“Ni Un Hende No Tin Amor Mas Grandi cu Esaki”

1-4. (a) Kico a sosode ora Pilato a presenta Hesus na un multitud rabia para pafo di palacio di gobernador? (b) Con Hesus a reacciona riba e humiliacion y sufrimento, y ki preguntanan importante ta surgi?

“ATA e homber!” Cu e palabranan aki e gobernador Romano Poncio Pilato a presenta Hesucristo na e multitud rabia para pafo di palacio di gobernador e mainta tempran di e Pasco Hudiu di aña 33. (Juan 19:5) Apenas algun dia prome, un multitud di hende a aclama Hesus ora cu el a haci su entrada triunfal den Jerusalem como e Rei apunta pa Dios. Sinembargo, e anochi aki e multitud rabia tabatin completamente un otro opinion di dje.

² Hesus tabata bisti cu un mantel purpura manera e hendenan di cas real sa bisti, y un corona riba su cabes. Pero e mantel y corona tabata pa haci bofon di su puesto di rei. E mantel a tapa su lomba cu tabata tur corta y na sanger debi na e sota cu el a haya cu zwiep, y e corona tabata di sumpiña y primi riba su cabes tur na sanger. E pueblo, instiga pa e sacerdotenan principal, a rechasa e homber para nan dilanti. E sacerdotenan a grita: “Clab’e na staca! Clab’e na staca!” Cu un curason asesino, e pueblo a grita: “E mester muri.”—Juan 19:1-7, NW.

³ Cu dignidad y curashi, Hesus a wanta e humiliacion y a sufri sin keha.a E tabata plenamente prepara pa muri. Mas lat riba e dia di Pasco Hudiu ei, el a somete su mes voluntariamente na un morto doloroso riba un staca di tormento.—Juan 19:17, 18, 30.

⁴ E echo cu Hesus a entrega su bida a demostra cu e tabata un berdadero amigo pa su siguidonan. El a yega di bisa: “Ni un hende no tin amor mas grandi cu esaki, cu un hende ta duna su bida pa su amigonan.” (Juan 15:13) Esaki ta lanta algun pregunta importante. Tabata realmente necesario pa Hesus pasa den tur e sufrimento ei y despues muri? Dicon e tabata dispuesto pa haci esei? Como “su amigonan” y siguidonan, con nos por imita su ehempel?

Pakico Hesus Mester A Sufri y Muri?

5. Con bin Hesus tabata sa ki pruebanan specifico tabata sper’e?

⁵ Como e Mesias priminti, Hesus tabata sa kico pa spera. E tabata na haltura di e tantisimo profesianan den e Scritura Hebreo cu a predeci en detaye e sufrimento y morto di e Mesias. (Isaias 53:3-7, 12; Daniel 9:26) Mas cu un biaha el a prepara su discipelnan pa e pruebanan cu tabata sper’e. (Marco 8:31; 9:31) Riba caminda pa Jerusalem pa celebra su ultimo Pasco Hudiu, el a bisa su apostelnan specificamente: “E Yiu di hende lo wordo entrega na e sacerdotenan principal y escribanan; y nan lo conden’e na morto, y lo entreg’e na e paganonan. Y nan lo haci bofon di dje y scupi riba dje y sut’e y mat’e.” (Marco 10:33, 34) No tabata trata aki di palabranan bashi. Manera nos a mira, en berdad nan a haci bofon di Hesus, scupie, sut’e y mat’e.

6. Dicon Hesus mester a sufri y muri?

⁶ Pero pakico Hesus mester a sufri y muri? Pa varios motibo masha importante. Di prome, dor di keda leal, Hesus lo a duna prueba di su integridad y sostene e soberania di Jehova. Corda cu Satanas a pretende falsamente cu hende ta sirbi Dios solamente pa motibonan egoista. (Job 2:1-5) Kedando fiel “te na morto” riba un staca di tormento, Hesus a duna e contesta mas completo posibel riba Satanas su acusacion sin base. (Filipensenan 2:8; Proverbionan 27:11) Di dos, e sufrimento y morto di e Mesias lo a cubri of paga pa e picanan di otro hende. (Isaias 53:5, 10; Daniel 9:24) Hesus a “duna su bida como prijs di rescate pa hopi”, y asina a habri caminda pa nos por tin un relacion aproba cu Dios. (Mateo 20:28) Di tres, dor di wanta tur tipo di dificultad y sufrimento, Hesus “a ser proba den tur sentido mescos cu nos mes.” P’esei e ta un Sumo Sacerdote misericordioso, uno cu por “compadece di nos debilidadnan.”—Hebreonan 2:17, 18, NW; 4:15.

Dicon Hesus Tabata Dispuesto pa Entrega Su Bida?

7. Cuanto cos Hesus a sacrifica ora el a bin na Tera?

⁷ Pa bo por compronde mihor kico Hesus tabata dispuesto pa haci, pensa riba esaki: Ta cua homber lo laga su famia y su cas atras y bai biba na un pais stranhero si e sa cu mayoria di habitante di e pais ei lo rechas’e, cu lo e ser someti na humiliacion y sufrimento y cu por ultimo nan lo asesin’e? Pensa awor riba loke Hesus a haci. Prome cu el a bin na Tera, e tabatin un puesto privilegia den shelo na lado di su Tata. Sinembargo, Hesus voluntariamente a bandona su cas celestial y a bin na Tera como hende. El a haci esei, sabiendo cu mayoria di hende lo a rechas’e y cu nan lo a somet’e na humiliacion cruel, sufrimento intenso y un morto doloroso. (Filipensenan 2:5-7) Kico a motiva Hesus pa haci e sacrificio ei?

8, 9. Kico a motiva Hesus pa entrega su bida?

⁸ Mas cu tur cos Hesus a ser motiva pa un amor profundo pa su Tata. Hesus su perseverancia tabata prueba di su amor pa Jehova. E amor ei a pone cu Hesus tabata precupa pa e nomber y reputacion di su Tata. (Mateo 6:9; Juan 17:1-6, 26) Riba tur cos, Hesus kier a mira e nomber di su Tata ser haci limpi di e reproche cu a ser montona riba dje. Pues pa Hesus, tabata un gran honor y privilegio di por a sufri pa causa di husticia, pasobra e tabata sa cu su integridad lo a contribui na santificacion di e nomber bon y glorioso di su Tata.—1 Cronicanan 29:13.

⁹ Tabatin un motibo mas pakico Hesus a entrega su bida: amor pa humanidad. E amor aki a origina for di principio di historia humano. Hopi prome cu Hesus a bin na Tera, Bijbel ta revela ki sintimento e tabatin pa hende: “Mi delicia tabata den e yiunan di hende.” (Proverbionan 8:30, 31) Su amor tabata masha bisto tempo e tabata riba Tera. Manera nos a mira den e tres capitulonan anterior di e buki aki, Hesus a demostra su amor pa hende en general y pa su siguidonan en particular den hopi manera. Pero dia 14 di nisan di aña 33, voluntariamente el a entrega su bida pa nos. (Juan 10:11) Di berdad no tabatin un manera mas grandi pa el a demostra su amor pa nos. Acaso nos mester imit’e den esaki? Si. De echo, nos a haya un mandamento pa hacie.

“Stima Otro Mescos Cu Ami A Stima Boso”

10, 11. Kico ta e mandamento nobo cu Hesus a duna su siguidonan, kico e ta ensera, y dicon ta importante pa nos obedec’e?

¹⁰ E anochi prome cu Hesus a muri, el a bisa su discipelnan di mas intimo: “Un mandamento nobo mi ta duna boso, pa boso stima otro, y mescos cu ami a stima boso, pa boso tambe stima otro. Na esaki tur hende lo sa cu boso ta mi discipel, si boso tin amor un pa otro.” (Juan 13:34, 35) Dicon “stima otro” tabata “un mandamento nobo”? E Lei di Moises ya a yega di duna e mandamento: “Stima bo prohimo manera bo mes.” (Levitico 19:18) Pero e mandamento nobo ta rekeri un amor mas grandi, un amor cu lo a motiva nos pa entrega nos bida na fabor di otro hende. Hesus mes a splica esaki ora el a bisa: “Esaki ta mi mandamento, cu boso stima otro mescos cu ami a stima boso. Ni un hende no tin amor mas grandi cu esaki, cu un hende ta duna su bida pa su amigonan.” (Juan 15:12, 13) En realidad, e mandamento nobo ta bisa: “Stima otro hende, no mescos cu bo mes, sino mas cu bo mes.” E manera cu Hesus a biba y a muri tabata definitivamente un ehempel di tal amor.

¹¹ Dicon ta importante pa nos obedece e mandamento nobo? Corda cu Hesus a bisa: “Na esaki [e amor di sacrificio propio] tur hende lo sa cu boso ta mi discipel.” Si, amor di sacrificio propio ta identifica nos como cristiannan berdadero. Nos lo por compara e amor aki cu un badge. Delegadonan cu ta asisti na e congresonan anual di Testigonan di Jehova ta bisti un badge. E carchi ta identifica e persona, mustrando su nomber y congregacion. Amor di sacrificio propio pa otro ta e “badge” cu ta identifica cristiannan berdadero. Cu otro palabra, e amor cu nos ta mustra na otro mester ta asina riparabel cu e mester fungi como un señal, of badge, cu ta bisa observadonan cu en berdad nos ta berdadero siguido di Cristo. Cada un di nos ta haci bon di puntra nos mes: ‘E “badge” di amor di sacrificio propio ta bisto den mi bida?’

Kico Amor di Sacrificio Propio Ta Ensera?

12, 13. (a) Te con leu nos mester ta dispuesto pa haci sacrificio pa demostra nos amor pa otro? (b) Kico haci sacrificio propio ta nifica?

¹² Como siguido di Hesus, nos tin cu stima otro manera el a stima nos. Esaki ta nifica cu nos ta dispuesto pa haci sacrificio pa nos rumannan den fe. Te con leu nos mester ta dispuesto pa haci sacrificio? Bijbel ta bisa nos: “Na esaki nos conoce amor, cu el a entrega su bida pa nos; y nos mester entrega nos bida pa e rumannan.” (1 Juan 3:16) Mescos cu Hesus, nos mester ta dispuesto pa muri pa otro si ta necesario. Den tempo di persecucion, nos lo prefera di sacrifica nos propio bida cu traiciona nos rumannan spiritual y asina pone nan bida na peliger. Den paisnan dividi pa conflicto racial of etnico, nos lo risca nos propio bida pa proteha nos rumannan, sin importa ki antecedente racial of etnico nan tin. Ora nacionnan ta bai guera, nos ta prefera di bai sera of asta muri cu hisa arma contra nos rumannan den fe of contra cualkier otro hende.—Juan 17:14, 16; 1 Juan 3:10-12.

¹³ Ser dispuesto pa entrega nos bida pa nos rumannan no ta e unico manera pa demostra amor di sacrificio propio. De echo, ta masha poco di nos hamas ta haya nos tin cu haci un sacrificio asina grandi. Sinembargo, si nos ta stima nos rumannan suficiente pa muri pa nan, nos lo no mester ta dispuesto pa haci sacrificionan mas chikito, haciendo tur loke nos por pa yuda nan awor? Haci sacrificio propio ta nifica laga nos propio bentaha of comodidad un banda pa e beneficio di otro hende. Nos ta pone nan necesidad y bienestar prome cu di nos, asta ora esaki no ta cumbini nos. (1 Corintionan 10:24) Den ki maneranan practico nos por demostra amor di sacrificio propio?

Den Congregacion y den Famia

14. (a) Ki sacrificio ancianonan mester haci? (b) Kico bo ta pensa di e ancianonan cu ta traha duro den bo congregacion?

¹⁴ Ancianonan di congregacion ta haci hopi sacrificio pa “pastorea e tou.” (1 Pedro 5:2, 3) Fuera di percura pa nan mes famia, nan kisas tin cu tuma tempo anochi of den weekend pa atende asuntonan di congregacion. Esei ta inclui prepara parti pa reunion, haci bishita di pastoreo y atende casonan hudicial. Hopi anciano ta haci sacrificionan adicional, ya cu nan ta traha duro na asamblea y congreso y ta sirbi como miembro di Comite di Contacto cu Hospital, Grupo di Bishita Pashent y Comite Regional di Construccion. Ancianonan, no lubida nunca cu ora boso ta sirbi cu un spirito dispuesto—uzando boso tempo, energia y recursonan pa pastorea e tou—boso ta demostrando amor di sacrificio propio. (2 Corintionan 12:15) Tanto Jehova como e congregacion cu boso ta pastorea ta aprecia boso esfuerso sin egoismo.—Filipensenan 2:29; Hebreonan 6:10.

15. (a) Menciona algun sacrificio cu casanan di anciano ta haci. (b) Kico bo ta pensa di e esposanan cu ta apoya nan casa y ta dispuesto pa comparti nan casa cu bo congregacion?

¹⁵ Pero kico di e casanan di anciano? Acaso e señoranan aki cu ta apoya nan casa no ta haci sacrificio di manera cu nan esposo por cuida e tou? Siguramente ta un sacrificio pa un esposa ora cu su casa tin cu dedica tempo na asuntonan di congregacion; tempo cu di otro manera lo el a dedica na su famia. Pensa tambe riba e esposanan di superintendentenan di circuito y di districto, y e sacrificionan cu nan ta haci pa compaña nan casa di congregacion pa congregacion y di circuito pa circuito. Nan ta renuncia un cas di nan mes y kisas tin cu drumi tur siman den un otro cama. Esposanan cu di buena gana ta pone e interesnan di congregacion prome cu di nan mes ta merece elogio pa e manera generoso cu nan ta desplega amor di sacrificio propio.—Filipensenan 2:3, 4.

16. Mayornan cristian ta haci ki sacrificio pa nan yiunan?

¹⁶ Con nos por demostra amor di sacrificio propio den famia? Mayornan, boso ta haci hopi sacrificio pa cuida boso yiunan y pa ‘lanta nan den e disciplina y instruccion di Jehova.’ (Efesionan 6:4) Kisas boso tin cu traha hopi ora na un trabou agotador djis pa pone pan riba mesa y pa haci sigur cu boso yiunan tin paña adecua pa bisti y un dak riba nan cabes. Boso ta prefera di haci sacrificio personal cu priva boso yiunan di e necesidadnan di bida. Boso ta haci hopi esfuerso tambe pa studia cu boso yiunan, hiba nan reunionnan cristian y traha hunto cu nan den sirbishi di veld. (Deuteronomio 6:6, 7) Boso amor di sacrificio propio ta agrada Esun cu a origina bida di famia y lo por nifica bida eterno pa boso yiunan.—Proverbionan 22:6; Efesionan 3:14, 15.

17. Con esposonan por imita Hesus su amor di sacrificio propio?

¹⁷ Esposonan, con boso por imita Hesus den mustra amor di sacrificio propio? Bijbel ta contesta: “Esposonan, stima boso esposa, mescos cu Cristo tambe a stima e iglesia y a entrega su mes p’e.” (Efesionan 5:25) Manera nos a mira, Hesus a stima su siguidonan asina tanto cu el a muri pa nan. Un esposo cristian ta imita e actitud di Hesus. Hesus no tabata egoista y e “no a agrada su mes.” (Romanonan 15:3) Un esposo asina ta pone di buena gana e necesidadnan y interesnan di su casa prome cu di dje. E no ta insisti pa tur cos bai manera e gusta, mas bien e ta demostra cu e ta dispuesto pa cos bai na e manera cu su esposa ta prefera ora cu ningun principio biblico ta ser viola. E esposo cu ta demostra amor di sacrificio propio ta gana Jehova su aprobacion y e amor y respet di su casa y yiunan.

Kico Abo Lo Haci?

18. Kico ta motiva nos pa sigui e mandamento nobo pa stima otro?

¹⁸ No ta facil pa obedece e mandamento nobo pa stima otro, pero nos tin un motivacion fuerte pa hacie. Pablo a skirbi: “E amor di Cristo ta obliga nos, yegando na e conclusion aki, cu un a muri pa tur . . . y el a muri pa tur, pa esnan cu ta biba no biba mas pa nan mes, ma pa esun cu a muri y cu a resusita pa nan motibo.” (2 Corintionan 5:14, 15) Siendo cu Hesus a muri pa nos, nos lo no mester sinti nos obliga di biba p’e? Nos por haci esei dor di sigui su ehempel di amor di sacrificio propio.

19, 20. Ki regalo precioso Jehova a duna nos, y con nos por demostra cu nos ta acept’e?

¹⁹ Hesus no a exagera ora el a bisa: “Ni un hende no tin amor mas grandi cu esaki, cu un hende ta duna su bida pa su amigonan.” (Juan 15:13) E echo cu Hesus tabata dispuesto pa entrega su bida pa nos tabata e expresion di mas grandi di su amor pa nos. Sinembargo, tin un otro persona cu a demostra un amor asta mas grandi na nos. Hesus a splica: “Dios a stima mundo asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.” (Juan 3:16) Dios ta stima nos asina tanto cu el a duna su Yiu como un rescate, haciendo posibel cu nos por ser libra for di pica y morto. (Efesionan 1:7) E rescate ta un regalo precioso for di Jehova, pero e no ta obliga nos pa acept’e.

²⁰ Ta keda na nos si nos ta acepta e regalo di Jehova. Con nos ta acept’e? Ora nos “kere” of eherce fe den su Yiu. Sinembargo, fe no ta palabra so. Fe ta keda demostra pa medio di accion, na e manera cu nos ta biba. (Santiago 2:26) Nos ta duna prueba di nos fe den Hesucristo ora nos ta siguie dia tras dia. Esei lo trece bendicionnan rico awor y den futuro, manera e ultimo capitulo di e buki aki lo splica.