“E No A Papia Nada cu Nan sin Uza Parabola”

1-3. (a) E discipelnan cu a biaha cu Hesus tabatin ki privilegio unico, y con el a hacie mas facil pa nan por a corda loke el a siña nan? (b) Dicon ilustracionnan efectivo ta facil pa corda?

E DISCIPELNAN cu a biaha cu Hesus tabatin un privilegio unico. Nan a siña directamente for di e Gran Maestro. Nan por a scucha su bos segun cu el a splica e nificacion di e Palabra di Dios y a siña nan berdadnan maraviyoso. Na e ocasionnan ei nan mester a warda su palabranan precioso den nan mente y curason; ainda no tabata tempo pa conserva su palabranan por escrito.a Sinembargo, Hesus a hacie mas facil pa nan por a corda loke el a siña nan. Con? Na su manera di siña, specialmente e manera maestral cu el a uza parabola of ilustracion.b

² Echo ta cu bo no ta lubida un bon ilustracion lihe. Un autor a remarca cu ilustracion ta “pone bo mira loke bo ta tende y ta yuda bo forma un cuadro mental.” Como cu hopi bes un imagen of cuadro mental ta yuda nos compronde un asunto mihor, un ilustracion por yuda nos capta asta conceptonan abstracto mas lihe. Un ilustracion por duna bida na palabra y asina ta siña nos lesnan cu ta keda bon graba den nos memoria.

³ Ningun maestro riba Tera por para banda di Hesucristo den uzo di ilustracion. Te cu awe, hende por corda hopi di su ilustracionnan facilmente. Pakico Hesus a haci asina tanto uzo di e metodo di siñansa aki? Y kico a haci su ilustracionnan asina efectivo? Con nos por siña uza e metodo di siñansa aki?

Dicon Hesus A Siña Hende cu Ilustracion

4, 5. Dicon Hesus a uza ilustracion?

⁴ Bijbel ta duna dos motibo importante pakico Hesus a uza ilustracion. Di prome, asina el a cumpli cu profesia. Na Mateo 13:34 y 35 nos ta lesa: “Hesus a papia cu e multitudnan pa medio di parabola [“ilustracion”, NW], y e no a papia nada cu nan sin uza parabola, pa por a keda cumpli loke a wordo anuncia dor di e profeta, kende a bisa: ‘Lo mi habri mi boca den parabola.’” E profeta cu Mateo a cita tabata esun cu a skirbi Salmo 78:2. E salmista ei a skirbi bou di inspiracion di e spirito di Dios hopi siglo prome cu Hesus a nace. Pensa un rato ta kico esaki ta nifica. Hopi aña di antemano, Jehova a determina cu e Mesias lo a siña hende cu ilustracion. Pues, e metodo di siñansa aki mester tin hopi balor pa Jehova.

⁵ Di dos motibo ta cu Hesus a splica cu el a uza ilustracion pa separa e hendenan kende nan curason a “bira insensitivo.” (Mateo 13:10-15; Isaias 6:9, 10) Den ki manera e ilustracionnan di Hesus a saca na cla kico tabata e motivacion di e hendenan? Den algun caso, e tabata kier pa su oyentenan a pidi un splicacion pa asina nan por a haya e pleno nificacion di su palabranan. Hende humilde tabata dispuesto pa puntra, mientras cu esnan arogante of indiferente si no. (Mateo 13:36; Marco 4:34) Pues anto, e ilustracionnan di Hesus a revela e berdad na personanan cu di curason a anhela esei; na mesun tempo, su ilustracionnan a sconde e berdad for di esnan cu tabatin curason orguyoso.

6. Ki proposito probechoso e ilustracionnan di Hesus tabatin?

⁶ E ilustracionnan di Hesus a sirbi varios proposito mas cu ta probechoso. Nan a lanta interes y a laga hende sinti cu nan mester scucha. Nan a pinta cuadronan mental cu tabata facil pa compronde. Manera nos a menciona na cuminsamento, e ilustracionnan di Hesus a yuda su oyentenan corda su palabranan. E Sermon Riba Sero, cu nos ta haya na Mateo 5:3–7:27, ta un ehempel sobresaliente di e gran cantidad di ilustracion cu Hesus a uza. Segun un conteo, e sermon aki tin mas cu 50 comparacion. Pa bo haya un bon idea con hopi esei ta, corda cu bo por lesa e sermon aki na bos halto den mas o menos 20 minuut. Esei ta nifica cu, como promedio, casi cada 20 seconde bo ta haya un comparacion! Claramente, Hesus a mira e balor di pinta cuadronan mental cu palabra!

7. Pakico ta bon pa nos imita Hesus su uzo di ilustracion?

⁷ Como siguido di Cristo, nos kier imita su manera di siña, incluso su uzo di ilustracion. Mescos cu specerij ta duna un cuminda mas smak, ilustracionnan efectivo por haci nos manera di siña mas atractivo pa otro hende. Ademas, ilustracionnan bon pensa por haci berdadnan importante mas facil pa compronde. Laga nos analisa algun di e factornan cu a haci e ilustracionnan di Hesus asina efectivo. E ora ei nos lo por mira con nos por haci bon uzo di e metodo di siñansa valioso aki.

El A Uza Comparacionnan Simpel

8, 9. Con Hesus a haci uzo di comparacionnan simpel, y kico a haci su comparacionnan asina efectivo?

⁸ Ora Hesus a siña hende, el a uza hopi bes comparacionnan simpel, cu tabatin mester di djis un par di palabra. Sinembargo, e palabranan simpel ei a pinta cuadronan mental bibo y a siña berdadnan spiritual importante na un manera cla. Por ehempel, ora el a urgi su discipelnan pa nan no ta demasiado precupa pa nan necesidadnan diario, el a compara nan situacion cu “e parhanan di shelo” y cu “e lelinan di sabana.” E parhanan no ta sembra ni cosecha, y e lelinan no ta hila. Toch Dios ta cuida nan. E punto tabata facil pa mira: Si Dios ta cuida parha cu flor, siguramente lo e cuida hende cu ta sigui “busca prome e reino.”—Mateo 6:26, 28-33.

⁹ Tambe Hesus a haci hopi uzo di metafora, cu ta un forma mas potente di ilustracion. Un metafora ta referi na un cos como si fuera e ta un otro cos. Den esaki tambe Hesus a tene e cosnan cu e ta compara cu otro simpel. Na un ocasion el a bisa su discipelnan: “Boso ta e lus di mundo.” E discipelnan por a compronde e nificacion di e metafora bon bon, esta, cu pa medio di nan palabra- y obranan, nan por a laga e lus di e berdad spiritual briya y yuda otro hende duna gloria na Dios. (Mateo 5:14-16) Tuma nota di algun otro metafora cu Hesus a uza: “Boso ta e salo di tera” y “Ami ta e mata di wendruif, boso ta e ramanan.” (Mateo 5:13; Juan 15:5) Loke ta haci e formanan di expresion figurativo ei asina efectivo ta nan simplesa.

10. Menciona algun ehempel cu ta mustra con bo por uza ilustracion den bo siñansa.

¹⁰ Con abo por uza ilustracion den bo siñansa? Bo no tin nodi bin cu historia largo y complica. Djis purba pensa riba comparacionnan simpel. Supone cu bo ta papiando tocante e topico di resureccion y bo kier ilustra cu pa Jehova no ta un problema pa lanta e mortonan. Ki comparacion ta bin na bo mente? Bijbel ta uza soño como un metafora pa morto. Lo bo por bisa: “Dios por resusita e mortonan mes facil cu nos por lanta un hende for di soño.” (Juan 11:11-14) Supone cu bo kier ilustra cu yiu tin mester di amor y cariño pa nan por desaroya bon. Ki ehempel lo bo por uza? Bijbel ta uza e comparacion aki: Yiunan ta “manera spruitnan di oleifi.” (Salmo 128:3, BPK) Lo bo por bisa: “Mescos cu un mata tin mester di solo y awa, un yiu tin mester di amor y cariño.” Mas simpel e comparacion ta, mas facil lo ta pa bo oyentenan comprond’e.

Basa Riba Bida Diario

11. Duna algun ehempel cu ta mustra con e ilustracionnan di Hesus a refleha cosnan cu sin duda el a observa tempo cu el a lanta na Galilea.

¹¹ Hesus tabata experto den uza ilustracion cu tabatin di aber cu bida di hende. Hopi di su ilustracionnan a refleha situacionnan di tur dia cu probablemente el a observa tempo cu el a lanta na Galilea. Pensa un rato riba tempo cu e tabata mucha. Cuanto biaha e no a mira su mama mula maishi, pone zuurdeeg den mansa, sende un lampi of bari cas? (Mateo 13:33; 24:41; Lucas 15:8) Cuanto biaha e no a mira piscado baha nan redanan den e Lama di Galilea? (Mateo 13:47) Cuanto biaha e no a mira mucha ta hunga riba plasa? (Mateo 11:16) Sin duda Hesus a tuma nota di otro cosnan comun y coriente cu ta ser menciona den su tantisimo ilustracionnan: sembramento di simiña, fiesta di casamento yen di alegria y cunucu di grano cu ta hecha den solo.—Mateo 13:3-8; 25:1-12; Marco 4:26-29.

12, 13. Pakico ta interesante pa nota cu Hesus a uza e caminda cu a “baha di Jerusalem bai Jerico” pa splica su punto den e parabola di e bon Samaritano?

¹² Hesus a menciona den su ilustracionnan detayenan cu tabata bon conoci pa su oyentenan. Por ehempel, el a cuminsa e parabola di e bon Samaritano bisando: “Un homber tabata baha di Jerusalem bai Jerico, y el a cai den man di ladron; y nan a kita tur cos for di dje y a batie, y a bai lag’e mitar morto.” (Lucas 10:30) Ta interesante pa nota cu Hesus a menciona e caminda cu a “baha di Jerusalem bai Jerico” pa splica su punto. Ora el a conta e parabola aki, e tabata na Judea, no mucho leu for di Jerusalem; pues su oyentenan sin duda tabata conoce e caminda en cuestion. E tabata conoci como un caminda peligroso, specialmente pa un persona cu ta biaha su so. E tabata lora pasa dor di terenonan aisla, y esei a crea hopi luga di sconde pa ladron.

¹³ Hesus a inclui mas detaye conoci di e caminda cu a “baha di Jerusalem bai Jerico.” Segun e parabola, prome un sacerdote y despues un Levita tambe a pasa riba e caminda ei, aunke ningun di nan dos no a para pa yuda e victima. (Lucas 10:31, 32) E sacerdotenan tabata sirbi na e tempel den Jerusalem y e Levitanan a asisti nan. Hopi sacerdote y Levita tabata biba na Jerico ora nan no tabata traha na e tempel ya cu Jerico tabata keda apenas 23 kilometer for di Jerusalem. Pues, nan tabata personanan cu bo por a mira riba e caminda ei. Tuma nota tambe cu Hesus a bisa cu e homber Samaritano tabata “baha”—no subi—e caminda “di Jerusalem.” Su oyentenan a compronde esaki. Jerusalem tabata keda mas na halto cu Jerico. P’esei un hende cu a sali for “di Jerusalem” en berdad lo tabata “baha.”c Ta bisto anto cu Hesus a tene na mente ken tabata su oyentenan.

14. Ora di uza ilustracion, con nos por tene cuenta cu nos auditorio?

¹⁴ Ora nos ta uza ilustracion, nos tambe tin cu tene nos auditorio na mente. Kico ta algun cos tocante nos oyentenan cu lo por tin un influencia riba e ilustracionnan cu nos ta scohe? Podise nos tin cu tene cuenta cu factornan manera edad, cultura, famia y empleo. Por ehempel, un ilustracion cu ta menciona detayenan tocante trabou di cunucu lo por ta mas facil pa capta den un area di agricultura cu den un stad grandi. E bida diario y actividadnan di nos oyentenan—nan yiunan, nan cas, nan hobinan, nan cuminda—tambe lo por sirbi como base pa ilustracionnan apropia.

Basa Riba Creacion

15. Pakico no ta nada straño cu Hesus a conoce e creacion asina bon?

¹⁵ Hopi di e ilustracionnan di Hesus ta revela con bon el a conoce naturalesa, incluso mata, bestia y e clima. (Mateo 16:2, 3; Lucas 12:24, 27) Di unda el a haya tal conocemento? Tempo cu el a lanta na Galilea, sin duda e tabatin oportunidad amplio pa observa creacion. Mas importante cu esei, Hesus ta “e primogenito di henter creacion”, y Jehova a uz’e como e “obrero maestro” ora el a crea tur cos. (Colosensenan 1:15, 16; Proverbionan 8:30, 31) Ta straño anto cu Hesus a conoce e creacion asina bon? Laga nos mira con el a uza e conocemento aki habilmente den su siñansa.

16, 17. (a) Kico ta indica cu Hesus a conoce e caracteristicanan di carne hopi bon? (b) Menciona un ehempel cu ta mustra cu carne di berdad ta scucha e bos di nan wardado.

¹⁶ Corda cu Hesus a identifica su mes como “e bon wardado” y su siguidonan como “e carnenan.” E palabranan di Hesus ta indica cu e tabata bon na haltura di e caracteristicanan di carne domestico. E tabata sa cu tabatin un laso unico entre un wardado y su carnenan. El a tuma nota cu e bestianan manso aki ta cla pa laga nan mes ser dirigi y cu nan ta sigui nan wardado fielmente. Dicon carne ta sigui nan wardado? Hesus di: “Pasobra nan conoce su bos.” (Juan 10:2-4, 11) Di berdad carne conoce e bos di nan wardado?

¹⁷ A base di observacion personal, George A. Smith a skirbi den su buki The Historical Geography of the Holy Land (E Geografia Historico di e Tera Santo): “Tin biaha nos tabata sosega merdia banda di un di e posnan di Judea, caminda tres of cuater wardado di carne ta bini cu nan tou. E bestianan ta mescla den otro, y nos tabata puntra nos mes ta con cada wardado por a haya esnan di dje atrobe. Pero despues cu e tounan a caba di bebe awa y hunga cu otro, beurt pa beurt cada un di e wardadonan a cohe un otro direccion di e vaye, y cada un a dal su grito special; y e carnenan di cada un a retira for di e grupo grandi pa bai cerca nan propio wardado, y e tounan a bai mes ordena cu nan a bin.” Hesus lo no por a haya un mihor manera pa ilustra su punto, esta, cu si nos ta reconoce y obedece su siñansa y si nos ta sigui su guia, e ora ei nos tambe por bin bou di e cuido di “e bon wardado.”

18. Unda nos por haya informacion tocante e creacionnan di Jehova?

¹⁸ Con nos por siña uza ilustracion saca for di creacion? E caracteristicanan sobresaliente di bestia por ta e base pa comparacionnan simpel pero efectivo. Unda nos por haya informacion tocante e creacion di Jehova? Bijbel ta un bon fuente di conocemento tocante varios bestia, y tin biaha, e ta uza caracteristicanan di bestia den un manera figurativo. Por ehempel, e ta referi na ser lihe manera gazel of leopardo, ser cauteloso manera colebra, y inocente manera paloma.d (1 Cronicanan 12:8; Habacuk 1:8; Mateo 10:16) Otro fuentenan valioso di informacion ta E Toren di Vigilancia y Spierta!, y otro literatura cu Testigonan di Jehova ta produci. Bo por siña hopi si bo tuma nota di e manera cu e publicacionnan aki ta haci uzo di comparacionnan simpel basa riba e maraviyanan di e tantisimo creacionnan di Jehova.

Basa Riba Ehempelnan Conoci

19, 20. (a) Con Hesus a haci bon uzo di un suceso recien pa mustra cu un creencia ta robes? (b) Con nos por uza ehempel y experencia di bida real ora nos ta siña hende?

¹⁹ Un ilustracion efectivo por ta den forma di un ehempel of experencia di bida real. Na un ocasion, Hesus a uza un suceso recien pa mustra cu e creencia cu tragedia ta sosode cu hende cu merece esei, ta un creencia robes. El a bisa: “Boso ta kere cu e diesochonan ei, riba kendenan e toren den Siloam a cai y a mata nan, tabata mas culpabel [pecador] cu tur e hendenan cu ta biba na Jerusalem?” (Lucas 13:4) Berdad, e 18 almanan ei no a muri pa motibo di un pica cu a provoca e rabia di Dios. Mas bien, nan morto tragico tabata e resultado di “tempo y suceso imprevisto.” (Eclesiastes 9:11, NW) Asina Hesus a refuta un siñansa falso dor di referi na un suceso cu su oyentenan tabata bon na haltura di dje.

²⁰ Con nos por uza ehempelnan di bida real ora nos ta siña hende? Supone cu bo ta papiando tocante e cumplimento di e profesia di Hesus relaciona cu e señal di su presencia. (Mateo 24:3-14) Lo bo por referi na sucesonan recien cu a sali den noticia tocante guera, hamber of temblor pa mustra cu rasgonan specifico di e señal ta cumpliendo. Of imagina cu bo kier uza un experencia pa ilustra e cambionan cu tin cu tuma luga pa bisti e personalidad nobo. (Efesionan 4:20-24) Unda bo por haya un experencia asina? Lo bo por pensa riba bo rumannan den fe cu ta bin di diferente antecedente, of lo bo por uza un experencia cu a sali den un di e publicacionnan di Testigonan di Jehova.

21. Ki recompensanan nos ta haya ora nos ta un maestro efectivo di e Palabra di Dios?

²¹ Hesus tabata di berdad e Gran Maestro! Manera nos a mira den e seccion aki, e obra principal den su bida tabata pa “siña . . . y proclama e evangelio.” (Mateo 4:23) Esei ta e obra principal den nos bida tambe. E recompensanan di ser un maestro efectivo ta grandi. Ora nos ta siña hende, nos ta dunando nan algo, y tal dunamento ta produci felicidad. (Echonan 20:35) E felicidad ei ta e goso di sa cu nos ta compartiendo algo cu ta duradero y di berdadero balor, esta, e berdad tocante Jehova. Tambe nos por tin e satisfaccion di sa cu nos ta siguiendo e ehempel di Hesus, e Maestro di mas grandi cu a yega di cana riba mundo.