riba nan. Entre boso no t’asina, ma ken cu kier bira grandi entre boso lo ta boso sirbidor, y ken cu kier ta esun di prome entre boso lo ta boso esclabo.” (Mateo 20:25-27) E apostelnan probablemente a yega di mira con arogante, ambicioso y egoista “e gobernantenan di e paganonan” por ta. Hesus a mustra cu su siguidonan mester ta diferente for di e tiranonan hambra pa poder ei. Nan mester tabata humilde. E apostelnan a capta e punto?

17-19. (a) Bispo di Hesus su morto, den ki manera memorabel el a siña su apostelnan un les tocante humildad? (b) Cua tabata e les di mas impactante di humildad cu Hesus a siña otronan tempo cu e tabata hende?

¹⁷ Esei no tabata facil pa nan. No tabata ni prome ni ultimo biaha cu Hesus a siña nan e les ei. Mas prome, ora cu nan tabata discuti tocante cua di nan ta mas grandi, el a pone un mucha meimei di nan y a bisa nan pa nan ta mas manera mucha, ya cu mucha por lo general no tin e orguyo, ambicion y interes pa haya puesto cu ta asina comun entre adultonan. (Mateo 18:1-4) Sinembargo, asta riba e anochi bispo di su morto el a mira cu su apostelnan te ainda tabata lucha cu orguyo. E ora ei el a siña nan un les masha memorabel. El a mara un serbete na su cintura y a haci e trabou di mas humilde, algo cu normalmente ta crianan tabata haci den e tempo ei pa bishitantenan di un cas. Hesus a laba pia di cada un di su apostelnan, incluso pia di Judas, kende tabata a punto di traicion’e!—Juan 13:1-11.

¹⁸ Hesus a yuda nan compronde e punto tocante humildad ora cu el a bisa nan: “Mi a duna boso un ehempel.” (Juan 13:15) E les aki porfin a yega na nan curason? Wel, mas lat e anochi ei, nan a bolbe cuminsa discuti tocante cua di nan tabata esun di mas grandi. (Lucas 22:24-27) Pero Hesus a sigui tene pasenshi cu nan y a siña nan humildemente. Despues el a duna nan e les di mas impactante: “El a humilia su mes dor di bira obedecido te na morto, asta morto na un [staca].” (Filipensenan 2:8) Hesus voluntariamente a somete su mes na un morto humiliante, condena eroneamente como un criminal y un blasfemado. Cu esei e Yiu di Dios a demostra cu e ta unico, pasobra di tur e criaturanan di Jehova, e ta esun cu a duna e ehempel sublime y perfecto di humildad.

¹⁹ Podise ta esaki—e ultimo les di humildad cu Hesus a siña otronan tempo cu e tabata hende—a graba e cualidad di humildad permanentemente den curason di su fiel apostelnan. Bijbel ta bisa nos cu e hombernan aki a sigui traha humildemente pa añanan, asta decadanan, despues. Kico di nos?

Abo Lo Sigui e Ehempel Cu Hesus A Pone?

20. Con nos por sa si nos ta humilde?

²⁰ Pablo a conseha cada un di nos: “Laga tin den boso e actitud aki cu tabatin tambe den Cristo Hesus.” (Filipensenan 2:5) Mescos cu Hesus, nos mester ta humilde. Con nos por sa si nos tin un curason humilde? Wel, Pablo a recorda nos cu nos no mester “haci nada cu un actitud di egoismo of orguyo, ma cu humildad laga cada un di [nos] considera e otro mas importante cu [nos] mes.” (Filipensenan 2:3) Pues e factor clave ta con nos ta mira otro hende na comparacion cu nos mes. Nos tin cu mira nan como superior, como mas importante cu nos. Abo lo aplica e conseho ei?

21, 22. (a) Dicon superintendentenan cristian mester ta humilde? (b) Con nos por demostra cu nos a bisti nos mes cu humildad?

²¹ Hopi aña despues di Hesus su morto, apostel Pedro tabata pensa ainda riba e importancia di humildad. Pedro a siña superintendentenan cristian pa cumpli cu nan debernan humildemente, y nunca eherce dominio riba e carnenan di Jehova. (1 Pedro 5:2, 3) Responsabilidad no ta hustifica orguyo. Al contrario, responsabilidad ta aumenta e necesidad di berdadero humildad. (Lucas 12:48) Claro cu e cualidad aki ta masha importante no solamente pa superintendentenan sino tambe pa tur cristian.

²² Un cos ta sigur, Pedro nunca mas a lubida e anochi ei cu Hesus a laba su pia, a pesar cu Pedro mes no tabata kier! (Juan 13:6-10) Pedro a skirbi na e cristiannan: “Boso tur, bisti boso mes cu humildad pa cu otro.” (1 Pedro 5:5) E expresion “bisti boso mes” ta duna e idea di un cria cu ta bisti un delantal (schort) pa cumpli cu trabou humilde. E frase aki probablemente ta recorda nos di e ocasion cu Hesus a mara un serbete na su cintura prome cu el a hinca rudia pa haci e tarea di laba pia di su apostelnan. Si nos ta sigui Hesus, lo por tin cualkier asignacion cu Dios ta duna nos cu nos lo considera bou di nos nivel? E humildad di nos curason lo mester ta bisto pa tur hende, como si fuera nos tin e bisti.

23, 24. (a) Dicon nos mester resisti cualkier inclinacion pa ta arogante? (b) Ki idea eroneo tocante humildad e siguiente capitulo lo yuda corigi?

²³ Arogancia ta manera veneno. E efectonan por ta devastador. Arogancia ta un cualidad cu por pone e persona di mas talentoso bira inutil den bista di Dios. Di otro banda, humildad por haci asta e persona di mas menos bira masha util pa Jehova. Cultiva e cualidad precioso aki diariamente dor di haci esfuerso pa cana humildemente den e pasonan di Cristo. Ki maraviyoso lo ta pa medita riba e bendicion cu esei lo trece cu ne. Pedro a skirbi: “Humilia boso mes anto bou di e man poderoso di Dios, pa e por halsa boso na e tempo apropia.” (1 Pedro 5:6) Jehova definitivamente a halsa Hesus pa e echo cu el a humilia su mes completamente. Nos Dios di igual manera lo tin deleite den recompensa bo pa bo humildad.

²⁴ Lamentablemente, algun hende ta pensa cu humildad ta un señal di debilidad. Hesus su ehempel ta yuda nos mira ki robes e pensamento ei ta, pasobra e homber di mas humilde tabata tambe esun cu mas curashi. Esaki lo ta e topico di e siguiente capitulo.